1 Samuel 31

aymara-1997

1Ukatsti filisteonakax israelitanakaruw tukjapxäna. Israelitanakasti jupanakan nayraqatapat jaltxapxäna, Guilboa qullunsti jiwaratanakax waljanipunïnwa.

2Filisteonakasti, Saúl reyimpiru, wawanakapampirux arktapxänwa, ukatsti Jonatanaru, Abinadab, Malquisúa ukanakaruw jiwarayapxäna.

3Ukatsti Saúl reyir nuwantañatakiw ch'amachasipxäna; mich'i antutt'ir jaqinakapax mich'inakap jupxar puriyapkän ukkhasti, jupax wal axsaräna.

4Ukat Saúl reyix yanapiripar säna: —Espadam apsusim ukatsti jiwayxita, janiw Diosar jan uñt'ir jaqinakan nayar jiwayañap munkti, janirakiw nayat larusiñapsa munkti —sasa. Yanapiripasti jupar axsarasax janiw ukham lurañ munkänti. Ukat Saúl reyix jupapachaw espadap katusin uka patxar liwxattäna.

5Yanapiripasti Saúl reyir jiwata uñjasinxa, jupax uka kipkarakiw espadapxar liwxattasax jiwayasïna.

6Ukhamaw uka urux Saúl reyix kimsa yuqanakapampi, yanapiripampi, taqi khitinakatix jupampïpkän ukanakampix jiwarapxäna.

7Israelitanakasti, khitinakatix qhirwat khurkatan jakapkäna, ukhamarak Jordán jawirat inti jalsu tuqin jakapkäna ukanakax israelita soldado tamanakan jaltxapxatapata, Saúl reyis yuqanakapamppach jiwarat uñjasinsti, jupanakax markanakap jaytasaw jaltxapxarakïna. Ukat filisteonakax uka markanakar purisax utjantasipxäna.

8Qhipürusti, kunapachatix filisteonakax jiwatanakan yänakap aparir sarapkatayna ukkhaxa, Guilboa qullunsti Saúl reyimpiru, kimsa yuqanakapampir jiwarata jaqusiskir jikxatapxäna.

9Ukatsti p'iqip apaqapxäna, nuwasiñ yänakapsa aparapxarakïnwa, ukatsti taqi filisteo uraqpacharuw khithanak khithapxäna, taqi markpacharu diosanakapan utapan yatiyapxañapataki.

10Saúl reyin nuwasiñ yänakapsti Astarté diosan utaparuw uchapxäna, amayapsti Bet-sán uyu pirqaruw warkkatapxarakïna.

11Galaad uraqinkir Jabés markan utjir jaqinakasti, filisteonakan Saúl reyir ukham lurapxatap yatisinxa,

12jan kunsa axsarir jaqinakaw mä amtäwir mantapxäna, ukat paqar aruma jutasax Bet-sán uyu pirqapatsti Saúl reyina, yuqanakapan amayanakap apaqawayxapxäna, ukatsti Jabés markar kuttanisin uka amayanak phichhantxapxäna.

13Ukatsti amayanakan qhillapxa, Jabés chiqan mä quqa k'uchuruw imt'xapxäna. Ukatsti paqallqu uruw llakisiñat ayunapxäna.