2 Samuel 16

aymara-1997

1Davidax ukkhakiw uka qullut mä juk'amp sartaskäna, ukapachaw Mefi-bóset jaqin uywatapa, Sibá sat jaqix jupar jikxatäna, pä asno ant'ata, uka asnonakasti pä patak t'ant'ampi, waña uvanakat lurat patak tortampi, patak muxsa achunakampi, vino lip'ichi wayaqampi khumxatatänwa.

2Ukat reyix jiskt'äna: —¿Kunatakirak akanak apantasti? —sasa. Sibá jaqisti sarakïnwa: —Asnonakax reyin wila masinakapan lat'xatañapatakiwa, t'ant'anakampi, muxsa achunakampisti soldadonakan manq'añapatakiwa, vinosti wasaran qaripkani ukanakan umt'añapatakiwa —sasa.

3Reyisti jiskt'änwa: —¿Kawkinkarak uywiriman allchhipasti? —sasa. Sibá jaqisti ukxaruw säna: —Jerusalén markankaskiwa, jupasti siwa: “Israelitanakax achachilaxarux reyi qunuñap kuttayxapxaniwa” —sasa.

4David reyisti Sibá jaqirux sänwa: —Jichhürut uksarux, taqi kunatix Mefi-bosetankkän ukanakax jumankxiwa. Nayaw chursma —sasa. Sibasti reyi nayraqatan alt'asisaw sarakïna: —Khuyapayasiñam nayax wiñayas jikxatakirista —sasa.

5David reyix Bahurim chiqar purkän ukapachasti, Saúl reyin wila masinakapat mayni jaqiw ukat mistunïna. Jupasti Guerá jaqin Simí sat yuqapänwa, uka jaqisti kunayman jan wali arunakampiw Davidarux arnaqäna,

6Davidarusa, jilïr yanapirinakaparus qalampiw jaqunirakïna; reyix jaqinakapampi muyuntatäkchïn ukasa,

7Simí jaqix kunayman arunakampiw Davidar ñanqhachäna: —¡Akat saram, jaqi jiwayir ñanqha jaqi!

8¡Tatituw jumarux mutuyasktam Saúl reyin wila masinakapar jiwarayatamata, jupa lanti marka apnaqañ munatam layku! ¡Jichhasti Tatitux Absalón wawamaruw markar apnaqañam katuyxi, juman pachpa ñanqha luratamatjamaw t'aqhisiskaraktaxa, jaqi jiwayirïtam layku! —sasa.

9Ukatsti Seruiá jaqin Abisai yuqapax reyir sarakïnwa: —¿Kamisarak aka jiwat anusti reyir ukham ñanqhachxanisti? ¡Jichhpachaw p'iqi apaqä! —sasa.

10Reyisti sänwa: —Seruiá jaqin yuqanakapa, janiw jumanakan kuna lurañanakamas utjkiti. Ñanqhachaskitpan, Tatituw juparux ukham sispacha. Ukhamächi ukasti, ¿khitiraki: kunats ukham lurta saspasti? —sasa.

11Ukxarusti Davidax Abisai jaqimpiru, taqi yanapirinakapampiruw sarakïna: —Nayan pachpa wawaxaw jiwayañsa munitu, ¡ukat juk'amp Benjamín ayllunkir jaqix jiwayañ munpachïtu! ¡Jupax ñanqhachaskakitpan sapxam, Tatituw juparux ukham luram sispacha!

12Inas Tatitux nayaru llakt'ata, t'aqhisiri uñjitani ukapachax, jichhür ñanqhachäwinak katuqataxat, askinak apayanchitani —sasa.

13Ukhamasti Davidampi jaqinakapampix thakhip sarasipkakïnwa, ukampis Simí jaqix, Davidat mayskatan qullu irananjam sarawayxäna, ñanqhachasa, qalanakamp jaqt'asa, laq'sa sartayasaraki.

14Reyimpi, jupamp chika saririnakasti Jordán jawir jak'ar purisax, wali qariratäxapxänwa, ukat uka chiqar samart'apxäna.

15Ukchañkamasti, Absalonax Jerusalén markaruw mantaskäna, taqi israelita jaqinakampi, Ahitófel jaqimp chika.

16Ukatsti Davidan jilat masipa, Husai sat arquita jaqix, art'asisaw Absalonar jikxatir saräna: —¡Jallalla rey! ¡Jallalla rey! —sasa.

17Ukat Absalonax jupar jiskt'äna: —¿Kunatarak jilatamamp chika jan sartasti? ¿Kunjäm jilat masirakïtasti? —sasa.

18Husai jaqisti ukxaruw säna: —Janiw nayax sarkiristti, nayax khitirutix Tatitux ukhamaraki israelita markas ajlliski ukampïñaxawa, jupampi qhiparañaxarakiwa.

19¿Nayasti juma reyit juk'ampi, khitirurak luqtiriststi? Nayax kamisatix nayrax awkimar luqtkäyäta ukhamarak jumar luqtäma —sasa.

20Ukat qhiparusti Absalonax Ahitofelaruw jiskt'arakïna: —¿Kuns jumanakax amuyt'apxta? ¿Kun lurañasas wakisi? —sasa.

21Ahitofelasti ukxaruw Absalonar säna: —Awkiman uñt'at warminakapamp ikintasim, reyi uta uñjir jaytawayki ukanakampi, ukhamat Israel markan jaqinakax awkimar uñisitam amuyapxani, ukatsti jumar arkirinakax juk'amp ch'amañchasini —sasa.

22Ukat Absalonatakix uta patar mä carpa lurt'arapipxäna, ukan Absalonax awkipan uñt'at warminakapamp ikintasïna; taqpach israelita jaqinakan uñjkaña.

23Uka urunakanxa, Ahitófel jaqimpi iwxt'ayasiñax, pachpa Tatitun arsutapäkaspas ukhamänwa. Ahitofelax wali yäqat jaqïnwa, Davidatakisa, Absalonatakis ukhamarakïnwa.

← Chapter 15 Chapter 17 →