2 Kings 5

aymara-1997

1Mä chachaw utjäna Naamán sutini, jupasti Siria marka apnaqir reyin ejercitopan jilïripänwa, ukhamarus wali aytat jaqirakïnwa, reyisti juparux wal munasïna, jupa tuqiw Tatitux Siria markar atipjayatayna. Ukampis uka chachax lepra usunïnwa.

2Mä kutix, Siria markankir soldadonakax israelitanakan uraqiparuw mantantapxäna, ukapachasti mä israelita imill wawaruw katuntawayapxäna, uka imill wawarusti Naamán jilïrin utaparuw irpapxäna, warmipar yanapiritaki.

3Uka imill wawasti uywiriparuw säna: —Uywirixatix Samaria markan jakir profetan ukar saraspaxa, lepra usupat q'umachasxaspawa —sasa.

4Naamán jilïristi uk yatisax, reyin ukaruw saräna, ukatsti kuntix uka imill wawax siskatayna uk yatiyarakïna.

5Siria marka apnaqir reyisti ukxaruw säna: —Walikiwa, jichhpach Samariar saram, nayasti Israelan reyipatak mä qillqat apayäma —sasa. Ukat Naamanax mistuwayxäna. Jupasti kimsa tunka waranqa qullqimpi, suxta waranqa qurit lurat qullqimpi, tunka isimpi apxarusiwayäna;

6Israelan reyipatakisti uka qillqat aparakïna, qillqatasti akham sänwa: “Aka qillqat katuqasax yatïtawa, ejercitoxan Naamán jilïripar nayan jupar khithanitaxa, jupar lepra usupat qullañamataki” sasa.

7Israel marka apnaqir reyisti qillqat ullarasax, llakisiñat isip ch'iyanuqasïna, ukat sarakïna: —¿Nayasti jakañ churiri, jakañ apaqir Diosätti, jupan aka chachar lepra usupat qullañaxataki khithaniñapatakisti? ¡Sum amuyapxam, uñjapxarakim, nayatak jan walt'añ thaqhatapa! —sasa.

8Eliseo profetasti reyin uka qillqat katuqasin isip ch'iyanuqasitap yatisinxa, mayniruw reyir sañapatak khithäna: “¿Kunatarak isim ch'iyanuqastasti? Uka chachax nayan ukar jutpan, ukhamat yatini, Israel markan mä profetan utjatapa” sasa.

9Naamanasti carropampi, caballonakapampiw saräna, ukatsti Eliseon utap punkuruw sayt'äna.

10Ukampis Eliseox mä jaqiruw jupar sañapatak khithäna: “Jordán jawirar saram, ukatsti paqallq kuti jariqasim, janchimasti q'umachatäxaniwa” sasa.

11Naamanasti uk ist'asax wal thithïna, ukatsti akham sasaw sarawayxäna: —Nayax, “nayar katuqirix mistunchinïy sayätwa, ukatsti Tatit Diosaparuy art'chini, amparapampi janchixar luqxatasin lepra usut qullchitani” sasa.

12¿Janiti Damasconkir Abaná, Farfar jawiranakasti juk'ampi suma jawiranakäki, Israelan taqi jawiranakapat sipansa? ¿Janit nayasti q'umachatäñatak uka jawiranakan jariqaskiriskäyätsti? —sasa. Jupasti wali thithitaw uka chiqat sarawayxäna.

13Ukampis uywatanakapax jupar jak'achasisin sapxäna: —Tata, profetatix mä kuna ch'ama lurañamatak siriskäyätam ukasti, ¿janit lurkasamänsti? Ukhamasti, k'umarachasiñatak Jordán jawiran jarisiñ jupar jaysakisamäna —sasa.

14Naamán chachasti Jordán jawirar sarasin paqallq kutiw umar mantäna, profetax siskatayna ukhamarjama, ukatsti janchipax mä wawan janchipjamaw tukuwayxäna, q'umachatäxarakïnwa.

