2 Samuel 14

aymara-1997

1Seruiá chachan Joab yuqapax, David reyin Absalón yuqapat llakisitap yatïna,

2ukhamasti, Tecoa markat mä sallqjir warmi irptayanïna. Ukat jupar sarakïna: “Jumax wali llakt'atäkasmas ukhamaw tuküta, llaki isimpi uchasim; janiw kuna q'apkir qullanaksa uskusïtati, walja urunak ukham llakit sarnaqkasma, wawamas jiwkaspa ukhamaw tuküta.

3Ukatsti reyin nayraqataparuw uñstäta, kuntix nayax siskäma uka arunakxa, ukhampach jupar säta” sasa. Joab chachasti kuntix warmix arsuñapäki uk yaticht'äna,

4ukat Tecoankir warmix reyin ukar saräna, p'iqipa uraqkam alt'asinsti axsartañ chuymampiw reyir sarakïna: —¡Yanapt'itay jach'a munañan rey! —sasa.

5Reyisti jiskt'änwa: —¿Kunarak kamachtamsti? —sasa. Warmisti ukxaruw säna: —¡Nayax ijma warmïtwa, chachaxax jiwxiwa!

6Pani wawanïyätwa, jupanakasti pampan nuwasipxatayna, janirakiw khiti jaljtayiris jupanakar utjkataynati, ukat maynïrix jilapar jiwayatayna.

7Jichhasti wila masinakaxax taqiniw nayatak sartapxi. Jilapar jiwaykatayna ukar nayan katuyañax munapxaraki, ukhamat jiwayatapat phuqsusiñataki, ¡jan wawani qhiparirista ukasa, janiw jupanakax nayat khuyapt'ayasipkitaspati! Uka wawaxarutix jiwayapxaspaxa, nayax sapakiw qhiparxirista, chachaxan sutipasti wiñayatakiw chhaqtxaspa —sasa.

8Ukat reyix uka warmir säna: —Utamar kutt'xam, nayaw jumar arxatäma —sasa.

9Warmisti sarakïnwa: —Reyixay, maynin aka jucha apañapatix wakischi ukaxa, nayampiru, awkixan wila masinakapampiruw wakt'askañapa, janiw juma jach'a reyirusa, marka apnaqäwimarusa kunat phuqhañapas wakt'añapäkiti —sasa.

10Reyisti sarakïnwa: —Khititix jumar axsaraykätam ukarux nayan ukaruw irpanïta, ukatsti janiw juk'ampsa jumar parlxaykxätamti —sasa.

11Ukampis warmix saskakïnwa: —Reyixay, achikt'asïma, Tatit Diosamaruy mayirapita, khiti wila masixatix mayni wawaxan jiwatapat phuqsusiñ amtki ukax, aka wawaxar jan jiwayañapataki —sasa. Reyisti sarakïnwa: —¡Tatitun sutipxaruw arsurapsma, janiw wawamarux kunas kamachkaniti, janirakiw mä ñik'utapas uraqirux jalaqtkaniti —sasa.

12Warmisti saskakïnwa: —Reyixay, mä arumpi arst'asiñax munakimaya —sasa. —Arst'asiskakim —sasaw reyix sarakïna.

13Ukat warmix jiskt'äna: —¿Kunatarak Tatitun markapar uka kipka lurañ muntasti? Juma reyin amuyt'ampi arsutamarjamax, jayan apanukut wawamar jan kuttaniñapatak, jumas juchanïkasma ukhamawa.

14Chiqpachansa taqiniw jiwañäni, uraqir wartat umar uñtatätanwa, uka umasti janiw apthapiñjamäkiti. Ukampisa, Diosax janiw khitirus jakañap apaqkiti, jan ukasti Diosax kunayman tuqit amuyt'ayi jaqunukut jaqin jupat jayan jan jakañapataki.

15Nayatix juma jach'a reyir akanak sañatak jutsta ukaxa, jaqin nayar jan walinak lurañ munatapat axsarayasitax laykuwa. Reyixay, nayan mayitaxar ist'añam yatipunïyätwa,

16ukat nayampiru, jiwayañ munapki uka wawaxampirus qhispiyañama.

