2 Samuel 21

aymara-1997

1Davidan urunakapan mä jach'a mach'aw utjäna, ukasti kimsa maränwa. Ukat Davidax Tatitur jiskt'asïna, Tatitusti jupar sänwa: “Aka mach'ax Saúl reyin juchanakap layku, wila masinakapan juchanakap laykuw utji, gabaonita jaqinakar jiwarayapxatap layku” sasa.

2Davidasti gabaonita jaqinakar jawsayasin jupanakampiw parläna. (Gabaonita jaqinakax janiw israelita jaqinakäpkänti jan ukasti amorreonakat jilt'ir mä qawqha jaqinakänwa; Josué chachan urunakapan israelitanakax jupanakampiw sumankxañatak juramento lurapxatayna. Ukampisa, Saúl reyix jupanakar tukjañpun munatayna, Israelampi, Judá jaqinakampiki taqpach uraq apnaqañapataki).

3Davidasti jupanakarux jiskt'änwa: —¿Kunarak nayasti jumanakatak luririststi? ¿Kunjämatsa jumanakar jach'a ñanqha luratat askichirista, Tatitun markapar jach'añchapxañamatakisti? —sasa.

4Gabaonita jaqinakasti ukxaruw sapxäna: —Janiw nanakax Saúl reyimpina, wila masinakapampin qullqip munapkti, janirakiw Israelan khitin jiwañapsa munapkti —sasa. Davidasti jupanakar sarakïnwa: —Ukhamax sapxitaya, ¿kunsa jumanak laykux luräxa? —sasa.

5Jupanakasti sapxarakïnwa: —Khiti jaqitix nanakar Israelan uraqipan jan jakapxañaxatak tukjañ munapkitäna, nanakar q'al chhaqtayañ amtkäna,

6uka jaqin wawanakapat paqallqunir nanakar katuyapxita, nanakasti uka wawanakaparux Guibeá chiqankir Saúl reyin markapan Tatitu nayraqatan warkkatapxä —sasa. Reyisti uka wawanakapar katuyañ iyawsänwa,

7chuymapan Mefi-bóset chachat khuyapt'ayaskchïn ukasa, Tatit nayraqatan mä juramento Jonatanampi lurapxatap layku, uka chachax Jonatanan yuqapänwa, Saúl reyin allchhiparakïnwa

8Ukampisa, reyix Aiá jaqin phuchhapa Rispá sat warmin pani yuqaparuw katuntayäna, Armoní, Mefi-bóset jupanakaru, Saúl reyitak wawachkatayna ukanakaru, ukhamaraki Saúl reyin Merab phuchhapan phisqa allchhinakapampiru, Adriel jaqitak wawachkatayna ukanakaru, uka Adriel jaqisti Meholá chiqankir Barzilai jaqin yuqapänwa.

9Ukatsti Davidax gabaonita jaqinakaruw katuyxäna, gabaonita jaqinakasti mä qulluna, Tatit nayraqatan jupanakar jaychkatapxäna. Ukhamaw paqallqunpach jiwaräna, cebada apthapi qallta urunakana.

10Ukat Aiá chachan Rispá phuchhapaxa, llakisiñat chhankha isinakampiw uchasïna, ukatsti mä qarqa pataruw winkutatäna, paqallqu jiwat janchinak jak'aru. Ukawjan qhiparäna cebada apthapiñ qallta urunakata, jallupacha qallta urunakkama; uruy arumaw uka jiwat janchinak uñjäna, janiw jamach'inaksa, pampa animalanaksa jak'aykänti.

11Davidasti kuntix Saúl reyin Rispá uñt'atapax lurkatayna uk yatisinxa,

12Saúl reyimpina, Jonatán yuqapampin ch'akhanakap aptiriw saräna, uka ch'akhanakasti Galaad uraqinkir Jabés markan utjasir jaqinakan amparapankänwa. Uka jaqinakasti Saúl reyin amayap Bet-sán plazat lunthatawayapxatayna, uka plazaruw filisteo jaqinakax kunürutix Guilboa chiqan Saúl reyir atipjapkäna ukürux amayanak warkkatapxatayna. Ukampis Jabés markankir jaqinakax, uka amayanak lunthatawayasin, markapan imt'xapxäna.

13Ukhamasti Davidax Saúl reyin ch'akhanakapampi, Jonatanan ch'akhanakapampi, ukhamaraki uka jaychkatata paqallqu jaqinakan ch'akhanakapampsa mayarukiw apthapiyxarakïna;

14ukatsti, Saúl reyin Quis sat awkipan imäwiparuw imt'ayxäna. Uka amay imäwisti Selá chiqankänwa, Benjamín uraqina. Taqi kunas David reyin arsutaparjam phuqhasipansti, Tatitux mayisitanakap ist'änwa, markarusti askinakampiw phuqt'äna.

15Filisteo jaqinakax wasitat israelitanakampi nuwasiñar mantapxäna. Ukat Davidampi jilïrinakapampix filisteonakamp nuwasir mistuwayarakïna. Davidasti wal qarjtäna,

16ukatsti Isbí-benot sat mä jach'a tansa jaqiw juparux niyapun jiwayäna. Uka jaqin lanzapax kimsa tunka kilot jilänwa, ukhamarus wak'aparux mä machaq espadampi warkkatatänwa.

17Ukatsti, Seruiá jaqin Abisai yuqapaw Davidar yanapt'ir jaläna, ukatsti uka filisteo jaqirux nuwantasin jiwayäna. Uka qhipatsti israelita jaqinakax Davidarux jan mayampis jupanak chika nuwasir sarañapatakiw arsuyapxäna, ukhamat Israelan qhanapax jan jiwt'añapataki.

18Uka qhipatsti, Gob chiqan filisteo jaqinakamp nuwasiñax utjarakïnwa. Uka nuwasïwinsti, Sibecai sat husatita jaqix Saf sat mä jach'a tansa jaqiruw jiwt'ayäna.

19Ukxarusti Gob chiqanarak filisteonakampi nuwasiñax utjarakïna, uka nuwasïwinsti Belén markan jakasir Jaaré-oreguim sat jaqin Elhanán yuqapax Gat chiqankir Goliat jaqiruw jiwt'ayäna, uka jaqin lanza katuñapasti sawuñ lawar uñtat jach'apunïnwa.

20Gat chiqansti, yaqha nuwasïwiw utjarakïna. Uka chiqansti mä jach'a tansa jaqiw utjäna, pä tunka pusin luk'ananïnwa, sapa amparan suxta luk'anani, sapa kayun suxta luk'anani, jach'a tansa jaqinakat saraqirirakïnwa,

21jupasti israelitanakarux wali axsarayäna; ukampis Davidan Simei jilapan Jonatán yuqapaw uka jaqir jiwayäna.

22Uka pusi jach'a tansa jaqinakasti Gat chiqankir Refá sat jaqin wawanakapänwa, jupanakasti taqpachaniw Davidampina, yanapirinakapampin amparapar jalt'asin jiwapxäna.

← Chapter 20 Chapter 22 →