2 Chronicles 18

aymara-1997

1Josafat reyix wali qamiri munañaniw tukxäna, ukatsti jupax Ahab reyin awkch'i masipaw tukxäna.

2Ukat mä qawqha maranakatsti, Josafat reyix Samaria markaruw saräna Ahab reyir uñjt'iri, Ahab reyisti Josafat reyimpiru, jupamp chika jutirinakaru katuqt'añatakix walja ovejanaka, urqu vacanak jiwarayäna, ukatsti Galaad chiqankir Ramot markar katuntir sarañatakiw amtayarakïna.

3Israelan Ahab reyipasti Judá markankir Josafat reyiruw jiskt'äna: —¿Jumax nayamp chika Galaad chiqankir Ramot markar nuwantir sarañ munasmati? —sasa. Josafat reyisti sänwa: —Nayasa, ejercitoxasa nuwasïwir sarañatakix jank'akïpxtwa.

4Ukampis nayraqatax Tatitun munañapay yatxatam —sasa.

5Israelan reyipasti profetanakaruw tantacht'äna, jupanakasti pusi patakanïnwa, jupanakarux akham jiskt'äna: —¿Galaad chiqankir Ramot marka katuntir sarapxiristti, janicha? —sasa. Jupanakasti sapxänwa: —Uka marka nuwantir saraskakim, Tatituw jupanakarux amparamar katuyätam —sasa.

6Josafat reyix jiskt'askakïnwa: —¿Janit aka chiqan Tatitun yaqha profetapax utjki, jupar jiskt'asiñatakiraki? —sasa.

7Israelankir reyisti Josafatarux sänwa: —Mayni profetaw utjaski, jupa tuqiw Tatiturux jiskt'araksna. Jupax Imlá chachan Micaías yuqapawa. Nayasti juparux walpun uñista, janipuniw kunapachas walinak yatiykituti, jan ukasti, jan walinakakpun yatiyitu —sasa. Josafatasti juparux saskakïnwa: —Jan ukham parlamti —sasa.

8Ukat ukspachaw Israelankir reyix yanapiripar jawsäna, juparusti sänwa: —¡Imlá chachan Micaías yuqapax jank'ak jutpan! —sasa.

9Israelankir reyisa, Judá uraqinkir Josafat reyisa, nuwasiñ yänakamp ucht'atkama, reyi qunuñanakapan qunt'atäsipkänwa, Samariar mantañawja plazana, profetanakasti jupanak nayraqatan taqpachaniw jutir urunakat parlapxäna.

10Quenaaná chachan Sedequías yuqapasti hierrot waxranak lurasitayna, jupax jach'at art'äna: “¡Tatitux akham siwa: ‘Aka waxranakampi jalxatasaw sirio jaqinakarux q'al tukjäta!’ ” sasa.

11Profetanakax taqpachaniw uka pachparak arsupxäna. Reyirusti sapxänwa: “Galaad chiqankir Ramot markarux nuwantaskakim, ukatsti atipjätawa, Tatituw jumarux uka marka katuyätam” sasa.

12Micaías profetar jawsir sarkatayna uka yatiyiristi, jupar sänwa: —Profetanakax taqinipuniw reyirux suma yatiyäwinak churapxi. Jumasti ukhamarakiy jupanakjam suma arunak yatiyam —sasa.

13Micaías profetasti juparux sänwa: —¡Nayax Tatit laykuw juramento lurta, kuntix Diosax nayan sañaxa munkani ukak säxa! —sasa.

14Ukatsti reyin nayraqataparuw purïna, reyisti juparux jiskt'änwa: —Micaías, ¿Galaad chiqankir Ramot marka katuntir sarapxiristti, janicha? —sasa. Micaías profetasti sänwa: —Uka marka katuntir saraskakim, ukatsti atipjätawa, Diosaw jumarux uka marka katuyätam —sasa.

15Ukatsti reyix jupar sarakiwa: —¿Qawqha kutirak jumar juramentompi arsuñamataki, Tatitun sutipar chiq parlañamatak sämasti? —sasa.

16Ukxaruw Micaiasax säna: “Israel jaqinakar taqpachaniruw uñjta, qullunakan ananukuta, jan awatirin ovejanakar uñtata. Tatitusti siwa: ‘Janiw jupanakax tumpirinïkiti; sapa maynis sumankañan utanakapar kutt'xapxpan’ ” sasa.

17Israelankir Ahab reyisti, Josafatarux sänwa: —¿Janit nayax sisksma, aka jaqix janipuniw sumanak yatiykituti, jan ukasti kunatix jan walïki ukakpun yatiyitu sasasti? —sasa.

