1 Kings 12

aymara-1997

1Roboam chachasti Siquem chiqaruw saräna, uka chiqaru Israel markpachaw jupar reyit utt'ayir sarapxatayna.

2Ukampis Jeroboam chachax uk ist'atayna, jupasti Egiptonkaskänwa, Salomón reyimpi jan katjayasiñatakiw jaltxasin ukan utjasxarakitayna.

3Ukatsti, jupar jawsayanipkän ukkhaxa, Jeroboam chachampi, taqpach Israel markachirinakampix Roboam chachar parliriw sarapxäna, juparusti sapxänwa:

4—Awkimax nanakatakix wali qhurünwa; jichhasti jumay uka ch'ama lurañanaka apaqt'apxita, ukhamarak jupax wali t'aqhisiñampi irnaqaña phuqhañanak churapkitu uksa, nanakasti jumarux luqtasipkämawa —sasa.

5Roboam chachasti jupanakar sänwa: —Sarapxam, ukatsti kimsa urut nayamp parlir kutt'anipxam —sasa. Jaqinakasti sarxapxänwa,

6ukat Roboam reyix Salomón awkiparu jakañapkam luqtirïpkatayna uka jilïrinakar jiskt'asïna, akham sasa: —¿Kuns jumanakax amuyt'ayapxitasma aka jaqinakar sañaxatakixa? —sasa.

7Jupanakasti sapxänwa: —Jumatix jichhürun aka markar yanapäta, ukatsti chuymapar purkir llaphi arunakampi parlxayarakïta ukaxa, jupanakax wiñayaw jumar luqtapxätam —sasa.

8Roboam reyisti janiw uka jilïrinakan iwxa arunakaparux ist'känti, jan ukasti jupamp chik jilaskän uka waynanakaruw jiskt'asïna, uka waynanakasti jupan luqtirinakapänwa,

9jupanakarusti sänwa: —Aka jaqinakax kuntix awkixax jupanakxar ch'ama lurañanak wayt'awayki ukanak apaqt'añax mayipxitu, ¿kunsa jumanakax amuyt'ayapxitasma uka jaqinakar sañaxatakixa? —sasa.

10Uka waynanakasti sapxänwa: —Uka jaqinakarux akham sañamawa: “Awkixatix qhurüchïnxa, nayax juk'amp qhurüyäwa;

11jupatix ch'ama lurañanak jumanakxar wayt'apxstamxa, nayax juk'amp jathi lurañanak wayt'apxäma; jupatix jawq'jas mutuyapxstamxa, nayax hierro k'achin wiskanakampiw jawq'japxäma” —sasa.

12Kimsa uru qhipatsti, Jeroboam chachax taqpach jaqinakamp chikaw Roboam reyir uñstir kutt'anipxäna, kunjämtix reyix siskatayna ukhamarjama.

13Ukampis reyix jupanakarux wali qhuru arunakampiw parlxayäna; janiw kuntix jilïrinakax iwxt'katayna uk ist'känti,

14jan ukasti kuntix waynanakax iwxt'katayna uka arunakak säna: “Awkixatix qhurüchïnxa, nayax juk'amp qhurüyäwa; jupatix ch'ama lurañanak jumanakxar wayt'apxstamxa, nayax juk'amp jathi lurañanak wayt'apxäma; jupatix jawq'jasin mutuyapxstamxa, nayax hierro k'achin wiskanakampiw jawq'japxäma” sasa.

15Reyix janiw kuntix markax maykän ukar ist'känti, Tatituw ukhamäñapatak wakt'ayatayna, kuntix Ahías profeta tuqi Nabat chachan Jeroboam yuqapar arskatayna uk phuqhasiñapataki.

16Ukatsti taqpach Israel markaw reyin jupanakaru jan ist'atap uñjasin, akham jupar sapxäna: “¡Janiw kuna lurañanakasas Davidamp utjkistuti! ¡Janiw Jesé chachan yuqapampi kuna katuqäwi jaljasiñasa utjapkistuti! ¡Israelit jaqinaka, utasarkam sarxañäni! ¡Davidan wila masinakapak ayllupankirinakar apnaqaskpan!” sasa. Ukat ukspachaw israelita jaqinakax utanakapar sarxapxäna.

17Ukampis Judá uraqi markanakan jakapkäna uka israelitanakarusti Roboam reyiw apnaqaskakïna.

