2 Chronicles 23

aymara-1997

1Ukat paqallq mararusti, Joiadá sacerdotex ejerciton aknïri jilïrinakaparuw jawsayanïna: Jeroham chachan Azarías yuqaparu, Johanán chachan Ismael yuqaparu, Obed chachan Azarías yuqaparu, Adaías chachan Maaseías yuqaparu, Zicrí chachan Elisafat yuqaparu, ukatsti jupanakarux juparu jaqkattañap amtayäna.

2Jupanakasti Judá uraqpach muytapxäna, ukatsti Judá uraqin taqi markanakankir levitanakaru, Israel markan wila masinakapan jilïr irpirinakaparuw tantachapxäna, ukatsti taqpachaniw Jerusalén markar sarapxäna.

3Ukansti, tantachasipkatayna ukanakax, reyimpiw Diosan utapan mä suma arust'äwir mantapxäna. Ukatsti Joiadá sacerdotex sänwa: “¡Akaxay reyin yuqapax jumanakan nayraqatamankiwa! Juparuw reyïñapax wakt'i, kunjämtix Tatitux Davidat saraqir wawanakapat arsuwayki ukarjama.

4Jichhasti jumanakax aka lurapxäta: jumanakat chikatan chikatapa tamäki, sacerdotenakatsa, levitanakatsa samarañ urun luqtapkta ukanakax Tatitun utapan punkunakap uñjapxäta;

5maynïr chikatan chikatapa tamasti reyin utapankapxätawa; maynïr tamasti uta qallta satäkis uka punkunkapxätawa. Ukchañkamasti, taqpach markaw Tatitun utap anqäxankani.

6Janiw khitis Tatitun utapar mantañapäkiti, lurañanakap phuqhapki uka sacerdotenakampi, levitanakampikiw mantapxañapa, jupanakan Diosar luqtatäpxatap layku; ukat ukxar jaqinakasti anqäxan qhiparapxañapa, Diosan arsutaparjam jaysasa.

7Levitanakax reyiruw muyuntapxani, sapa maynis nuwasiñ yänak apt'atkama, Tatitun utapar mantañ munirix, jiwaniwa. Kawkharutix reyix sarkani ukkhakamaw jupa chikt'at sarapxäta” sasa.

8Levitanakasa, Judá uraqinkir taqi jaqinakasa kunjämtix Joiadá sacerdotex siskatayna ukhamarjamaw lurapxäna. Sapa mayniw tama jaqinakap sarayäna, khitinakatix samarañ urun uñch'ukirit mantapkäna, jan ukax mistupkäna ukanakaru, Joiadá sacerdotex lurañanakap tukuyapki ukanakarux janiw antutkänti.

9Ukatsti Joiadá sacerdotex Davidankkäna uka lanzanakampi, kunayman jark'aqasiñanakamp ejerciton jilïrinakaparux churäna, taqi ukanakax Diosan utapankänwa.

10Ukxarusti taqpach jaqinakarux punkunakaruw uchäna, Tatitun utapan kupïxa thiyata, maysa ch'iqäxkama, ukatsti altar muytpachanxa sapa mayniw reyir uñjañatak lanzankamäna.

11Ukapachaw Joiadá sacerdotempi yuqanakapampix reyin Joás yuqapar irpsunipxäna, juparusti reyi pillumpiw uchapxäna, ukhamarak marka apnaqañ kamachi qillqat katuyapxäna, jupar aceitempi warxatasinxa, reyit utt'ayapxäna. Ukatsti taqiniw kusisiñat art'apxäna: “¡Jallalla reyi!” sasa.

12Kunapachatix Atalía warmix jaqinakan uxutanakap ist'käna, ukhamarak reyirus jach'añchasipkäna ukkhaxa, Tatitun utaparuw saräna, kawkhantix taqinis ukankasipkäna ukawjaru.

13Ukansti jupax reyiruw uñjäna, mantañäki uka pilärap jak'an sayt'ata. Jupan jak'apansti jilïr irpirinaka, música toct'irinakaw ukankasipkäna, jaqinakasti wali k'uchikiw trompetanak phust'apxäna; q'uchurinakas toct'añ yänakampiw jach'añchañ q'uchunak sarayapxäna. Atalía warmisti uk uñjasax, isip ch'iyanuqasïna, ukatsti jach'at art'arakïna: —¡Nayarux ch'uxña lurapxistaxa! —sasa.

14Ukatsti Joiadá sacerdotex, ejerciton jilïrinakapar jawsasin säna: —Uka warmirux jaqinak taypit apsupxam, jupar arxatirirusti jiwayapxarakim! —sasa. Sacerdotex jan uka warmir Tatitun utapan jiwayapxañapatakiw ukham arsüna,

15ukat warmir katuntasinxa, reyin utapar sarki uka caballería punkunjam irpsupxäna, ukanarak juparux jiwayapxäna.

16Uka qhipatsti, Joiadá sacerdotex jupanakan Tatitun markapäpxañapatakiw mä arust'äwi luräna, taqpach jaqinakampi, reyipamp kuna.

17Ukatxa taqpachaniw Baal diosan utapar sarasin uka uta allinukupxäna, altaranakapsa, diosanakapsa t'unjasa. Baal diosan Matán sat sacerdoteparux altaranak nayraqataruw kharinukupxäna.

18Ukxarusti, Joiadá sacerdotex Tatitun utaparux uñjirinak uchäna, jupanakax sacerdotenakana, levitanakan apnaqatänwa, Davidaw jupanakarux Tatitun utapan nakt'at wilañchanak Tatitur luqtapxañapatak wakt'ayatayna, kunjämtix Moisesan kamachipan qillqatäki ukhamarjam lurasa, kusisiñampi q'uchusa kunjämtix Davidax wakt'äwaykatayna ukhamarjama.

19Tatitun utapan punkunakapatakisti punku uñjirinak uskurakïna, ukhamat jan khiti q'añuchat jaqisa mantañapataki.

20Ukatsti ejerciton jilïrinakaparu, wali aytat jaqinakaru, markanak apnaqirinakaru, ukhamarak taqpach jaqinakaruw irptawayäna, ukatsti taqpachaniw reyirux Tatitun utapata reyi utakam irpapxäna, alay tuqi punkut mantasa. Ukatsti reyirux reyi qunuñaparuw qunt'ayxapxäna,

21taqpach markaw kusisirakïna. Atalía warmin jiwxatapatsti, markax samarañan jikxatasxäna.

← Chapter 22 Chapter 24 →