Deuteronomy 25

aymara-1997

1“Kunapachatix yaqhipanakax ch'axwañan sarnaqapkani ukkhaxa, jupanakax taripatäñatak jilïrinak nayraqatar uñstapxañapawa, ukatsti taripir jilïrinakaw juchan jaqir juchañchaskani, jan juchan jaqirus jan juchanirjamaw uñjarakini.

2Juchan jaqirutix juchapat jawq'jañ wakischi ukapachasti, taripirix uraqiruw liwnuqayani, ukatsti jupa nayräxan jawq'jayani, kuna juchanaktix lurki ukhamarjama.

3Janiw kunäkipansa pusi tunkat juk'amp jawq'antapxätati, uka marka masiman jan juk'ampi usuchjatäñapataki, ukhamat jumanak nayräxan jan p'inqachat uñjasiñapataki.

4“Janiw vacarux trigo taksuskirir ñuku uskupxätati.

5Moisesasti saskakïnwa: “Mä utantix pani jila sullka jakapxani, uka paninit maynix jan wawan jiwxaspa ukapachasti, jiwirin warmipax janiw yaqha utankir chachamp jaqichaskaniti; jan ukasti jiwirin jilapax jilapan warmipampiw jaqichasini, ukhamat jupax jilapan warmipampi jila kankañ phuqhani.

6Jupanakat yurir tayna wawax, jiwirin sutipanïniwa, Israel marka taypin jiwirin sutipax jan chhaqhañapataki.

7Ukattix uka jaqix jilapan ijmapampi jaqichasiñ janipun munkanixa, warmix jilïrinakar yatiyiriw sarani akham sasa: ‘Jiwir chachaxan jilapaxa, janiw Israel taypin jilapan sutip jakayañ munkiti, janiw jupax jila kankañ phuqhañ munkiti’ sasa.

8Markan jilïrinakapasti juparuw jawsayapxani jupamp parlañataki, jupatix uka warmimpi jan jaqichasiñ munkani,

9ukapachasti warmix taqi jilïrinakan uñjkataw chachapan jilapar jak'achasisin kayupat wiskhup thatsuni, ukatsti ajanupat thuskatarakini, akham sasa: ‘Akhamaw luraña khiti jaqitix jilapan sutip jan jakayañ munki ukaruxa’ sasa.

10Ukatsti uka jaqin wila masinakapax Israel markan: ‘Jan wiskhun wila masinaka’ sutimpi uñt'atäniwa.

11“Pani chachatix nuwasisipkani, ukat mayni jaqin warmipax jak'achasini, chachapat arxatasis maynirux chhuxurasiñapat katuntani,

12ukkhasti uka warmirux jan khuyapt'ayasisaw maysa amparap khariqapxäta.

13“Alasiñansa, aljasiñansa janiw k'ari tupunak apnaqapxätati.

15Ukat sipan aljasiñ tupunakamax suma phuqhatapunïpan, ukhamat walja maranak jakapxäta, Tatit Diosamax churapkätam uka uraqina.

16Ukham jan chiqa kankañan sarnaqirinakax Diosar axtasiyiwa.

17Moisesasti sarakïnwa: “Janipun jumanakax armasipxamti kuntix Amalec markankirinakax thakhin lurapktam ukanaka, jumanakax Egipto markat jutasipkäyät ukapacha.

18Uka jaqinakax janiw Diosarus axsarapkänti; ukat sipana, kunapachatix jiwasax wali qarjata, ch'ama thayjtata uñjasipkäyätan ukkhaw jalxatistu; ukatsti ch'ama thayjtat qhipa jutirinakarus jiwayapxarakïnwa.

19Ukhamasti, kunapachatix Tatit Diosamax churkätam uka uraqin taqi uñisirinakamat qhispiykätam ukapachaxa, jumanakax Amalec chachan sutip aka uraqit chhaqtayapxañamawa. ¡Janipun uk phuqhañ armasipxamti!

← Chapter 24 Chapter 26 →