1 Samuel 16

aymara-1997

1Tatitusti Samuelurux sänwa: —¿Kunapachkamarak Saúl reyit llakisïtasti? Janiw nayax jupan Israel markan reyikïskañap munkxti. Jichhax uka waxraru aceitempi phuqhantam, ukatsti Belenankir Jesé chachan utapar sarañam munta, nayasti maynïr wawaparuw reyïñapatak ajllista —sasa.

2Samuelusti sänwa: —¿Kunjämsa jichhax sariristxa? ¡Saúl reyitix saratax yatinixa, jiwaychitanixaya! —sasa. Tatitusti sarakïnwa: —Mä vaca qallu irpxarusiwayam, ukatsti juparux sarakim “Wilañcha luqtiriw saraskta” sasa.

3Ukatsti Jesé chacharux uka wilañcha luqtäwirux jawsayarakim, ukat kunatix lurañamäki uk nayaw saskäma. Khitirutix nayax ajlliskä ukaru reyitak yaqhacharakim —sasa.

4Samuelusti kuntix Tatitux siskatayna uk luräna. Kunapachatix Belenar purkän ukkhaxa, markankir jilïri jaqinakax jupar katuqiriw mistunipxäna, juparusti jiskt'apxarakïnwa: —¿Sumankañampit jutta? —sasa.

5Samuelux sarakïnwa: —Jïsa, sumankañampiwa. Tatituru mä wilañcha luqtiriw jutta. Jichhax q'umachasipxam, ukatsti nayamp chika wilañcha luqtir sarapxam —sasa. Ukatsti Samuelux jank'akiw Jesé chachampiru, yuqanakapampirux q'umachäna, ukatsti wilañcha luqtir sarañatakiw jawsarakïna.

6Kunapachatix jupanakax purxapxän ukkhaxa, Samuelux Eliab chachar uñjasax akham amuyt'äna: “Tatitux aka jaqiruw reyïñapatak ajllispacha” sasa.

7Ukampis Tatitux sänwa: “Jan jumax uñnaqapaki, ukhamarak jach'a tansätapaksa uñkatkamti, janiw nayax jupar ajlliskti. Jaqix uñnaqak uñkati, ukampisa nayax jaqin chuymap uñjaraktxa” sasa.

8Ukatsti Jesé chachax Abinadab yuqapar jawsasin Samueluruw irpkatäna; Samuelusti sarakïnwa: —Janiw Tatitux jupar ajlliskiti —sasa.

9Ukatsti Jesé chachax Samá sat yuqaparuw irpkatäna; Samuelusti sarakïnwa: —Janirakiw juparus Tatitux chhijllaskiti —sasa.

10Jesé chachax paqallqu yuqanakap Samuelurux irpkatäna, ukampis Samuelux Jesé chacharux yatiyxänwa: “Tatitux janiw uka paqallqunit maynirus chhijllaskiti” sasa.

11Ukatsti Samuelux jiskt'askakïnwa: —¿Janit juk'ampi yaqha yuqanakamax utjkxi? —sasa. Jesé chachasti sarakïnwa: —Sinti sullkäki ukaw utjaski, jupasti ovejanak awatiski —sasa. Samuelux sarakiwa: —Irptayanim, jupan puriniñapkamasti janiw kunatix lurañasäki uk lurkañäniti —sasa.

12Ukatsti Jesé chachax uka sullka yuqapar jawsiriw khithäna. Uka sullkïristi suma wilal janchinïnwa, wali suma uñnaqt'aniraki. Ukatsti Tatitux Samuelurux sänwa: —Nayax juparuw ajllista. Jichhasti reyïñapatakix aceitempi p'iqipxar warxatas yaqhachxam —sasa.

13Ukspachaw Samuelux aceiten uchat waxra aptasin uka waynarux jilanakapan nayraqatapan aceitempi p'iqipxar warxatasin reyïñapatak yaqhachxäna, uka waynasti David satänwa. Ukat uksarusti Tatitun ajayupaw jupxankäna. Ukatsti Samuelux Ramá chiqaruw sarxäna.

14Ukchañkamasti Tatitun ajayupax janiw Saúl reyimpïkxänti, Tatitun khithanita mä ñanqha ajayuw juparux t'aqhisiyäna.

15Ukat jupan luqtirinakapax sapxäna: —Tatitux mä ñanqha ajayu jumxarux apayani, uka ajayuw jumarux t'aqhisiyasktam.

16Ukhamax luqtirinakamax mayni arpa toct'ir thaqtanipxpan, kunapachatix jumar uka ñanqha ajayux t'aqhisiykätam ukkhaxa, uka jaqiw arpa toct'kani, ukatsti jumax sumakiw jikxatasïta —sasa.

17Saúl reyisti sarakïnwa: —Ukhamax khititix suma toct'añ yatki ukay thaqhapxam, ukat irpanirapipxita —sasa.

18Ukatsti jupanakat mayniw säna: —Nayax uñjtwa, Belenankir Jesé chachan mayni yuqapaw sum toct'añ yati; ukhamarus nuwasiñatakix jan axsaririwa, kunapachatix kuns parlki ukkhaxa, wali suma amuyumpiw parli, ukhamarus wali suma uñnaqt'an waynawa, Tatitusti juparux yanapt'apuniwa —sasa.

19Ukat Saúl reyix mä khithanak Jesé chachan ukar khithäna, akham sapxañapataki: “Ovejanak awatirïki uka David yuqamar nayan ukar khithanita” sasa.

20Ukat Jesé chachax David yuqaparux Saúl reyin ukaruw khithäna. Jupampi chiksti mä asno irpayarakïna, t'ant'as khumt'ata, mä lip'ichi wayaqa vinompi, mä cabritompi kuna.

21Ukhamaw Davidax Saúl reyin nayraqatapar uñstäna, ukat jupar luqtarakïna. Saúl chachasti wal Davidarux munasïna, ukat jupan yanapiripat uchasïna.

22Saúl reyix Davidar wali munasitap laykusti, mä iwxa Jesé chachar apayäna, Davidan jupamp chika qhiparañapataki.

23Ukhamasti kunapachatix Tatitun khithanita uka ñanqha ajayux Saúl reyir t'aqhisiykän ukkhaxa, Davidax arpa toct'arapirïna. Ukampiw Saúl reyix kutjtirïna, uka ñanqha ajayusti jupat jithiqtxarakirïnwa.

← Chapter 15 Chapter 17 →