2 Chronicles 10

aymara-1997

1Roboam chachax Siquem chiqaruw saräna, ukawjarusti taqpach israelitanakaw sarapxatayna jupar reyit utt'ayañataki.

2Ukampis Nabat chachan Jeroboam yuqapax taqi ukanak yatïna, jupax Salomón reyit jaltxasax Egiptonkaskänwa, ukatsti Egiptot mäkiw kutt'anïna.

3Kunapachatix jupar jawsayanipkän ukkhasti, Jeroboam chachampi, taqi Israel jaqinakampix Roboam chachampi parliriw sarapxäna, juparusti sapxänwa:

4—Awkimax nanakatakix wali qhurünwa; jumatix sumampi uñjapxitäta ukaxa, nanakax jumar luqtasipkämawa —sasa.

5Roboam chachasti jupanakarux sänwa: —Akat kimsürut nayan ukar kuttanipxam —sasa. Jaqinakasti sarxapxänwa,

6ukatsti Roboam reyix Salomón awkipar jakañapkam luqtapkatayna uka jilïr jaqinakaruw jiskt'asïna, akham sasa: —¿Kunsa jumanakax nayar amuyt'ayapxitasma aka jaqinakar sañaxatakixa? —sasa.

7Jupanakasti sapxänwa: —Jumatix munasiñampi aka jaqinakar uñjäta, jupanakan mayitap jaysäta, suma arunakampi jupanakar parlarakïta ukaxa, jupanakax wiñayatakiw luqtapxätam —sasa.

8Ukampis Roboam chachax janiw jilïr jaqinakan iwxa arunakaparux yäqkänti, jan ukasti jupamp chika jilasipkatayna, ukhamarak jupar luqtapkäna uka waynanakaruw jiskt'asïna,

9jupanakarusti sänwa: —¿Kunsa jumanakax nayar amuyt'ayapxitasma? ¿Kamsasas nayax aka jaqinakan mayitapar siristxa? —sasa.

10Jupamp chika jilasipkatayna uka waynanakasti sapxänwa: —Jupanakar sumampi uñjañamatak mayipktam uka jaqinakarux akham säta: “Awkixatix jumanakatak wali qhurüchïnxa, nayax juk'amp qhurüyäwa;

11jupatix ch'ama tukuñampi irnaqayapxchiyätamxa, nayax juk'amp ch'ama tukuñampiw irnaqayapxäma; jupatix aliq jawq'añampik jawq'apxchïyätamxa, nayax hierro k'achin jawq'añampiw jawq'apxäma” —sasa.

12Kimsa uru qhipatsti, Jeroboam chachax taqpach markampiw Roboam reyi nayraqatan uñstäna, kunjämtix jupax siskatayna ukhamarjama.

13Ukampis Roboam reyix wali qhuru arunakampiw jupanakar säna, jilïri jaqinakan arunakapar jan yäqasa,

14ukatsti kunjämtix waynanakax amuyt'aykän uka pachpa arunak arsüna: “Awkixatix jumanakatak wali qhurüchïnxa, nayax juk'amp qhurüyäwa; jupatix wali ch'ama tukuñampi irnaqayapxchiyätamxa, nayax juk'amp ch'ama tukuñampiw irnaqayapxäma; jupatix aliq jawq'añampik jawq'apxchïyätamxa, nayax hierro k'achin jawq'añampiw jawq'apxäma” sasa.

15Reyisti janiw markar ist'añ munkänti, Tatituw ukhamäñapatak wakt'ayatayna uka layku, ukhamat kuntix Tatitux Siló chiqankir Ahías tuqi Nabat chachan Jeroboam yuqapar arskatayna ukan phuqhasiñapataki.

16Ukatsti Israel markpachaw reyin jupanakar jan yäqatap uñjasax, jupar sapxäna akham sasa: “¡Janiw kuna lurañanakaxas Davidampi utjapkituti! ¡Jesé chachan yuqapampix janiw kuna yänak jaljasiñas utjapkituti! ¡Israelitanaka, sapa maynis utanakasarkam sarxapxañäni! ¡Davidaki wila masiparux uñjasiskpan!” sasa. Ukhamasti, ukspachaw taqpach israelitanakax utanakapar sarxäna.

17Ukampis kawkïr israelitanakatix Judá markanakan jakapkän ukanakarusti Roboam reyix apnaqaskakïnwa.

18Ukatsti kunapachatix Roboam reyix ch'ama irnaqañanakan phuqhayiri uka Adoram chachar khitkän ukkhaxa, israelitanakax qalamp k'upjaskamaw juparux jiwayapxäna. Ukatsti Roboam reyix mäki carroparu sarxatasinxa, Jerusalén markaruw jaltxäna.

19Ukhamat Israel markax Davidan wila masi reyinakapatakix sayt'asïna, aka qillqatax qillqaski ukürkama.

← Chapter 9 Chapter 11 →