1 Chronicles 23

aymara-1997

1Davidasti niya wali chuymanïxasax Salomón yuqaparuw Israel markan reyïñapatakix utt'ayäna,

2ukatsti Israelankir taqi irpirinakaru, sacerdotenakaru, levitanakaruw tantacht'äna.

3Ukhamasti levitanakarux kimsa tunka maranit amstaruw jakthapïna, taqpachanix kimsa tunka kimsaqallqun waranqa levita chachanakaw utjäna.

4Jupanakatsti, pä tunka pusin waranqa levitanakax Tatitun utap lurañ sarayapxañapatak utt'ayatänwa, suxta waranqa jilïrinaka, ukhamarak taripirinaka,

5ukxarusti pusi waranqa levita chachanakasti punku uñjiritaki, ukatsti pusi waranqax kunjämatix Davidax amtkäna ukhamarux toct'añ yänakampi Tatitur yupaychañatak utt'ayatäpxänwa.

6Davidasti jupanakarux tam tama jalanuqäna, Leví chachan qawqha wawanakapatix utjkäna ukhamaru: Guersón, Quehat, Merarí jupanakaru.

7Guersón chachan wawanakapa: Ladán, Simí.

8Ladán chachan wawanakapax kimsanïnwa: Jehiel, jupaw jilïrïna, Zetam, Joel.

9Simí chachan wawanakapax kimsanïnwa: Selomit, Haziel, Harán. Jupanakaw Ladán chachat saraqir wawanakapan jilïripäna.

10Simí chachan wawanakapax pusinïnwa: Jáhat, Ziza, Jeús, Beriá.

11Jáhat jupaw jilïrïna, payïrix Ziza; Jeús, Beriá, chachanakax janiw walja wawanïpkänti, ukat jupanakax jaqi jakthapïwin, mä awkit saraqirïpkaspa ukham jakhutapxänwa.

12Quehat chachan wawanakapax pusinïnwa: Amram, Ishar, Hebrón, Uziel.

13Amram chachan wawanakapa: Aarón, Moisés. Aarón chachax Tatitun ajllitänwa, qullan waxt'äwinak luqtañapataki, Dios nayraqatan incienso nakt'ayañataki, luqtañataki, ukatsti aski arunak arsuñapataki, uka lurañanaksti Aaronampi, wawanakapampix wiñayatakiw lurapxañapäna.

14Tatitunkir Moisés chachampi, jupat saraqir wawanakapampix Leví ayllur jakhutänwa.

15Moisesan wawanakapax akanakänwa: Guersón, Eliézer.

16Guersón chachan wawanakapatsti jilïrix Sebuel sutinïnwa.

17Eliézer chachan nayrïr wawapax Rehabías satänwa, ukatsti janiw juk'amp wawanakanïkxänti; ukampis Rehabías chachax walja wawanakanïnwa.

18Ishar chachan tayna wawapax Selomit sutinïnwa.

19Hebrón chachan wawanakapax akanakänwa: Jerías tayna wawapa; payïrix Amarías; kimsïrix Jahaziel; pusïrix Jecamán.

20Uziel chachan wawanakapax akanakänwa: jilïrix Micaías, ukxarusti Isías.

21Merarí chachan wawanakapa: Mahli, Musí. Mahli chachan wawanakapa: Eleazar, Quis.

22Eleazar chachax jan yuqall wawanïsaw jiwxäna, imill wawanakapakiw utjäna, jupanakax jila masipampiw jaqichasipxäna, Quis chachan yuqanakapampi.

23Musí chachan wawanakapax kimsanïnwa: Mahli, Éder, Jeremot.

24Jupanakaw Leví chachat saraqir wawanakapaxa, wila masinakaparjama, wila masinakan jilïrinakapan sutitkam qillqantas jakthapitäkän ukhamarjama, pä tunka maranit amstaru, jupanakaw Tatitun utap lurañanakatakix utt'ayatäpxäna.

25Davidasti akham satayna: “Israelan Tatit Diosapax samarañ markaparux churi, ukatsti Jerusalén markaruw wiñay jakañatak ajllisi.

26Ukat levitanakax janiw juk'ampi Tatitun chhujllapsa, Tatitur yupaychañ qullan yänakapsa apnaqxapxaniti” sasa.

27Ukhamaw Davidan qhipa amtäwiparjama Leví chachat saraqir wawanakapax pä tunka maranit amstaru jakthapitäpxäna,

28ukatsti jupanakax Aarón chachat saraqir sacerdote wawanakapar jaysapxañapänwa, Tatitun utapan lurañanakana, qullan yänaka q'umachañanakana, ukhamarak yaqha lurañanak phuqhañanakana.

29Jupanakax siqiki uchatäki uka qullan t'ant'ata, waxt'äwi jak'uta, jan levaduran t'ant'ata, sartenar phayat waxt'äwita, chapuntat masata, taqi kun tupt'añanakat uñjañatak uchatäpxänwa.

30Ukhamarus Tatitun utapan sapüruw willjtat ukankapxañapäna, jayp'unakas Tatitur yuspagarañataki, yupaychañataki,

31kunapachatix sábado urunakana, machaq phaxsi uruyäwinakana, wakiskir uruyäwinakan nakt'at waxt'äwinak Tatitur luqtapkän ukkhaxa, lurañanakaparjamaw Tatiturux luqtapxäna.

32Jupanakarakiw Tatitump Jikisiñ Carpa, qullan chiqawja uñjapxäna, Tatitun utapan Aarón chachat saraqir wawanakapamp irnaqasa.

← Chapter 22 Chapter 24 →