Deuteronomy 5

aymara-1997

1Moisesasti Israel markar tantachthapisin säna: “Israelankir jaqinaka, sum ist'apxam kawkïr kamachinaka, kamachi arsutanaktix jichhürun yatiyapkäma ukanaka. Sum p'iqinakamar yatiqapxam, ukatsti taqi sarnaqäwiman ukarjam sarnaqapxarakim.

2“Tatit Diosasax mä suma arust'äwi jiwasampi Horeb qullun lurawayi.

3Janiw Diosax awkinakasampikiti uka suma arust'äwi lurki, jan ukasti taqi jiwasanakampiw luraraki, khitinakatix jichhürun aka chiqan tantacht'ata jikxatasktan ukanakampi.

4Diosasti mä nina taypit jumanakampix ajanuy ajanu parli.

5Nayasti ukankaskäyätwa, Tatitumpi jumanakampi uka chika taypina, Diosan arunakap jumanakar yatiyasa, jumanakasti ninaru axsarapxatamat qullurux jan makhatapktati. Tatitusti akham säna:

6“ ‘Nayätwa juman Tatit Diosamaxa, nayarakiw Egipto markat irpsunsma, kawkhantix t'aqhisiyat jaqïkäyat uka markata.

7“ ‘Janiw nayat sipan yaqha diosanakanïyätati.

8“ ‘Janiw yaqha diosanak lurasïtati kunar uñtatsa, alaxpachankirir uñtatsa, aka uraqinkirir uñtatsa, quta manqhankirir uñtatsa.

9Janiw ukanakar killisïtati yupaycharakïtasa; nayätwa Tatit Diosamaxa, janiw yaqhampïpxañam munkti. Nayasti nayar uñisiri awkinakan juchanakapat wawanakapan wawanakaparuw mutuyta;

10ukampisa munasiñampiw uñjarakta, khitinakatix nayar munasipkitu, kamachi arunakaxsa phuqhapkaraki jupanakan waranqa mita wawanakan saraqirinakaparusa.

11“ ‘Janiw Tatit Diosaman sutip inamayatak aytasïtati. Jupasti inamay sutip aytasirinakarux mutuyaniwa.

12“ ‘Sábado urut amtasïta, uka urun Tatit Diosar jach'añchañamataki, kunjämtix Tatit Diosamax iwxawayktam ukhamarjama.

13Suxta uruw irnaqäta, taqi kuntix lurañamäki ukanakxa, ukürunakaw luräta,

14ukampis paqallqüri urux Tatit Diosamar luqtat samarañ uruwa. Uka urux janiw jumax kuns lurätati, yuqamasa, phuchhamasa, uywatamasa, kawkïri uywanakamasa, asnomasa, markanakaman utjasir jaya markat jutir jaqisa janirak kuns lurpati; ukhamat uywatamax chachäpasa, warmïpasa, jumjamarak samarañapataki.

15Egipto markan t'aqhisiyat jaqïtam amtasim, Tatit Diosamaw jach'a ch'amapamp uka markat irpsuntam, ukat Tatit Diosamax iwxtam sábado urun samarañamataki.

16“ ‘Awkimaru, taykamaru waqaycham, Tatit Diosamax iwxawayktam ukhamarjama, Tatit Diosamax churkätam uka uraqina walja maranak jakañamataki.

17“ ‘Janiw jiwayätati.

18“ ‘Janiw wachuq jucha lurätati.

19“ ‘Janiw lunthatasïtati.

20“ ‘Janiw jaqi masimatak kuna k'ari arunaksa parlätati.

21“ ‘Janiw jaqi masiman warmip munapayätati. Janirakiw jaqi masiman utapsa, uraqinakapsa, uywatapsa, uywanakapsa, asnopsa, kunatix jupankki ukanaksa munapayätati.’

22“Aka arunaksti Tatituw jach'at parläna, kunapachatix taqi jumanakax qullu kayun tantachasipkta ukapacha. Arupasti nina taypita, mä ch'iyar qinay taypit mistunïna. Tatitux pä qala tablanakaruw kamachinak qillqäna, uksti nayaruw katuyitu, ukatsti janiw kunampsa arskxänti.

23Ukampis jumanakax Tatitun arup uka ch'amak taypit arsunitap ist'asaxa, ukatsti qullun nina aqaskatap uñjasaxa, axsarayasipxäyätawa, ukat jumanakax ayllunakan jilïrinakapampi, Israelan jilïrinakapampix nayamp parlir jutapxtaxa,

24ukatsti sapxistawa: ‘Chiqpachapuniw jiwasan Diosasax qhapaq kankañapampi, jach'a ch'amapamp uñacht'ayistu, arupsa nina taypitpach ist'apxtan. Jichhüruw uñjtan Tatitu Diosan jaqimpi parlatapa, jaqir jan jiwayasa.

25Ukampisa, ¿kunatarak jiwasasti uka ninan nakhantat jiwañänisti? Wasitattix Tatit Diosasan arup ist'añänixa, jiwañäniwa;

26¿khiti jaqirak jiwasanakjam jakkir Diosan arup nina taypit parlaskir ist'asin, jan jiwkisti?

27Jumakiy jak'achasim, ukatsti taqi kuntix Tatit Diosasax siskätam uk ist'arakïta, ukat nanakar yatiyapxitäta kuntix parlkätam ukanaka; nanakasti kuntix sapkitäta ukanak phuqhapxäwa’ sasa.

28“Tatit Diosasti taqi parlatanakam ist'äna, ukat nayarux situ: ‘Aka markan taqi parlatanakap ist'ta, sapki ukax walikiwa.

29¡Walïspaw jupanakan ukham amuyunïpxaspa ukaxa, ukatsti jach'añchapxitaspa, kamachi arunakaxsa taqi urunakan phuqhapxarakispa ukaxa, ukhamat wawanakapasa, jupanakas wiñay sum sarnaqapxaspa!

30Jichhasti jupanakar sanim: Utjäwinakamar kuttxapxam, sasa;

31ukampis jumax akankañatakiw kuttanïta. Kamachinak katuyäma jupanakar yatichañamataki, ukhamat jupanakax uka kamachi arunakarjam kuna uraqtix churkä ukan sarnaqapxañapataki’ sasa.

32Ukhamasti israelitanaka, Tatit Diosaman taqi iwxanakaparjamay jan kawksarus jithiqtasa jakäwinakaman sarnaqapxam.

33Tatit Diosamax uñacht'ayapktam uka thakhinjam sarapxam, katuqapkäta uka uraqin walja maranak jakapxañamataki.

← Chapter 4 Chapter 6 →