2 Kings 7

aymara-1997

1Eliseosti ukxarux sänwa: —Tatitun arup ist'am. Tatitux akham siwa: “Qharür aka pachax, Samaria markar mantañan alasiñax utjani, paqallq kilo jak'usa, jan ukax, tunka phisqan kilo cebadas mä sapa qullqirukiw aljasini” —sasa.

2Reyin yanapiripasti ukxaruw profetar säna: —Tatitux alaxpachat ventananak jist'arankaspa ukasa, janiw kuntix sisktas ukax luraskaspati —sasa. Ukampis Eliseox saskakïnwa: —Jumax pachpa nayranakamampiw uñjäta, ukampis janiw uk manq'kätati —sasa.

3Ukchañkamasti, marka mantañ punkun, lepra usuni pusi chachaw jupanakkam parlasipxäna akham sasa: ¿Kunatarak jiwasanakasti jiwañkam akankasipkañänisti?

4Markar mantañatakitix amtañänixa, jiwañäniwa, uka manqhin janiw kunas manq'añatak utjkiti; aka chiqantix qunt'at qhiparañänixa, jiwarakiñäniwa. Mäpit sirionakan utjnuqäwipar sarañäni, jan jiwaykistanixa jakaskañäniwa; qhanaw jiwayxistani, kunjämatsa jiwxakipuniñäniwa —sasa.

5Ukhamaw jupanakax arumthapir sartawayasin sirionakan utjnuqäwipar sarapxäna; jak'ankxasasti, jan khitis ukankatap amuyasipxäna.

6Tatituw Siria markan ejercitopar ist'ayatayna, nuwasïwir sarañ carronakana, caballerianakan uxutanakapa, ukhamarak mä jach'a ejerciton jalatanakapa, ukat sirionakax amuyapxatayna, Israel reyisa mink'askaspa jupanakar hitita reyinakampi, egipcio reyinakamp katuntayañataki.

7Ukat jupanakax arumthapir sartasin jaltxapxatayna, chhujllanakap apanukusa, caballonakapa, asnonakap jaytanukusa, jakañap qhispiyasiñ layku, utjnuqäwinakapsa, kunjamäkäntix ukhampach apanukuwayapxatayna.

8Lepra usun jaqinakasti sirio utjnuqäwi thiyar purisinxa, mä chhujllaruw mantapxäna, ukan manq'apxäna, umapxarakïna; ukatsti qullqimpi, qurimpi, isinakamp katuntasipxäna, ukatsti sarasin ukanak taqpach imantanipxäna. Ukat kutt'anisinsti yaqha chhujllarurakiw mantapxäna, uka chhujllat ukhamarakiw yänak apsuwayasin imantanipxäna.

9Ukampis ukatxa, jupanakkamaw parlasipxäna, akham sasa: —Janiw wal lurktanti. Jichhürux suma yatiyäwi churañ uruwa. Jiwasatix amukïñänixa, qharürkamarak suyaskañänixa, juchañchataw uñjasiñäni. Jichhpach reyin utapar yatiyir sarapxañäni —sasa.

10Ukhamasti, jupanakax sarasin, markan uñjirinakaparuw jawsapxi, ukat jupanakar sapxi: —Sirionakan campamentoparuw sarapxta, ukansti janipuniw khitis utjkataynati, janiw khitin parlatapas ist'askiti. Caballonakampi, asnonakampikiw chint'at ukankasipkäna, chhujllanakapas jichha lurt'atäkaspas ukhampachäskänwa —sasa.

11Markar mantañ punku uñjirinakasti, ukspachaw reyin wila masinakapar jawsanipxäna.

12Reyisti arumäkchïn ukasa, sartasïnwa, ukat yanapirinakapar säna: —Kuntix sirionakax jiwasar lurañ munkistu uk jumanakar qhanañchapxäma. Jupanakax manq'at t'aqhisitasxa yatipxiwa, ukatsti campamentopat mistusinxa pampan imantasipxi. Jupanakax jiwasan mistuñas munapxi, jakkirpach jiwasar katuntañataki, ukhamat markasar mantantaniñataki —sasa.

13Reyin yanapirinakapat maynïriw säna: —Jilt'kistu uka phisqa caballonakat mä qawqha chachanak sarapxpan, kunas kamachatayna uk yatxatiri. Jupanakax jakapxanisa, jiwapxanisa, janiw ukampix jupanakan jakañanakapax juk'amp sumäkaniti; akan qhiparañasa, khayar sarañas pachpakiwa: taqiniw jiwañäni —sasa.

14Ukhamasti reyix sirionakan campamentoparuw jaqinak khithäna, kunas kamachatayna ukanak yatxatayiri.

15Jupanakasti Jordán jawirar puriñkamaw sirionakan qhipapat arktapxäna, thakhinsti isinaka, yänaka uñjapxäna, sirionakaw mäki jaltxañ layku willtawayapxatayna. Ukatsti reyin khithatanakapax kutt'anxasin kuntix uñjanipkatayna ukanak reyir yatiyxapxäna.

16Markachirinakasti ukspachaw mistuwayapxäna, ukatsti sirionakan campamentopat yänak q'ipsunipxäna. Ukatsti kunjämtix Tatitux yatiykatayna ukhamarjamaw paqallq kilo jak'umpi, tunka phisqan kilo cebadampix mä qullqiruki aljasïna.

17Reyix jupan yanapiriparuw marka mantañ punku uñjañapatak satayna, ukampis jaqinakax mantañ punkun juparux takisiwayapxäna ukat uka jaqix jiwxäna, kunjämtix Eliseo profetax siskatayna, kunapachatix reyix jupar uñjir sarkatayna ukapacha.

18Ukhamaw phuqhasïna kuntix profetax reyir yatiykatayna ukaxa, akham sasa: “Qharür akapachaxa, Samaria markar mantañanxa, paqallqu kilo jak'usa, tunka phisqan kilo cebadas mä sapa qullqirukiw aljasini” sasa.

19Reyin yanapiripasti profetarux sataynawa: “Tatitux alaxpacha ventananaksa jist'arasinkpan, janiw ukax luraskaspati” sasa. Eliseosti ukxaruw jupar satayna: “Jumax pachpa nayranakamampiw uñjäta, ukampis janiw uk manq'kätati” sasa.

20Ukasti ukhamapuniw lurasïna, markar mantañ punkun jaqinakax jupar tinkuyas takisipxatayna, ukat jupax jiwxäna.

← Chapter 6 Chapter 8 →