Amos 8

aymara-1997

1Tatitux akham uñacht'ayitu: Puqurat achunakaw mä walayan utjäna,

2jupasti jiskt'arakituwa: —¿Amós, kuns uñjtaxa? —sasa. Nayasti jupar sistwa: —Mä walayan puqurat achunak uñjta —sasa. Tatitusti sarakituwa: —Israel markax uka achunakjam puquratäxiwa; janipuniw mayampsa juchanakap pampachkxäti.

3Uka urux reyin jach'a utapan q'uchutanakax llakisiñaruw tukuni. Walja jaqinakaw jiwarapxani, jiwat janchinakapasti anqar jaqtatarakïniwa. Tatituw ukham arsu.

4Ist'apxam, llamp'u chuyman jaqinakar t'aqhisiyirinaka, markankir jan kunaninakar tukjirinaka;

5jumanakax sapxtawa: “¿Kunapacharak wawa phaxsi phunchhäwi urusti tukusxani trigo aljasiñasatakisti? ¿Kunapacharak samarañ urusti tukusxani, balanza tupunak jisk'aptayas jilar aljañatakisti?

6¡Jan kunaninakarux aynacht'ayapuniñäni, jupanakpacha jiwasar luqtirit aljasiñapkama, ukhamat manunakap phuqhañataki, mä paris wiskhuksa manüsipkpan ukasa! ¡Trigo achunaksti jipimppach aljañäni!” sasa.

7Tatitusti, Israel markan jach'a kankañap laykuw juramento luri: “Janipuniw markaxan jan wali luratanakap armkäti” sasa.

8Ukhamïpansti, ¿janit uraqisti khathatkanisti? ¿Janit jaqinakasti jachapkanisti? ¡Kunjämtix Nilo jawiran umax jilxataraki wañaqaraki, ukhamaw uraqix uñstani, chhaqtarakini!

9Tatitux siwa: “Uka urunsti, chika uruw intirux ch'amakt'ayä, qhanaskir urunpach uraqir ch'amakt'ayä.

10Phunchhäwi urunakamxa jiwatanakat jachañaruw kipstayä, q'uchutanakamasti, amaya imäwi llakinakaruw tukuyarakï; llaki isimpirakiw isthapisiyapxäma, llakisiñat p'iqinakam q'ararasipxäta. Sapa yuqall wawap jiwayasir jaqir uñtataw jachapxäta, taqi kunaw jachañar tukuni.

11Urunakasti jutaskiwa siw Tatituxa. Uka urunakaw uraqirux mach'a apayanï; janiw manq'añ mach'äkaniti, umat pharjayasiñ mach'äkanisa, jan ukasti Tatitun arupat ist'añ mach'äniwa.

12Tatitun arup thaqhasaw jaqinakax, inaki maysat maysa sarnaqani, mä qutat mä qutakamaw sarapxani, inti jalsu tuqit qalltasa, inti jalanta tuqikama, amstat aynachkamaw thaqhapxani, ukampis janiw jikxatapkaniti.

13Uka urux, suma tawaqunakampi, ch'aman waynanakampix, umat pharjayasis jan ch'amaniw thayjtawayapxani.

14Samaria markankir k'ari diosanakan sutipxar juramento luririnaka; khitinakatix sapki: ‘Dan markan diosap layku’, ‘Beerseba markan diosanakap layku’ sasa, ukanakax jan mayampi sartañatakiw jiwarapxani.”

← Chapter 7 Chapter 9 →