2 Chronicles 12

aymara-1997

1Kunapachatix Roboam reyin marka apnaqañapax thurt'atäxana, jupasa ch'amanjam amuyasïna ukkhaxa, jupax Tatitun kamachinakap phuqhañxa apanukxänwa, israelita jaqinakas uka pachparak lurapxäna.

2Jupanakan Tatitur jan sum arkapxatap laykusti, kunapachatix Roboam reyix phisqa mara marka apnaqkän ukkhaw, Egiptonkir Sisac reyix Jerusalenar jutasin nuwantäna,

3waranqa pä patakani nuwasiñ carronakampi, suxta tunka waranqa caballot jalir soldadonakampi, ukhamarak jupamp chika Egiptot jutir jan jakt'kay soldado tamanakampi, jupanakasti libio, suquieno, etiope jaqinakänwa.

4Ukatsti jupax Judá uraqinkir suma uyuchrantat markanak katuntasïna, ukatsti Jerusalenkamaw purïna.

5Ukapachaw Semaías profetax, Roboam reyi nayraqataru, ukhamarak Judänkir jilïrinakapan nayraqatapar saräna, jupanakasti Jerusalenan tantachasipxatayna Sisac reyin jupanakar nuwantañatak jutatapata, ukat jupanakarux säna: —Tatitux akham siwa: “Jumanakax nayat armasipxistawa, ukat nayax Sisac reyin amparaparux katuyapxsma” —sasa.

6Israel markan jilïr irpirinakapampi, reyimpix alt'at chuymampiw jan wali luratanakap uñt'asipxäna, ukat sapxarakïna: —¡Tatitux chiqaparuw uñjaski! —sasa.

7Tatitusti jupanakan alt'at chuymanakap uñjasax Semaías chacharux sänwa: “Jupanakan jan wali luräwinakap uñt'asipxatap laykux, janiw jupanakar tukjkäti, jan ukasti, jank'akiw jupanakar qhispiyä, janirakiw q'apisitaxsa Sisac reyi tuqi Jerusalenar samaraskäti;

8ukampis jupanakax uka reyin apnaqataw uñjasipxani, ukat yatipxani, kunjämas nayar luqtañaxa, kunjämas yaqha markanakan reyipar luqtañaxa uka” sasa.

9Egiptonkir Sisac reyix, Jerusalén markaruw katuntäna, ukatsti Tatitun utapankiri, reyin utapankir imat yänak katuntasïna. Taqi kun apasxäna, kawkïr jark'aqasiñanaktix Salomonax qurita luraykatayna ukanakamppach apasxäna.

10Roboam reyix ukanak lantix broncet jark'aqasiñanak lurayxäna, ukanaksti reyi uta punku mantañapa uñjir soldadonakan amparaparuw jaytäna.

11Ukatsti reyix sapa kuti Tatitun utapar sarkäna ukkhaw punku uñjir soldadonakax jark'aqasiñanak apt'ata sarapxirïna. Uka qhipatsti wasitat ukanakxa punku uñjir soldadonakan utapar uchxapxirïna.

12Roboam reyin llamp'usitapatsti, Tatitun q'apisiñapax apartxänwa, ukat Jerusalén markarux jan t'unjkänti, ukhamäkchïna ukasa, Judá uraqin aski luräwinakax utjarakïnwa.

13Roboam reyisti Jerusalén markan ch'amañchasïnwa, ukat uka marka apnaqaskakïna. Jupax pusi tunka mayan maranïkän ukkhaw marka apnaqañ qalltäna, ukatsti tunka paqallqun maraw Jerusalén markan apnaqäna, Tatituw uka markaru Israelan taqi ayllunakap taypit ukan jakañatak ajllisïna. Roboam reyin taykapax Naamá satänwa, jupax Amón chiqankirïnwa.

14Roboam reyin sarnaqatapax janiw askïkänti, janirakiw Tatiturux taqi chuymampi thaqtkänti.

15Roboam reyin luratanakapasti qalltat tukuykamax Semaías profetan crónicas sat qillqatapankiwa, ukhamaraki Iddo sat profetan qillqatapana.

16Roboam reyimpi, Jeroboam reyimpix sapa kutiw nuwasiñankapxäna.

17Kunapachatix Roboam reyix jiwxäna ukkhasti, Davidan Markaparuw imt'atäxäna. Jupa lantisti Abiam yuqapaw marka apnaqxäna.

← Chapter 11 Chapter 13 →