2 Chronicles 7

aymara-1997

1Salomonax mayisiñ tukuyxän ukkhaxa, alaxpachat mä ninaw saraqanïna, nakt'at luqtäwinaksa, wilañchanaksa q'al nakhantäna, ukatsti pachpa Tatitun jach'a kankañapaw utaparux phuqhantäna,

2ukat sacerdotenakax uka utar jan mantapkänti.

3Israelit jaqinakax ninampi, Tatitun jach'a kankañapampi Tatitun utapxar saraqanir uñjasax taqiniw killt'asipxäna, p'iqipsa uraqir puriyañkamaw alt'apxäna, Tatiturusti yupaychapxänwa, yuspagarapxarakïnwa: “Jupax askiwa, munasiñapas wiñayatakiwa” sasa.

4Ukatsti reyimpi, taqpach markpachampix Tatituruw wilañchanak luqtapxäna.

5Salomón reyisti pä tunka payan waranqa urqu vacanaka, patak pä tunkani waranqa ovejanak wilañcha luqtäna. Reyisa, taqpach Israel markasa Tatitun utap ukham luqtapxäna.

6Sacerdotenakasa, levitanakas pachpankasipkakïnwa, jupanakasti Davidax lurkatayna uka toct'añ yänakampiw qullan q'uchunak toct'apxäna, ukatsti q'uchupxarakïnwa akham sasa: “Tatitun munasiñapax wiñayatakiwa” sasa. Sacerdotenakasti trompetanak phust'apxäna, ukchañkamax israelitanakax taqiniw sayt'atkam qhiparapxäna.

7Salomonax Tatitun utap nayräxankki uka uta anqäx luqtarakïna, uka chiqan jupax taqi nakt'at luqtäwinaka, sumar mantäwi wilañchanakan lik'inakap luqtäna, kawkïr altartix jupax broncet lurkatayna ukan nakt'at luqtäwinakasa, juyranakat waxt'äwinakasa, lik'inakasa phuqharxatap layku.

8Uka urusti, Salomonax taqpach Israel markampi, Hamat sat mantañawjat Egipto jawiratpach jutapkatayna uka walja jaqinakampix Chhujllanaka phunchhäwi lurapxäna.

9Qhipürusti mä jach'a phunchhäwi lurapxäna, jupanakax altar luqtasax paqallqu uruw phunchhäwi lurapxäna, yaqha paqallq urusti Chhujllanaka sat phunchhäwi lurapxarakïna.

10Paqallqüri phaxsina pä tunka kimsani uru saraqatarusti, Salomón reyix jaqinakarux kusisit sarxapxañapatakiw utanakapar khithanukxäna, Davidaru, Salomonaru, Israel markaru Tatitux askinak luratap layku.

11Kunapachatix Salomonax Tatitun utapa wali suma tukuyäna, reyi utsa, kunanaktix uka utanakan lurañ amtkäna ukanak tukuyxäna ukkhaxa,

12Tatitux arumaw juparux uñstäna, ukatsti sarakïnwa: “Nayax mayisitam ist'twa, aka chiqsa nayar wilañchanak luqtañ utatakiw ajllista.

13Ukhamasti, nayatix jallu jan puriñapatak alaxpach jist'antirista, jan ukax, t'iju t'ijunakampis yapunak tukjayirista, markaxarus usunak apayanirista,

14ukampis sutix apki uka markaxatix jisk'ar tukt'asin mayisitani, nayar thaqtitani, jan wali sarnaqatanakapsa apanukuni ukkhaxa, nayax alaxpachatpach juparux ist'ä, juchanakapsa pampacharakï, ukatsti markapan nayraqatar sartañapsa kuttayxarakïwa.

15Jichhat uksarux aka chiqan mayisitanakaparux taqi chuymaw ist'ä,

16nayaw aka uta ajllista, luqtarakta, sutixan wiñayatak ukankañapataki. Nayranakaxampi, chuymaxampisti aka utankapuniniwa

17Jichhax walikiwa, jumatix nayan nayraqataxan David awkimjam sarnaqäta, arunakaxaru, kamachi arunakaxar jaysas phuqhäta ukaxa,

18nayax juman marka apnaqäwim sum sayt'ayä, David awkimampi suma amtäwir mantkäyät ukhamarjama, juparusti arsuyätwa jupat saraqir wawanakapax Israel markar apnaqirix utjapuniniwa sasa.

19Ukampis jumanakatix nayat saraqapxitäta, janirak kawkïr kamachinaktix churapksma ukanakarus phuqhapkäta, jan ukasti yaqha diosanakar luqtapxäta, yupaychapxarakïta ukaxa,

20jumanakarux kawkïr uraqtix churapksma ukat apanukupxämawa, nayax kawkïr uttix yaqhachaskta uksa apanukurakïwa, ukatsti taqi markanakaw jumanakat larusipxani.

21Aka utan jach'achatäñapaxa, laqayar tukuyatäniwa, ukatsti khititix uka chiqanjam sarakipkani ukax muspharataw uñjasini, ukat jiskt'asirakini: ‘¿Kunatsa Tatitux aka markampi, aka utampix ukham lurpacha?’ sasa.

22Ukatsti juparux sapxaniwa: ‘Aka jaqinakax Egiptot irpsunkäna uka nayra awkinakapan Tatit Diosaparuw apanukupxi, jupanakax yaqha diosanakaruw yupaychapxi, luqtapxaraki; ukat jupanakxarux uka jan walt'añanakax juti’ ” sasa.

← Chapter 6 Chapter 8 →