18Micaías profetasti ukxarux saskakïnwa: —Ukham satamatxa, jichhax Tatitun arunakap ist'apxam: “Nayax Tatituruw qunuñapan qunt'at uñjta, ukhamarak alaxpachankir taqi ejercitoparu jupan kupïxapana, ch'iqäxapan sayt'atäskiri.

19Ukatsti Tatitux jiskt'änwa: ‘¿Khitis Israelankir Ahab reyir amtayir saraspa, ukat Galaad chiqankir Ramot markar makhatasin ukan aynacht'añapatakixa?’ sasa. Mayninakax mayja sapxäna, mayninakasti mayjarak sapxäna.

20Ukampis mä ajayuw Tatitun nayraqatapar uñstäna, ukatsti jupax sänwa: ‘Nayaw jupar amtayä’ sasa. Tatitusti jiskt'änwa ¿kunjämsa luräta? sasa,

21uka ajayusti sänwa: ‘Nayax reyin profetanakaparux k'arinak parlayä’ sasa. Ukatsti Tatitux juparux sänwa: ‘Jumaw juparux amtayäta, saram ukat ukham luraskakim’ sasa.

22Jichhasti jumax yatxtawa, Tatitun aka profetanakamana lakanakapana mä k'ari ajayu uchatapxa, Tatitux juman tukjatäñamatakiw arsxi” —sasa.

23Ukapachaw Quenaaná chachan Sedequías yuqapax Micaiasar jak'achasisin ajanupat t'axllintäna, ukatsti sänwa: —¿Kawki chiqaraki Tatitun ajayupasti jumamp parlañataki nayat mistusti? —sasa.

24Micaías profetasti juparux sänwa: —Mä uruw yatïta, kunürutix utat uta imantasir jalnaqkät ukapacha —sasa.

25Ukatsti Israelan reyipax sänwa: —¡Micaiasar katuntapxam, ukatsti marka apnaqir Amón chachan nayraqatapar irpapxam, ukhamaraki Joás yuqaxan nayraqataparu!

26Jupanakar sapxarakim: “Reyix akham siwa: ‘Aka jaqirux carcelar uchantapxam, ukatsti t'ant'ampi, umampik churapxam, nayan sumaki kuttaniñaxkama’ ” —sasa.

27Micaías profetasti saskakïnwa: “Jumatix jan kunas kamacht'ata kutt'anïtaxa, ukampix Tatitun naya tuqi jan arsutap yatiñäni” sasa.

28Ukhamawa, Israelan reyipampi, Judá markankir Josafat reyimpix Galaad chiqankir Ramot markar katuntir sarapxäna.

29Israelan reyipasti Josafat reyirux sänwa: —Nayax jan uñt'kay isthapitaw nuwasï, ukatsti jumaw isixampi uchasïta —sasa. Ukhamaw Israelankir reyix jan uñt'kay isthapisïna, ukatsti panpachaniw nuwasïwir mantapxäna.

30Ukampis Siria markankir reyix nuwasiñ carronak apnaqirinakan jilïrinakaparux sänwa: “Janiw khitirus katuntapxätati, jan ukasti Israelan reyiparukiw katuntapxäta” sasa.

31Ukatsti kunapachatix carro apnaqirinakan jilïrinakapax Josafat reyir uñjapxäna ukkhaxa, Israelan reyipäkaspas ukham amuyapxäna, ukatsti nuwjañatakiw muyuntapxäna. Ukapachaw Josafat reyix jach'at art'asis yanap mayïna, Tatitusti juparux yanapt'änwa. Diosaw juparux uka jaqinakat maysa tuqir jithiqtayäna,

32carronakan jilïrinakapasti, Israelan reyipar jan uñjasinxa, janiw arktapkänti.

33Ukampis mä soldadow ina ch'usaruki mich'inak akatjamat antutt'äna, ukatsti Israelan reyiparuw wakt'ayäna, jark'aqasiñapan ch'ukup chiqa mantayasaw niya jiwirpach usuchjäna. Ukat reyix carropa apnaqirir säna: —Qhipar kuttam, aka nuwasiñ taypit apsuta, sinti usuchjatätwa —sasa.

34Khä urusti nuwasiñax walt'atapunïnwa, yaqhip soldadonakasti Israelan reyiparux carropxan sayt'ata ukankayapxäna, sirionakar saykatañapataki, ukampis inti jalantaruw reyix jiwxäna.

← Chapter 17 Chapter 19 →