1 Samuel 5

aymara-1997

1Filisteonakax Diosan arcapa katuntasisinxa, Eben-ézer chiqat Asdod chiqaruw apapxäna;

2ukatsti Dagón sat diosan templopar apantasinxa, uka diosap jak'aruw uchapxäna.

3Qhipärmanthisti, Asdod markankir jaqinakan purinitapatxa, Dagón diosarux Tatitun arcap nayräxan liwnuqtat jikxatapxäna. Ukatsti Dagonar aptasin kawkhankkäntix uka chiqaruw uchxapxarakïna.

4Qhipürusti Asdod chiqankir jaqinakax purinipxarakikïnwa, ukatsti Dagón diosarux wasitatampiw Tatitun arcap nayraqatan liwnuqtat jikxatapxarakïna. P'iqipampi paypach amparapampix templo mantañawjan p'akirat willisiskäna, tunupakiw pachpankaskäna.

5Ukat jichhakamax, kunapachatix Dagón diosan sacerdotenakapax templopar mantapki ukkhax, janiw mantañawja takt'apkiti.

6Ukatsti Tatitux Asdod chiqan utjasirinakarux walpun t'aqhisiyäna, axsarañampi phuqhantasa kunayman ch'uphu usunakampi chhuxriñchjasaraki.

7Asdod chiqan utjasirinakasti ukanak uñjasinxa, sapxänwa: “Israel markan Diosapan arcapax janiw jiwasanak taypin qhiparañapäkiti, uka diosapax sintipuniw mutuyxistu, jiwasarusa, Dagón diosasarusa” sasa.

8Ukatsti, filisteonakan taqi jilïrinakaparuw jawsthapiyapxäna, jupanakarusti jiskt'apxarakïnwa: —¿Kuns Israel markan Diosapan arcapampix lurañäni? —sasa. Uka jilïrinakasti sapxänwa: —Gat markar apapxam —sasa. Filisteonakasti uka markaruw arust'äwi arcxa apxapxäna.

9Ukampis Tatitun arcapa uka markar puripansti, Tatitux uka markan kunayman jan walt'añanak sartayäna, jaqinakarusti taqiniruw kunayman ch'uphu usunakampi chhuxriñchjäna, jach'a jaqinakaru, ukhamarak wawanakarusa.

10Ukhamïpansti filisteonakax Diosan arcap Ecrón markaruw apxapxäna; ukampis kunapachatix arcax uka markar purkäna ukkhasti, Ecrón markankirinakax wal arnaqasipxäna: “¡Israel markan Diosapan arcapxa taqi jiwasanakar jiwarayañatakiw apanipxi!” sasa.

11Ecrón markankirinakax jiwañ wal axsarapxäna, ukat filisteonakan jilïrinakapar jawsayasin jupanakar sapxarakïna: “¡Uka arca akat apasipxam. Kawkhattix apanipkta ukkhar apapxam, jan ukasti taqiniw jiwarañäni!” sasa.

12Markachirinakan arnaqasitanakapax alaxpachkamaw ist'asïna, jan jiwapkäna ukanakasti, ch'uphu usumpi mutuyatäpxänwa.

← Chapter 4 Chapter 6 →