18Kunapachatix Roboam reyix Adoram sat chacharu maynïr israelitanakamp parlañapatak khitkäna ukkhaxa, taqi israelita jaqinakaw qalamp k'upjasa jiwayapxäna, Adoram chachax taqi ch'ama lurañanakxaru jilïrit uchatänwa. Ukham uñjasinsti Roboam reyix mäkiw carroparu makhatasin Jerusalenaru jaltxäna.

19Ukhamat Israel markan alay tuqinkir ayllunakapax sayt'asïna, janiw jupanakax Davidan saraqirinakapampi apnaqayasiñ munapkänti; ukasti jichhürkamaw ukhamäski.

20Israelitanakax Jeroboam chachan kutt'anxatap yatisinxa, tantachat jaqinak nayraqatar uñstañapatakiw jupar jawsayanipxi, ukatsti taqpach Israelan reyipat jupar utt'ayapxi. Judá ayllunkirinakakiw ukarux jan jayskänti, jupanakasti reyitakix Davidat saraqirïñap munapxäna.

21Roboam reyisti Jerusalenar purisinxa, Judá ayllunkirimpita, Benjamín ayllunkirimpit patak kimsaqallqu tunkan waranqa suma ajllit soldadonak tantachäna, israelitanakamp nuwasiñataki, ukhamat marka apnaqäwip kutsuyasxañataki.

22Ukampis Diosax Semaías chacharuw parläna, jupasti Diosar axsartir chachänwa, juparusti sänwa:

23“Salomonan Roboam yuqapar parlam Judá uraqin reyiparu, ukhamarak Judá, Benjamín ayllunkir taqpach jaqinakaru, ukat ukxar utjir markachirinakampiru akham sasa:

24Tatitux akham siwa: ‘Israelita jilanakamampix jan nuwasipxamti. Taqinis utanakaparkam kutt'xapxpan, nayaw ukhamäñapatak wakt'ayta’ ” sasa. Jupanakasti Tatitun arunakap ist'asinxa, taqiniw kutt'awayxapxäna, Tatitun arsutaparjama.

25Jeroboam reyix Efraín qullunakan jikxataski uka Siquem marka wasitat luräna, ukasti ukan utjasirakïna. Ukxarusti Penuel marka wasitat lurarakïna.

26Ukampis chuymapan sänwa: “Jichhax Davidan saraqiripax aka marka apnaqäwi kutsuyasxaspawa,

27aka jaqinakatix Jerusalenar Tatitun utapan wilañchanak luqtir sarasipkakini ukaxa. Jupanakax Judá marka apnaqir Roboam reyiruw alkatxapxaspa, ukatsti nayar jiwayasin juparux makhatxapxaspa” sasa.

28Uka tuqit suma yatxatasinxa, reyix qurit pä vaca qallunak luräna, ukat markar sarakïna: “Israelitanaka, janiw wakiskxiti jumanakan Jerusalén markar sapa kuti makhatasipkañamaxa. Akax diosanakamaxa, ukanakaw Egipto markat irpsunipxtam” sasa.

29Jeroboamasti uka vaca qallunakat mayxa Betel markaruw uchäna, maysti Dan markaruw ucharakïna.

30Ukaw Israel markarux juchar puriyäna, jupanakax Betel, Dan markanakaruw uka diosanakar yupaychirix sarapxäna.

31Ukxarusti Jeroboamax qullu patanakan yupaychañ utanak lurayarakïna, ukatxa markachirinak taypit sacerdotenak utt'ayäna, ukanakasti janiw levitanakäpkänti.

32Ukhamarus uruyañ uru uñstayarakïna, kimsaqallqüri phaxsina, tunka phisqani uru saraqataru, kunjämatix Judá uraqin uruyañ urux lurañäki ukhama, ukatsti jupa pachpaw wilañchanak altarxan luqtäna. Uksti Betel markan luräna, quri vaca qallunaka luraykatayna ukanakar wilañchanak luqtasina, yupaychañ utanak luraykatayna ukanakatak sacerdotenak utt'ayasina.

33Ukhamaw kimsaqallqür phaxsina, tunka phisqan uru saraqataru, Jeroboam reyix Betel chiqan altar luraykatayna ukxar nakt'at wilañchanak luqtäna. Uka uruyañ ursti jupaw israelitanakatak munañaparjam uñstayäna.

← Chapter 11 Chapter 13 →