17Arunakamampi chuymachat jikxatasiñsa yatirakïyätwa, juma reyisti, Diosan angelapjamätawa, taqi kunsa chiqaparupuniw uñjtaxa. ¡Tatitu Diosay jumar aski waxt'äwipamp phuqt'pan! —sasa.

18Reyisti warmirux sänwa: —May jiskt'äma, chiqap arsutäta, janiw kunsa imt'itätati —sasa. Warmisti sarakïnwa: —Reyixay, arsuskakim —sasa.

19Ukat reyix jiskt'äna: —¿Janit taqi akanak Joab chachax lurañamatak amtayktam? —sasa. Warmisti sarakïnwa: —Juma reyin sutimxaruw arsta, ukhamäskapuniwa. Chiqpachansa, Joab yanapirimaw nayarux akar khithanitu, juparakiw kunatix parlañaxäki uksa yatichitu.

20Jupasti suma amtäwimpiw ak luri. Ukampis juma reyix wali amuyt'anïtawa, taqi kunanakatix aka markan luraski ukanaksa Diosan mä angelapjamaw yatiraktaxa —sasa.

21Uka qhipatsti, reyix Joab chachar jawsayasin sarakïna: —Ist'ita, aka jan walt'äwix askichatäxiwa. Saramaya, Absalón waynar kuttayanxam —sasa.

22Joab chachasti uraqkam p'iqip alt'asin axsarañ chuymampiw reyir yuspagaräna, ukat sarakïna: —Jichhüruw nayax yatista, juma reyin nayar munasitama, jumasti nayan mayisitaxarjamaw lurtaxa —sasa.

23Ukatsti ukspachaw Joab chachax Guesur markar saräna, ukatsti Absalonampiw Jerusalén markar kuttanxäna.

24Ukampis reyix akham säna: “Utapar sarxpan, jan jak'itpati” sasa. Absalonasti utapar chiqakiw sarxäna, reyir jan uñstasa.

25Taqpach Israel markan janiw Absalonjam wali suma uñnaqt'ani chachax utjkänti; ukham wali suma waynätapatsti wali jach'añchatarakïnwa; kayut p'iqikamax janiw kuna jan walis jupan utjkänti.

26Ñik'utapan sinti jach'äxatapatsti, sapa mara tukuyaw mururasirïna, muruqat ñik'utapasti pä kilo jilänwa.

27Absalonax kimsa yuqall wawani, mä imill wawanïnwa, phuchhapax Tamar sutinïnwa, jupasti wali suma uñnaqt'an tawaqünwa.

28Absalonax pä maraw Jerusalén markan utjasxäna, ukampis uka maranakan janiw kunapachas reyin nayraqatapar uñstkänti.

29Mä urusti, Absalonax Joab chacharuw mayïna reyin ukar sart'arapiñapataki, Joab chachasti janiw reyin ukar sarañ munkänti. Mä kutimpsa Absalonax reyin ukar sarañapatak achikt'asiskakïnwa, ukampis Joab chachax janiw sarañ munkänti.

30Ukat Absalonax uywatanakapar säna: —Ist'apxita, Joab chachan yapunakapax nayan yapunakax jak'ankiwa, cebada yapuchatkamakiwa. ¡Sarapxam, ninamp phichhantanipxam! —sasa. Absalonan uywatanakapasti sarasin Joab chachan yapunakap ninampiw phichhantanipxäna.

31Joab chachasti jank'akiw Absalonan ukar sarasin jupar jiskt'arakïna: —¿Kunatarak uywatanakamasti yapunakaxar ninamp phichhantanipxisti? —sasa.

32Absalonasti ukxaruw säna: —Nayax reyin ukar nayatak sart'añamatakiw jawsaysma, ukatsti jupar sañamataki: “¿Kunatakirak Guesur markat jutataxasti walisti? Ukankañaxax walikiskasapänwa; nayax reyiruw uñjañ munta; kuna juchaxas utjchi ukasti, jiwayapxitpan” —sasa.

33Ukat Joab chachax reyin ukar saräna, Absalonax siskatayna uk jupar yatiyarakïna, reyisti Absalonar jawsayanïnwa. Absalonasti reyin nayraqatapar purisax uraqkamaw p'iqipa alt'asïna. Reyisti jamp'att'asaw katuqarakïna.

← Chapter 13 Chapter 15 →