Exodus 13

aymara-1997

1Tatitusti Moisesaruw parläna akham sasa:

2“Jilïr tayna yuqall wawanak nayatak yaqhachapxäta, israelitanakan taqi jilïr tayna yuqall wawanakapax nayankiwa, ukhamarak uywanakan nayrïr qallunakapasa” sasa.

3Ukat Moisesax israelitanakar säna: “Aka urut amtasipxapunïtawa, aka urun Tatitux jach'a ch'amapamp Egipto uraqit jumanakar irpsunipxtam, t'aqhisiyat jakapkäyät uka uraqita. Janiw levaduran t'ant'a manq'apxätati.

4Jichhürux Abib phaxsiwa, uka phaxsin mistunipxtaxa,

5aka pachpa phaxsinarak amtasin uruyapxäta, kunapachatix Tatitux leches misk'is umjam jalaski uka uraqir puriyapkätam ukapacha, cananeonakana, hititanakana, amorreonakana, heveonakana, jebuseonakan uraqinakaparu; kawkïr uraqtix jumanakar churañatak nayra awkinakamar arsuwaykatayna uka uraqiru.

6Jumanakax paqallqu uruw jan levaduran t'ant'a manq'apxäta, paqallqüri urusti Tatitur jach'añchasaw uruyapxäta.

7Paqallqu uruw jan levaduran t'ant'a manq'asini, janiw kuna levadurasa, levaduran t'ant'as uraqinakaman utjañapäkiti.

8Ukürusti wawanakamarux sapxätawa: ‘Tatitux Egiptot nanakar irpsunisax kunanaktix nanakatak lurkän uka amtasiñ uruwa’ sasa.

9‘Aka uruyäwisti jumanakatakix amparanakamana, paranakaman mä chimpükaspas ukhamäniwa. Ukaw jumanakarux amtayapxätam Tatitun kamachi arupa wiñay parlapxañamataki, jupaw jach'a ch'amapamp Egipto markat irpsunipxtam.

10Ukhamasti, sapa maraw uk amtasis uruyapxäta, uka pachpa uruna.’

11“Kunapachatix Tatitux awkinakamar arskatayna ukhamarjam Canaán uraqi jumanakar katuyapkätam ukkhaxa,

12jumanakax tayna yuqall wawanakam yaqhachapxätawa, uywanakaman nayrïr urqu qallunakapsa yaqhachapxarakïtawa, ukanakasti Tatitunkiwa.

13Ukampis qachu asnon nayrïr qallup lantsti mä urqu oveja qallumpi, jan ukax mä cabritompiw kutsuyapxäta, ukampis janitix oveja churapkäta ukaxa, uka asno qallur kunkat q'iwinukxapxäta. Jilïr yuqall wawanakam lantsti mä waxt'äwi churapxarakïta, ukhamat qhispiyañataki.

14Ukatsti wawanakamatix qhipür jiskt'apxätam: ‘¿Kunatsa uka wilañchanak lurapxta?’ sasaxa, jumanakax sapxätawa: ‘Tatituw jach'a ch'amapamp Egipto uraqit irpsunipxitu, t'aqhisiyat jakañata.

15Uka markan reyipax chuymap qalarayasïna, janiw nanakar mistuyaniñ munkänti. Ukat Tatitux egipcio jaqinakar mutuyäna tayna yuqall wawanakapar jiwarayasa, ukhamarak uywanakapan nayrïr qallunakaparusa; ukat nanakax uywanakaxan nayrïr urqu qallunakap Tatitur jach'añchas luqtapxta, ukatsti tayna wawanakaxan qhispiyatäñapatakisti mä waxt'a luqtapxarakta.

16Ukhamasti, akham lurañaxa amparanakamana, paranakaman mä chimpükaspas ukhamäñapawa, Tatitux jach'a ch'amapampi Egipto markat irpsunkistu uk amtasiñataki.’ ”

17Faraonax israelitanakar antutkän ukapachasti, Diosax janiw filisteonakan uraqipar sarki uka thakhinjam jupanakar irpkänti, uka thakhix chiqak sarkchïn ukasa. Jupax amuyänwa: nuwasiñatix utjaspa ukax israelitanakax janiw nuwasiñ munapkaspati, jupanakax axsarañat Egiptorukiw kutt'añ munxapxaspa, sasa.

18Ukat Tatitux israelitanakar wasaranjam Mar Rojo qutar sarki uka thakhinjam muytayäna. Israelitanakax mä ejercitor uñtataw Egiptot mistsuwayapxäna.

19Moisesasti Josean ch'akhanakap apasxäna. Joseaw janïr jiwkasin israelitanakarux juramento lurayatayna ukham phuqhapxañapataki, jupanakarusti akham satayna: “Diosaw jumanakar yanapir jutani; ukhamäni ukkhasti, nayan ch'akhanakax akat apasxapxätawa” sasa.

20Israelitanakax Sucot chiqat mistuwayasin Etam sat chiqaruw puripxäna, ukan utjnuqtapxarakïna, wasarax qalltki ukawjaru.

21Tatitusti jupanakan nayraqatap thakhi uñacht'ayas saräna, urux mä qinay taypitpach jupanakar irpäna; arumasti mä nina taypitarak jupanakar qhant'ayäna. Ukhamat jupanakax uruy arum sarapxäna.

22Uka qinayasti urux jupanakan nayräxap saräna, arumasti uka ninarakiw jupanakan nayräxap saräna.

← Chapter 12 Chapter 14 →