Ecclesiastes 12

aymara-1997

1Waynäkasin irnuqir Diosamat amtasim, jan walt'añ urunak janïr purinkipana, kunapachatix siskäta: “Janiw kuna kusisiñsa sarnaqäwixan jikxatkti” sasa.

2Irnuqt'ir Diosamat amtasim, intisa, phaxsisa, warawaranakas janïr ch'amakt'kipana, qinayanakas jallu qhipat utjkipana.

3Mä uruw purinini, ukansti reyi uta uñjirinakas khathatipxaniwa, jan axsarir jaqinakas apnaqatäpxaniwa; molinonakas juk'akïxatap laykux janiw irnaqkaniti, ventananakat uñch'ukirinakas juykt'apxaniwa.

4Kunapachatix uka urux purinkan ukkhaxa, anqar mistuñ punkunakax jist'antasxaniwa; molinon ruxuqitanakapas juk'at juk'at amukt'ani; jamach'inakan q'uchutapas amukt'aniwa;

5amsta chiqanakax axsarañ churani, thakhinsti chijinakaw utjani. Almendro alix panqarañ qalltani, t'iju t'ijusti jan walt'añ utjayani, alcaparra alix janiw kunatakis askïkxaniti. Ukampis jaqix wiñay utjasïwiparuw sarxani, jiwatat jachirinakax niyaw marka thakhinakan ist'asi.

6Juman irnuqir Diosamat amtasim qullqit lurat wiskan janïr t'aqaskipana, quri phukhus jisk'a jisk'a janïr tukuskipana; wakullas uma phuju lakan janïr p'akiskipana, janïr uma phujun jiskhañ wiskapas jisk'a jisk'a tukuskipana.

7Uka qhipatsti laq'ax uraq laq'aruw kuttxani, kunjämäkäntix nayrax ukhama, ajayusti khititix churkän uka Diosaruw kutkatxani.

8Naya, Arunak Yatiyiriw wasitat sista: “¡Inamayakiwa, inamayakiwa! ¡Taqi kunas inamayakiwa!” sasa.

9Arunak Yatiyirix juk'amp yatiñanïsax juk'amp yatiñanakxat jaqinakar yatichäna. Ukhamarak walja säwi arunak yatiqañaruw uchasïna, ukat sapa maya chiqaparuw uskurakïna.

10Taqi tuqit suma arunak jikxatañatakiw thaqhäna, chiqpach säwi arunak wakisitarjam qillqañataki.

11Yatiñ kankañan jaqin säwi arunakapax mich'inakar uñtatawa, mayar apthapitasti ch'akt'ata ch'akurunakäkaspas ukhamawa, mä awatirin uskt'ata.

12Kuntix maynix ukanakat apski ukax suma iwxa arunakawa. Walja qillqatanak qillqañax janipuniw tukuskiti, ukanakat yatxatañax qarjayiwa.

13Parlañax tukusxiwa. Taqi kunaw satäxi. Diosar yupaycham, kamachi arunakapar phuqham, taqi ukanakan jaqitakïtap layku.

14Diosax taqi luratanakasat wayt'istani, walitsa, jan walitsa, jamas chiqan luratanakasatsa.