15Ukat jupampi, jupa chik jutirinakampisa, Eliseon ukaruw sarapxäna. Jupan ukar purisinsti, Naamanax sänwa: —¡Jichhax yatxtwa, taqi uraqpachan janiw Israelan Diosapjam yaqhax utjkiti! Jichhasti achikt'asïma, mä churäwiy naya, luqtirimat katuqt'asita —sasa.

16Ukxaruw Eliseox säna: —Nayax Tatit laykuw juramento lurta, jupax uñch'ukisinkituwa, janiw ukxa katuqkirismati —sasa. Naamanax churañ munaskakïnwa, Eliseosti janiw katuqasiñ munkänti.

17Ukat Naamanax säna: —Ukhamax pä mular khumxatkir aka uraqit laq'a apañatak jaysita; jichhürut uksarux naya, luqtirimax janiw juk'amp yaqha diosanakar nakt'ayat luqtäwinakampi, wilañchanakampsa luqtkxäti, jan ukasti Tatitu saparukiw luqtä.

18Ukampis nayax Tatituruw achikt'asta, lurkä ukat nayar pampachañapataki: kunapachatix reyixax Rimón sat diosan templopar yupaychir sarkani, ukatsti amparaxar katt'askani, nayasti uka templon killt'asiñaxäkani ukkhaxa, Tatitux uka lurataxat pampachitpan —sasa.

19Eliseosti sänwa: —Jan kuna llakinik sarxam —sasa. Naamanasti uka chiqat sarawayxänwa. Niya jaypach sarxatayna ukkhawa,

20Eliseo profetan Guehazí uywatapax akham lup'isïna: “Uywirixax Naamán sirio jaqirux sarayxakiwa, kuntix apankatayna uksa janiw katuqaskiti. Tatit laykuw juramento lurta, nayax jupar jikxatiriw jalawayä, inach kuns churitani” sasa.

21Ukat Guehazí uywatax Naamanar jikxatir saräna. Naamanasti Guehazí uywatar qhipapat jalanir uñjasaxa, carropat saraqasin jupar jiskt'äna: —¿Kuna jan walt'añach utjixa? —sasa.

22Guehazí uywatasti ukxaruw säna: —Janiw kunasa. Ukampis uywirixaw jumar sañatak khithanitu: Pä wayna profetanakaw Efraín qullunakat jichhak purinipxi, ukatsti jupanakar kimsa waranqa qullqi churañamatakiw achikt'astam, ukhamarak pä machaq isinakampi —sasa.

23Naamán jilïristi ukxaruw säna: —Suxta waranqa qullqi katuqt'asita —sasa. Naamanasti katuqt'asiñapatak saskakïnwa, ukatsti pä wayaqaruw ucharapïna, pä machaq isimp chika, uksti uywatanakapat paniruw taqpach katuyäna, Guehazí uywatamp chik kuttapxañapataki.

24Carmelo sat qullu patar purisinsti, Guehazí uywatax Naamanan uywatanakapa apapkän uka qullqin wayaqanak mayisinxa utaruw imxäna, jupanakarusti khithanukxänwa.

25Uka qhipatsti jupax Eliseo uywirip nayraqataruw uñstäna, Eliseosti juparux jiskt'änwa: —Guehazí, ¿kawkits jutaskta? —sasa. Guehazí uywatasti sänwa: —Janiw nayax kawkirus sarkti —sasa.

26Ukampis Eliseox saskakïnwa: —Mä chachax jumar katuqañatak carropat saraqki ukkhaxa, nayax chuymaxan jumamp chikaskäyätwa. Ukampis jichhax janiw qullqimpi, machaq isinakamp katuqañ pachäkiti, janirakiw huertonaka, uva yapunaka, ovejanaka, urqu vacanaka, uywatanaka alasiñ pachäkiti.

27Ukhamasti, Naamán chachan churäwip katuqasitamatxa, lepra usupax jumaruw wiñayatak makhatätam, ukhamarak jumat saraqiri wawanakamarusa —sasa. Guehazí uywatasti Eliseon jak'apat mistuwayxäna, lepra ususti janchipan khunur uñtat janq'ünwa.

← Chapter 4 Chapter 6 →