2 Kings 9

aymara-1997

1Mä urusti, Eliseo profetax profetanakan tamapat maynïriruw jawsäna, juparusti akham säna: —Sarañatak wakt'ayasim. Aceiten wayucha apxarusiwayam, ukatsti Galaadankir Ramot chiqar saram;

2uka markar purisinsti, Josafat chachan Jehú sat yuqaparuw thaqtäta, Nimsí chachan allchhiparu. Jupan ukaru mantasinxa, masinakap jak'at irpaqasin yaqha utaruw irpäta;

3ukatsti aceite wayuch katusin p'iqipxaruw warxatäta, akham sasa: Tatitux akham siwa: “Nayaw Israelan reyipat utt'aysma” sasa. Ukatsti punku jist'arasin jan sayt'asaw jaltxäta —sasa.

4Uka wayna profetasti Galaadankir Ramot chiqaruw saräna;

5ukar purisinsti ejerciton jilïrinakapar tantachatäskir jikxatäna. Ukat jupax säna: —Capitanaxar may yatiyañaxaw utjitu —sasa. Jehú capitanasti ukxaruw säna: —Taqi nanakat ¿khitirusa? —sasa. Profetasti sänwa: —Juma capitanaxaruwa —sasa.

6Ukspachaw Jehú capitanax sartasisin utar mantäna. Ukat profetax jupan p'iqipxar aceitempi warxatäna, akham yatiyasa: —Israelan Tatit Diosapax siwa: “Nayaw Israel markaxan reyipat utt'aysma.

7Jumaw Ahab uywiriman saraqir wawanakaparux tukjäta, ukhamat Jezabel warmin wila wartatanakapat phuqsüta; profetanakaxana, taqpach luqtirinakaxan wila wartatapata.

8Ahab reyin wila masinakapax taqiniw tukjat uñjasini; Israelan jakir yuqall wawanakaparux jan mayan tukjä, janiw khitis qhispkaniti.

9Ahab chachat saraqirinakampix, kamisatix Nabat chachan Jeroboam yuqapan saraqirinakapamp lurkta, ukham lurä, Ahías chachan Baasá yuqapampisa ukham lurarakï.

10Jezabel warmirusti, Jezreel pampanakan anunakaw janchip manq'ani, janiw khitis jupar imt'irix utjkaniti” —sasa. Ukham sasin, profetax punku jist'aras jaltawayxäna.

11Ukatsti kunapachatix Jehú chachax reyin yanapirinakapan ukar kuttkäna ukkhasti, jupanakat mayniw jiskt'äna: —¿Kunas kamachi? ¿Kunarurak uka luqhi jaqisti juman ukar jutataynasti? —sasa. Ukxaruw Jehú capitanax säna: —Jumanakax jupar uñt'apxtawa, kunjäm parlirïtapsa yatipxaraktawa —sasa.

12Jupanakasti ukxaruw sapxäna: —Janiw ukax chiqäkiti. ¡Jichhax taqi yatiyapxita! —sasa. Ukxaruw Jehú capitanax jupanakar säna: —Jupax akham situ: “Tatitux akham siwa: ‘Nayaw Israel markan reyipat utt'aysma’ ” —sasa.

13Ukatsti jupanakat sapa mayniw isinakap apaqasisin kayup nayraqataru jant'akupxäna. Ukatsti trompeta phust'apxäna, art'asipxarakïnwa: “¡Jallalla, Jehú reyi!” sasa.

14Josafat chachan Jehú yuqapaw Joram reyitak sayt'asïna, jupasti Nimsí chachan allchhipänwa. Joram reyix Israelankir taqpach reyinakapampiw Galaadankir Ramot chiqat tuwaqasisa nuwasisipkäna, Siria markankir Hazael reyin katuntir jutatapata,

15Joram reyix Jezreel chiqaruw kutt'awayxatayna, usuchjatanakapa qullxatayasiñataki, juparux sirio jaqinakawa Hazael reyimpi nuwasïwina lurapxatayna. Ukat Jehú capitanax masinakapar säna: “Jumanakatix chiqpachan nayan reyïñaxa munapxstaxa, jan khitirus markat mistuyapxamti, Jezreel markar sarasin yatiyaniskañapataki” sasa.

16Ukatsti nuwasiñ carropar sarxatawayasin Jezreel markaruw saräna, kawkintix Joram reyix ikiñankaskäna ukaru. Judá marka apnaqir Ocozías reyis, Joram reyir tumpt'irix sararakitaynawa.

17Jezreel markan pukarapat uñch'ukir jaqisti, Jehú capitanan tamapar jak'achasinir uñjasinxa, jach'at art'äna: —¡Jaqinakaw juti! —sasa. Ukat Joram reyix säna: —Uka jaqinakar jikxatir caballot mä chachar khithapxam, jupanakax sumankañampiti jutapxi, janicha uk jiskt'aniñapataki —sasa.

18Caballot sarki uka chachasti Jehú capitanar jikxatasin säna: —Reyix jumanakar jiskt'iriw khithanitu, ¿sumankañ amtampit jutapxta? —sasa. Jehú capitanasti sänwa: —Kuna lurañamas juman utji. ¡Uka qhipäxar sayt'asim! —sasa. Pukaran uñch'ukir jaqisti uk yatiyäna, akham sasa: Khithat jaqix jupanakan ukarux puriwa, ukampis janiw kutt'ankxiti —sasa.

