2 Corinthians 9

aymara-1997

1Jilatanakatak yanapa apthapiñatsti, jumanakar qillqaniñaxax janiw wakiskiti,

2jumanakan suma chuymanïpxatam niy uñt'xapxsmawa. Macedoniankir jilatanakarux kusisitaw arsta: “Acayankir jilatanakax maymäratpach jank'akïpxiw yanapt'asiñataki” sasa, ukatsti Macedoniankir jilatanakatxa waljaniw jumanakan suma chuymanïpxatam laykux yanapt'asiñ munapxaraki.

3Ukampis aka jilatanakaruw khithanta, jumanakat kusisitaxax jan inamayäskañapataki. Ukampix sañ munta, jumanakan chiqpachapun wakicht'atäpxañamataki,

4inampis Macedoniankirinakat yaqhipanakax nayampi chik jutasin jan wakicht'at jikxatapxiristam. Ukax nanakatak mä p'inqäspawa, nanakan jumanakar wal alkatasitaxata, jumanak pachpatakis mä p'inqarakïspawa.

5Ukat nayatakix waljamäna uka jilatanakan jumanakan ukar nayraqat jutañapaxa, ukatsti churañatak arsupkta uka yanapt'a phuqhachañ jumanakar yanapañapataki. Ukhamat jumanakan yanapt'a churatanakamax munasiña uñacht'äwïñapataki, jan mich'asiñampi churapxatam uñacht'ayarakini.

6Aka tuqit amtasipxam: Juk'ak yapuchirix juk'ak apthapi; walja yapuchiristi waljarak apthapi.

7Sapa mayniw kunjämtix chuymapan amtki ukarjam churañapa; janiw pä chuymampi churañapäkiti, janirakiw maynin jariyatakis churañapäkiti, Diosax kusisit chuymampi chuririruw munasi.

8Diosax jumanakar kunayman walja yänak jilarkir churapxiristam, ukhamat jumanakax munaski ukampi phuqt'ata sarnaqapxañamataki, ukat taqi aski luräwinakan yanapt'asiñamataki.

9Qillqatax siwa: “Jan kunaninakarux jilarkir churi, khuyapayasiñapasti jan tukuskiriwa” sasa.

10Yapuchañatak jatha churiri, manq'añatak manq'a churir Diosaxa, yapuchañamatakix kunatix wakiski uk churapxätam, ukarusti waljaptayaniwa, ukat yanapt'atanakamat yapux walipuniw achuni.

11Ukhamat jumanakan kunayman qamir yänakamax utjani, ukatsti munasiñampi mayninakar yanapt'apxañamataki. Kuna yanaptix nanakar jilatanakatak apayapkät ukatxa, jilatanakax Diosaruw yuspagarapxarakini.

12Aka yanap jilatanakatak apkasasti, janiw kunatix jupanakan jan utjki ukak churktanti, jan ukasti ukampix Diosar yuspagarañ chuyma jupanakar utjaytanxa.

13Aka yanapasti jupanakarux Criston suma yatiyäwi arunakarjam sarnaqapxatam uñacht'ayani, ukatsti jupanakax Diosaruw yupaychapxani, jumanakan ukham kusisit chuymampi jupanakatakisa, taqinitakis yanapanak apthapipxatamatxa Diosarux jach'añchapxarakiniwa.

14Ukhamarus taqi munasiñampiw jumanakatak Diosat mayipxani, jach'a khuyapayasiñ Diosan jumanakar uñacht'ayatapata.

15¡Diosax yuspagaratäpan, uka jan tukuskir churäwipata, ukasti jan amuyt'kayawa!

← Chapter 8 Chapter 10 →