Deuteronomy 34

aymara-1997

1Moisesax Moab wasaratxa, Pisgá sat qullu pataruw makhatäna, ukatsti Nebo qullu pataruw purirakïna, Jericó marka uñkatasina. Uka chiqat Tatitux uñtayäna taqpach Galaad uraqinaka, Dan ayllun uraqinakapkama;

2ukhamarak Neftalí, Efraín, Manasés ayllunakan uraqinakapa, Judá ayllun uraqinakapa, Mediterráneo sat qutäkis ukakama.

3Uka chiqatpach Moisesax aynach tuqinkir wasar uñtäna, Jordán jawiran qhirwapa, Jericó markar muyuntki uka pampanaka, Sóar markakama. Jericó markax Palmeranakan Marka satarakiwa.

4Ukan Tatitux Moisesar säna: “Aka uraqinak nayax Israelar churä. Ukham nayax nayra awkinakamar arsuwayta, Abrahamaru, Isaacaru, Jacoburu. Nayax kipka nayranakamamp uñjañam munta, ukampis janiw uka uraqirux mantkätati” sasa.

5Ukhamaw Tatitun luqtiripa Moisesax, Moab uraqin jiwxäna, kamisatix Tatitux siskatayna ukhamarjama.

6Ukatsti uka pachpan jupar imt'xapxäna Moab chiqan utjir mä qhirwana, Bet-peor sat uñkatasina, ukampis janiw khitis jichhürkam Moisesan kawkhar imatätapsa yatkiti.

7Moisesax pataka pä tunkan maranïkän ukkhaw jiwxäna. Jupasti suma k'umarakïskänwa, nayrapas sum uñjaskäna.

8Israelitanakax Moab wasaran kimsa tunka uruw Moisesat jachapxäna, ukhamat jiwatapat jachaña, llakisiñ urunak phuqhasa.

9Janïr jiwkasasti, Moisesax Josué chachan p'iqipxarux amparap luqxatäna, Diosasti yatiñ kankañampiw jupar phuqt'äna. Ukat israelitanakax Josué chachar jaysapxäna, ukatsti kamisatix Tatitux Moisesar iwxawaykatayna ukhamarjamaw phuqhapxarakïna.

10Israel marka taypinsti, janiw Moisés profetjamax yaqha profetax Tatitumpi ajanuy ajanu parlirix utjkxänti.

11Janipuniw khitis jupjamax muspharkay luräwinak uñacht'aykänti Diosan arsutaparjam Egipto markaru, reyipar ñanqhachañatakixa.

12Janipuniw khitis Moisesat sipan juk'amp ch'amanix utjkänti, janirakiw kuna jach'a luräwinaktix israelitanakan uñjkañ lurkän uka kipka luriris utjkänti.