Exodus 18

aymara-1997

1Jetró chachax Moisesan awkch'ipänwa, Madián markan sacerdoteparakïnwa, jupasti taqi kuntix Diosax Moisesampitaki, Israel markapampitakis lurkatayna ukanak yatïna, kunjämtix Tatitux Egiptot jupanakar irpsunkatayna ukanak yatirakïna.

2Moisesax Egipto markankaskän ukkhaw Séfora warmipar Madianar khithanukxatayna, Jetrosti jupampiru,

3pani wawapampiruw katuqatayna. Jupanakat maynix Guersón sutinïnwa, Moisesasti akham satayna: “Nayax jaqin uraqipan sart'ir jaqikïtwa” sasa.

4Maynïr wawapasti Eliézer satarakïnwa; Moisesasti akham sarakitayna: “Awkixan Diosapaw nayar yanapitu, faraonan espadapatsa qhispiyarakitu” sasa.

5Moisesax wasaran utjnuqatayna, Diosan qullup jak'aru, Jetró chachasti uka chiqaruw Moisesan warmipampi, wawanakapamp chik jupar tumpt'ir saräna.

6Jupasti Moisesar yatiyiriw khithäna, akham sasa: —Naya Jetró awkch'imaw jumar tumpt'ir jutaskta, warmimampi, pani wawapamp chika —sasa.

7Moisesasti Jetró awkch'ipar katuqiriw mistuwayäna. Ukatsti jupan nayraqatapan alt'asisaw jamp'att'arakïna; aruntasisasti chhujllaruw mantapxi.

8Ukatsti Moisesax kuntix Tatitux Israel markat arxatasisax faraonampiru, egipcionakampir lurkatayna taqi ukanak awkch'ipar yatiyäna, kuna jan walt'añanakatix thakhin utjkatayna, kunjämtix Tatitux jupanakar qhispiykatayna taqi ukanak yatiyarakïna.

9Ukham yatisinsti Jetrox kusisïnwa, Tatitun israelitanakar khuyapayasiñap uñacht'ayatapata, egipcio jaqinakan amparapat qhispiyatapata.

10Ukat jupax sarakïna: —¡Israelan Tatitupax jach'añchatäpan, jupaw juma israelitanakarux egipcionakampina, faraonampin amparapat qhispiyapxtamxa!

11Tatitux jumanakar ukataq t'aqhisiñat qhispiyapxtam egipcionakan jach'a jach'a tukuñampi apnaqatäñata. ¡Jichhax yattwa, Israelan Diosapax taqi diosanakat sipansa wali ch'amaniwa! —sasa.

12Jetró chachasti ukspachaw mä uywa katusin nakt'at wilañcha Diosar luqtäna, ukhamarak yaqha waxt'anakampi. Uka qhipatsti, Aaronampi, Israelan jilïrinakapampix Moisesan awkch'ipamp chikaw Diosan nayraqatapan manq'apxäna.

13Qhipärmanthisti, Moisesax israelitanakan jan walt'ayasiñanakap askichiriw qunt'asïna, jupanakasti Moisesan nayraqatapan willjtat jayp'ukamaw ukankapxäna.

14Jetró awkch'ipasti, Moisesan luratap uñjasaxa, jupar akham jiskt'äna: —¿Kunatsa ukataq ch'am tukta? Jaqinakax willjtat jayp'ukamaw juman ukar juti. ¿Kunatarak juma sapak jupanakar taripañatak qunt'astasti? —sasa.

15Moisesasti awkch'iparux akham sarakïna: —Jaqinakax Diosar jiskt'ayasiriw nayan ukar jutapxi.

16Jupanakkam jan walt'ayasipki ukkhax nayan ukaruw jiskt'asir jutapxi, jupanakar khitis juchani uk nayan uñjañaxataki; nayasti Diosan kamachinakapampi, yatichäwinakapampi jupanakar yatiyarakta —sasa.

17Ukampis Jetró awkch'ipax akham sarakïna: —Janiw uk wal lurktati,

18jumax qarjastawa, jumamp chikäki uka jaqinakas qarjasirakiwa. Uka lurañax atipjasktamwa, janiw sapak lurkasmati.

19Iwxt'käma uk sum ist'ita, Diosay jumar yanappan. Jumaw Diosarux marka lanti makhatañama, kuna jan walt'añanakatix utjki ukanak jupar katuyañamaraki.

20Jupanakarusti, Diosan kamachi arunakaparjama, yatichäwinakaparjam yaticham; ukatsti kunjämtix jupanakan jakapxañapäki, kuntix lurapxañapäki ukanak yatiyarakim.

21Ukham lurañamatakisti, israelitanak taypit suma amuyt'an chachanak thaqham, Diosar axsartirinaka, qhan parlirinaka, qullqi layku jan khitirus arxatirinaka. Jupanakarusti waranqa jaqinakan jilïripat ucham, yaqhipanakarux patak jaqinakxaru, yaqhipanakarusti phisqa tunka jaqinakxaru, mayninakarusti tunka jaqinakxaruraki.

22Jupanakaw jaqinakarux jan wali luratanakap taqi pachan uñjani. Jan askichkay mä jan walt'añ utjkani ukkhakiw jumarux yatiyapxätam. Ukhamat jumax ch'am jan tukxätati, jupanakaw yanapapxarakïtam.

23Jumatix ukham luräta, ukatix Diosan munañapächi ukaxa, jumax walt'akïtawa; jaqinakasti kusisitakiw utanakapar sarxani —sasa.

24Moisesasti awkch'ipan iwxt'anakap ist'änwa, ukatsti uka arunakarjamaw luräna:

25Israelitanak taypit suma amuyt'an jaqinak ajllïna, jupanakarusti waranqa jaqinakxaruw jilïrit uchäna, mayninakarux patak jaqinakxaru, mayninakarusti phisqa tunka jaqinakxaru, yaqhipanakarusti tunka jaqinakxaruraki.

26Jupanakaw markachirinakan jan walt'äwinakap taqi pachan uñjapxäna, ukampis sinti jan walinaksti Moisesaruw yatiyapxäna.

27Uka qhipatsti Moisesax awkch'ipar sum khithanukxäna, awkch'ipasti markaparuw kuttawayxäna.

← Chapter 17 Chapter 19 →