1 Chronicles 19

aymara-1997

1Uka qhipatsti amonitanakan Nahas reyipax jiwxänwa, jupa lantisti yuqapaw reyïxäna.

2Ukhamasti Davidax Hanún chacharuw khuyapt'ayañ amtäna, awkipax juparux munasiñampiw uñjatayna, ukatsti mä qawqha jaqinakap khithäna, awkipan jiwxatapat Hanún sat chachar chuymacht'iri. Kunapachatix Davidan jaqinakapax amonitanakan uraqipar puripxän ukkhaxa,

3amonitanakan jilïrinakapax Hanún reyirux sapxänwa: “¿Davidax uka jaqinakapar juma Jach'a reyir chuymacht'iripunit khithanpacha? ¡Janiwa! ¡Chiqpachansa markar uñakipiri, yatxatiri, uñaqirikiw jutapxpachaxa!” sasa.

4Ukatsti Hanún reyix Davidan jaqinakaparuw katurayäna, ukatsti sunkhanakap khithurayäna, isinakapsa jikhanit aynach tuqirux q'al ch'iyanuqayäna. Ukat khithanukxäna.

5Kunapachatix Davidar kunatix khä chachanakampi luraskatayna uk yatiyapxäna ukkhaxa, katuqayiriw khithäna, jupanakan mä p'inqa uñjasipxatap layku, jupanakarux Jericó markaruw qhiparayäna, sunkhanakap jilantayasiñapkama, ukat kuttxapxañapataki.

6Amonitanakax Davidan phiñasitap amuyapxäna, ukat Hanún reyimpi, amonitanakampix sirionakar kimsa tunka kimsani tonelada qullqi apayapxäna, Mesopotamia, Siria, Maacá, Sobá markanakat nuwasiñ carronak apayaniñataki,

7ukatsti kimsa tunka payan waranq nuwasiñ carronak uka qullqimpix mink'apxäna, ukhamarak Maacá chiqankir reyiparusa ejercitoparusa. Jupanakasti Medebá uñkatasiruw utjnuqtapxäna. Ukhamarus amonitanakax markanakapat mistunisax nuwasiñatakiw tantacht'asipxäna.

8Ukampis Davidax yatïnwa, ukat Joab chachampiru, soldadonakapampirux khithäna.

9Amonitanakasti sarasax pachpa marka mantañawjan nuwasiñatakix wakichasipxäna. Kawkïr reyinakatix jutapkatayna ukanakax pamparuw qhiparapxäna.

10Kunapachatix Joab chachax nayräx tuqita, qhipäx tuqit katuntatäñapäkän ukkhaxa, israelitanak taypit suma nuwasir soldadonak ajllïna, ukatsti sirio jaqinakar katuntañatakiw wakicht'asipxäna.

11Ukatsti, amonitanakar katuntañatakix Abisai jilaparuw maynïr tamanak katuyäna,

12juparusti sänwa: “Sirio jaqinakatix nayar atipjirjamäni ukkhaxa, jumaw nayar yanapirix jutäta, amonita jaqinakatix jumar atipjirjamäni ukkhasti, nayaw jumar yanapt'irix jutä.

13Markas laykux ch'amañchasim, Diosasan markanakap laykux ch'amamp nuwasiñäni. ¡Tatitusax kunjämtix munki ukham lurpan!” sasa.

14Joab chachasti soldado tamanakapampix sirio jaqinakar katuntiriw saräna, ukampis jupanakax jaltxapxänwa.

15Ukatsti kunapachatix amonitanakax sirio jaqinakar jaltxapxir uñjapxän ukkhaxa, jupanakax Abisai chachat jaltxapxarakïnwa, jupax Joab chachan jilapa, ukatsti markaruw imantasxapxäna. Ukhamasti Joab chachax Jerusalenaruw kutt'anxäna.

16Kunapachatix sirio jaqinakax israelitanakampi atipjat amuyasipxän ukkhaxa, khithanak khithapxäna, Éufrates jawira maykatankapkän uka sirio jaqinakan jutapxañapataki. Jupanak uñkatasinsti Sofac sat Hadad-ézer ejercitopan jilïripaw ukankaskäna.

17Ukampis taqi ukanak Davidarux yatiyapxäna, jupasti israelitanakar anthapisax Jordán jawir makhatapxäna, sarantasinsti jupanakar katuntañatakiw wakintayasipxäna. Davidasti sirio jaqinakamp nuwasiñatakix tamanakap wakt'ayäna, ukat jupanakax nuwasipxäna,

18ukampis sirio jaqinakax israelitanakat jaltxapxänwa, Davidasti pusi tunka waranqa kayuk sarantir soldadonak jiwarayäna, nuwasiñ carronakatsti paqallq waranqa soldadonak jiwarayarakïna; ukhamarus Davidax Sofac sat sirio ejerciton jilïrip jiwayäna.

19Hadad-ézer chachan arxatirinakapax israelitanakampi atipjat uñjasisax Davidampiw sumar mantapxäna, ukatsti jupan munañapar apnaqatäpxarakïnwa. Uka urutsti, sirio jaqinakax janiw amonita jaqinakarux wasitat yanapañ munkxapxänti.

← Chapter 18 Chapter 20 →