Daniel 12

aymara-1997

1“ ‘Ukapachaw Israel markan arxatiripa Miguel jilïr angelax uñstanini. “ ‘Ukasti llakisiñ urunakäniwa, uka urunakjamasti janipuniw kunapachas utjkänti, markanakan utjatapat aksaru. Uka urux purinkani ukapachasti, markamankirinakat qillqatan qillqantatäpki ukanakax, taqiniw qhispipxani.

2Amay imäwin ikiskirinakat, waljaniw sartapxani: mayninakax wiñay jakañataki, mayninakasti wiñay p'inqachatäñataki, t'aqhisiyatäñatakiraki.

3Yatiñani jaqinakasti, waljaniru chiqa thakhinjam irpirinakasti, alaxpach qhanjamaw k'ajapxani; ¡warawaranakjamaw wiñayatak k'ajapxarakini!

4“ ‘Jumasti Daniel, taqi akanakatxa, jan khitirus arsumti; uka qillqat jan jist'aramti, tukuy uru puriniñapkama. Walja jaqinakaw juk'amp yatxatañ munasax uksa aksa sarnaqapxani’ sasa.

5“Naya, Danielax, pani yaqha jaqinakaruw uñjarakta, ukanakat maynix jawir akkatana, maynisti jawir khurkatan sayaskiri.

6Jupanakat mayniw, lino isimp isthapit chacharu, uma patxan sayt'atäkän ukar jiskt'arakïna: ‘¿Kunapacharak aka jan amuyt'kaya luräwinakasti tukusxanisti?’ sasa.

7Lino isimp isthapit chachasti, alaxpachar amparap luqtasaw, jakkir Diosan sutipxar juramentompi arsüna akham sasa: ‘Kimsa mara chikatanita, kunapachatix Diosan markapax jan juk'amp t'aqhisiyat uñjaskxani ukapachaw taqi akanakax tukusxani’ sasa.

8“Nayasti kuntix siskäna uk ist'ayätwa, ukampis janiw kuns amuyt'käyätti. Ukat jiskt'asta: ‘Tata, ¿taqi ukanak qhipatsti kunarak utjanisti?’ sasa.

9Jupasti sarakituwa: ‘Daniel, jumax sarnaqañ sarnaqaskam, janiw khitis taqi akanakat yatiñapäkiti, tukuya pachan puriniñapkama.

10Waljaniw taqi kunanaktix yatiyksma ukanak t'aqhisipxani, ukampis uka t'aqhisïwi qhipat aski jaqinakäpxaniwa. Ñanqha jaqinakasti ñanqhanakap lurasipkakiniwa, kunatix utjki ukanakat jan amuyt'asa, ukampis yatiñan jaqinakax taqi akanak amuyt'apxani.

11Waranqa pä patakani llätunk tunkani urunakaw sarakipani, sapür luqta katuyañ sayt'atap qhipata, Tatitun qullan utap ñanqhachañ utjkani uka qhipata.

12Kusisiñaniwa khititix taqi iyawsañampi, waranqa kimsa patakan kimsa tunka phisqani urunak sarakipañapkam suyt'kani ukaxa.

13Jumasti Daniel, jan kuna llakin jakasim jiwañam urukama. Tukuy pachax purinkani ukkhaxa, jiwatanak taypit sartxäta, churäwim katuqasiñataki’ ” sasa.