19Ukhamasti reyix yaqha chacharuw caballot khitharakïna, uka chachasti jupanakan ukar purisax sänwa: —Reyiw jumanakar jiskt'iri khithanitu: ¿sumankañ amtampit jutapxta? —sasa. Ukxaruw Jehú chachax säna: —Kuna lurañamas juman utji. ¡Uka qhipäxar sayt'asim! —sasa.

20Uñch'ukiristi wasitat yatiyäna: —Maynïrix jupanakan ukar purirakiwa, ukampis janiw kutt'ankxiti. Khititix carro apnaqki ukax Jehú capitanjamakiwa, jupasti luqhir uñtataw carrorux jalayani —sasa.

21Ukat Joram reyix säna: —¡Nuwasïwir sarañ carroxa wakicharapipxita! —sasa. Jupanakasti carrop wakicharapipxäna, ukatsti Israelan Joram reyimpi, Judá markan Ocozías reyimpix, Jehú capitanar jikxatiriw mistuwayapxäna, sapa maynis nuwasïwir sarañ carropankama. Jupanakasti Jezreelankir Nabot chachan uraqipan Jehú chacharux jikxatapxäna.

22Joram reyisti Jehú capitanar uñjasinxa, sänwa: —Jehú, ¿jumax sumankañ amtampit jutta? —sasa. Jehú chachax ukxaruw säna: —¿Kuna sumankañarak jumamp utjaspa, Jezabel taykaman idolonakar yupaychkipana, layqasiñanakapamp sarnaqaskakipansti? —sasa.

23Ukat ukspachaw Joram reyix carrop kutikipstayasin jaltxäna, Ocozías reyir jach'at art'arakïna: —¡Ocozías, sallqjataw uñjastan! —sasa.

24Ukampis Jehú capitanax taqi ch'amapampi mich'i antutt'añap jiyt'asinxa, Joram reyirux jikhanïxat wakt'ayäna, mich'isti chuymap chiq mistüna, Joram reyisti pachpa carropxan jiwataw liwitattäna.

25Ukatsti Jehú capitanax Bidcar sat yanapiriparuw säna: —Joraman amayap ukat apsusin Jezreelankir Nabot chachan uraqipar liwtanim, nayax amtasktwa kunapachatix jumampi nayampi Ahab awkipan nuwasiñ carronakapa apkäyätan ukkhaxa, Tatitux aka juchañchäwi arunak jupatak arsüna:

26“Kamisatix masürux, Nabot chachampina, wawanakapampin wilapa uñjtxa, ukhamarakiw luratamatjam aka pachpa uraqin mutuyäma. Naya, Tatituw uk arsta” sasa. Ukhamasti, aptawayasin Nabot chachan uraqipar liwtanim, kunjämtix Tatitux arskäna ukhamarjama.

27Judá markankir Ocozías reyisti ukham uñjasinxa, Bet-hagan tuqiruw jaltxäna. Ukampis Jehú chachax jupar arktänwa, soldadonakaparusti sänwa: —¡Juparus jiwayapxarakim! —sasa. Ocozías reyisti carropat Gur sat irananjam makhataskäna, Ibleam sat jak'ana, ukaruw Jehú capitanan soldadonakapax jupar usuchjapxäna, ukampis Ocoziasax Meguido sat chiqakamaw jaltxäna, ukan jupax usuchjatätap layku jiwxäna.

28Ukatsti uywatanakapaw mä carrot Jerusalenkam apxapxäna, ukatsti Davidan Markapan imt'xapxäna, nayra awkinakapan amay imäwiparu.

29Kunapachatix Ahab chachan Joram yuqapax tunka mayan mara Israel marka apnaqaskän ukkhaw Ocozías chachax Judá marka apnaqañ qalltatayna.

30Jehú capitanax Jezreel chiqaruw sarxäna. Uk yatisinsti, Jezabel warmix nayranakap samichasïna, ñik'utanakapsa k'achachasirakïnwa, ukatsti mä ventanaruw jak'achasïna.

31Jehú chachax marka mantañ punkur puriskän ukkhasti, Jezabel warmix jupar sänwa: —¿Kunjämäsktasa, reyimar jiwayir Zimrí jaqjamätati? —sasa.

32Jehú capitanasti ventanar uñtasin säna: —¿Khitis nayampixa? —sasa. Ukatxa reyi utankir mä paya, jan ukax, kimsa yanapirinakaw jupar uñjir jak'achasinipxäna.

33Jehú capitanasti jupanakarux sänwa: —¡Uka warmir jaquqanipxam! —sasa. Jupanakasti uka warmirux ventanat jaquqanipxäna, warmin wilapasti pirqampir caballonakampiruw ch'itiqkatäna, uka caballonakasti Jezabel warmin janchip takichasipxarakïna.

34Ukatsti Jehú capitanax manq'iri, umiriw sarxäna. Ukat jayp'urusti Jehú capitanax sänwa: —Uka ñanqha warmir uñjanipxam, ukatsti imt'anxapxam; jupax ukhamarus mä reyin phuchhaparakïnwa, uka layku —sasa.

35Ukampis kunapachatix uka warmir imt'iri sarapkän ukkhasti, p'iqi ch'akhapampi, kayu ch'akhanakapampi, ampar ch'akhanakapampik jikxatxapxäna.

36Ukat Jehú capitanar yatiyir kuttanipxäna, Jehú capitanasti sänwa: —Tatitux Tisbé chiqankir Elías profeta luqtirip tuqiw satayna: “Jezreel uraqin anunakaw Jezabel warmin janchip manq'apxani;

37amayapasti Jezreel uraqin wanur uñtat willjatäniwa, ch'akhanakapas jan khitinsa uñt'kayäniwa” —sasa.

← Chapter 8 Chapter 10 →