1 Samuel 9

aymara-1997

1Benjamín ayllun mä chachaw utjäna Quis sutini, jupasti Abiel jaqin yuqapänwa, Seror jaqin allchhiparaki; nayra achachilapasti Becorat satänwa Afíah jaqin yuqaparakïnwa. Quis chachax wali aytat jaqïnwa,

2jupasti mä yuqanïnwa, Saúl sutini, jupax suma uñnaqt'an waynänwa. Israelitanak taypin janiw khitis jupjam uñnaqt'anix utjkänti, ukhamarus janiw jupjam jach'a tansa jaqix utjkänti.

3Mä uruxa, Quis jaqin qachu asnonakapaw chhaqhatayna, ukat jupax Saúl yuqapar säna: —Uka asnonak thaqtir saram, uywatanakat mayni irpxarusiwayam —sasa.

4Saúl waynasti, mayni uywatapamp chikaw Efraín qullunak tuqi thaqhirix saräna; ukatsti Salisá, Saalim, uka chiqanaksa sararakïnwa, ukawjanakansa janirakiw qachu asnonak jikxatkänti.

5Suf chiqar purisinsti, Saúl waynax jupamp chik sarir uywataruw säna: —Kuttxakiñäni, inas awkixax qachu asnonakat sipan jiwasat wal llakisiskchi —sasa.

6Uywatasti ukxarux sarakïnwa: —Aka markan mä profetaw utji, taqi jaqinakaw juparux wal yäqapxi, kuntix jupax yatiyki ukanakasti phuqhasipuniwa. Ukhamax sarañäni, inampis jupax kawkirutix sarañasäki uksa uñacht'aychistaspa —sasa.

7Saulusti sänwa: —Ukhamax sarañäniya, ukampis ¿kunarak uka profetatak aparapiñänisti? Janiw t'ant'as wayaqasan utjkxistuti. Janiw kunas jupar churañatakix utjkiti —sasa.

8Uywatasti ukxarux sarakïnwa: —Nayan mä jisk'a qullqikiw utjitu. Uk profetarux churañäni, jiwasar kawksar sarañasäkitix uk uñacht'ayañapataki —sasa.

9(Khä urunakanxa, israelit jaqinak taypin, maynitix Diosar jiskt'asiñ munirïna ukapachax sirïnwa: “Uñjirin ukar jiskt'asir sarañäni” sasa. Jichha urunakansti khititix “profeta” satäki ukax nayrapachax “uñjiri” satänwa.)

10Saúl waynasti sänwa: —Walikiwa, ukhamax sarañäniya —sasa. Ukatsti panpachaniw kawkhantix profetax jakkäna uka markar sarapxäna,

11kunapachatix uka amstanjam markar makhatasipkäna ukkhasti, uma aptir sarir tawaqunakampiw jikisipxäna, ukat uka tawaqunakar jiskt'apxäna: —¿Akanti uñjiri jaqirux jikxatapxirista? —sasa.

12Tawaqunakasti sapxänwa: —Jïsa, jichhakiw markar purisinki, markax qullu patan utjir qullanawjan Tatitur wilañcha luqtani.

13Markar purisinsti, jank'akiw juparux thaqtapxäta, qullan chiqawjar janïr manq'ir sarkipana. Jupan puriniñapkamasti jaqinakax janïraw manq'apkaniti, jupaw wilañcha luqtatarux qullanañchañapa, uka qhipat jawsayata jaqinakax manq'asipkani. ¡Jank'ak sarapxam, jikxatasipkätawa! —sasa.

14Jupanakasti marka tuqir makhatasipkakïnwa. Niya markar purisipkän ukkhasti, Samuelux maysa tuqit mistusinkäna qullan chiqawjar sarañataki.

15Saúl waynan puriniñap nayräx urusti, Tatitux Samuelurux mä uñacht'äwi tuqiw parläna akham sasa:

16“Qharürux Benjamín uraqit mä jaqiruw khithanïma, jumasti juparuw Israel markaxa apnaqañapatak utt'ayäta. Jupaw filisteonakan amparapat qhispiyani, nayax t'aqhisitanakap uñjasin markaxat khuyapt'ayastwa, arnaqasitanakapax nayakamaw purini” sasa.

17Kunapachatix Samuelux Saúl waynar uñjkäna ukkhaxa, Tatitux jupar sänwa: “Akaxay kawkïri jaqittix parlksma ukaxa. Jupaw markaxarux apnaqani” sasa.

18Markar mantañ punkunkxasinsti, Saúl waynax Samuelur jak'achasisin säna: —Tata, uñacht'ayita ¿kawkhas uñjirin utapaxa? —sasa.

19Samuelusti sänwa: —Uñjirix nayätwa. Nayan nayraqatax qullan chiqawjar sarkam, jichhürux nayampiw ukan manq'asïta, kuntix jiskt'añ munkista ukxa, qharür willjtaw yatiyäma, ukat utamar kutt'xäta.

20Kawkïr qachu asnonakamatix niya kimsa uru chhaqhatäxi ukat jan llakisimti, uka asnonakar jikxatxapxiwa. Ukhamasti taqi kunatix Israel markan munkañäki ukax jumampitaki, utamankirimpitakïniwa —sasa.

21Saúl waynasti muspharataw säna: —¡Nayax Benjamín ayllunkirïtwa, ukasti Israel markan utjir taqi ayllunakat sipan sinti jisk'akiwa! Ukhamarusa, wila masinakaxax Benjamín ayllunkirinak taypin jan yäqat jaqinakakiwa. ¿Kunatarak taqi ukanak sistasti? —sasa.

22Ukhamasti Samuelux Saúl waynampiru, uywatapampir irptawayasin, jach'a utaruw irpantäna, ukan jikxatasir jaqinak taypinsti mä suma chiqaruw qunt'ayäna, kimsa tunka jaqinakaw ukankaskäna.

23Ukatsti Samuelux phayiriruw säna: —Kawkïr aychtix yaqhachayksma uk apanim —sasa.

24Phayiristi jank'akiw mä charpach aycha apsunïna, ukat Saúl waynar manq'asiñapatak churäna. Samuelusti sänwa: —“Akax jumatak yaqhachatäkän ukaxa, manqt'asim, nayax taqi jaqinakamp chik jichhür manqt'asiñamatakiw yaqhachxäyäta” —sasa. Ukürusti Saúl waynax Samuelumpiw manq'asïna.

25Kunapachatix qullan chiqawjat markaru saraqanxapxän ukkhasti, Saúl waynatakix uta pataruw mä ikiñ wakicht'apxäna,

26Saúl waynasti ukaruw ikt'xäna. Qhipärmanthisti Samuelux Saúl waynar jawsasin uka uta patan parlxayäna akham sasa: —Sartasxam, utamar kuttxañamawa —sasa. Saúl waynasti sartasin Samuelumpiw uka utat mistuwayxäna,

27marka anqäxa tuqiru saraqasipkän ukkhasti, Samuelux Saúl waynaruw säna: —Uywatam nayraqat khithanukkam, jumasti suyt'akim, kuntix Tatitux siskitu uk jumar yatiyañ munsma —sasa.

← Chapter 8 Chapter 10 →