2 Samuel 9

aymara-1997

1Mä urusti, Davidax yanapirinakaparuw jiskt'äna: “¿Saúl reyin wila masinakapat maynis jakaskiti, nayan Jonatanat amtasisa yanapt'añaxataki?” sasa.

2Saúl reyin utapan yanapasir mä uywataw utjäna, Sibá sutini, juparusti Davidan ukar uñstañapatakiw jawsanipxäna. Sibá jaqix Davidan nayraqatapar uñstkän ukkhasti, reyix jupar jiskt'änwa: —¿Jumax Sibätati? —sasa. Sibasti: —Jïsa, juman luqtirimätwa —sarakïnwa.

3Ukat reyix jiskt'arakïna: —¿Saúl reyin wila masinakapat maynis jakaskiti, ukhamat Diosan sutipxar kunampis nayan yanapt'añaxataki? —sasa. Sibá jaqisti ukxaruw sarakïna: —Jonatanan mä yuqapaw jakaski, jupasti purap kayut suchuptatawa —sasa. Reyix jiskt'askakïnwa:

4—¿Kawkinkisa? —sasa. Sibá jaqisti sänwa: —Amiel jaqin Maquir yuqapan utapankaskiwa, Lodebar markana —sasa.

5Ukat David reyix uka chiqat Mefi-bosetar irptayanïna;

6kunapachatix Saúl reyin allchhipa, Jonatanan Mefi-bóset yuqapax, Davidan ukar purinkän ukapachax, wali axsart'añ chuymampiw alt'asïna. Davidasti jach'at säna: —¡Mefi-bóset! —sasa. Jupasti sänwa: —Akanktwa, jach'a munañan rey —sasa.

7Davidasti sarakïnwa: —Jan axsaramti, nayax Jonatán awkimat amtasitax laykuw jumarux wali sum uñjäma. Saúl achachilaman uraqinakap taqpach kuttayxäma, jichhat uksarusti naya chikapuniw manq'äwixan manq'asirakïta —sasa.

8Mefi-bosetasti alt'asisin sarakïna: —¿Kunatarak juma jach'a reyisti, naya uywatamar khuyapayasistasti? Nayax mä jiwat anumpi sastwa —sasa.

9Ukat reyix Sibá jaqir jawsäna, jupasti nayrax Saúl reyin uywataparakïnwa, juparusti sänwa: —Nayra uywiriman allchhiparux, kunatix jupankki, ukhamaraki wila masipankki taqi ukanak katuyxta.

10Ukhamasti, jumampi, wawanakamampi, uywatanakamampix jupatakiw jichhax yapucharapipxäta, kunatix achkani ukanaksti sum imarapipxäta, ukhamat uywiriman utapan manq'ax jan pist'añapataki, Mefi-bóset allchhipax nayamp chika manq'äwixan manq'kchini ukasa —sasa.

11Sibá jaqix tunka phisqan yuqani, pä tunka uywatanïnwa, reyirusti akham säna: —Reyixay, taqi kuntix siskista ukarjamaw naya uywatamax phuqhä —sasa. Mefi-bosetasti Davidan manq'äwipatpun manq'asïna, reyin mayni wawapäkaspas ukhama.

12Ukhamarus jupax mä jisk'a yuqall wawanïnwa, Micaías sata; Sibá jaqin utapan jakirinakasti, Mefi-bosetampiru, jupan jisk'a wawapampiruw luqtapxäna.

13Ukampis Mefi-bosetax purap kayut suchütap laykux Jerusalenan jakäna, David reyimpipuniw manq'asirakïna.

← Chapter 8 Chapter 10 →