1 Chronicles 14

aymara-1997

1Tiro markankir Hiram reyix khithanak Davidan ukar jupa lanti khithäna, ukhamarus uta luririnakampi, k'ullu khithurinakampi, jupanakasti cedro lawanak reyin utap lurañatak apapxäna.

2Ukapachaw Davidax amuyäna, Tatitun Israel markxar reyit utt'ayxatapa, jupax Israel markapar munasax marka apnaqañap jiltayäna.

3Davidax Jerusalén markan juk'amp warminakanïnwa, ukatsti walja yuqall wawanakani, walja imill wawanakanïnwa.

4Jerusalén markan yurir wawanakapax akanakänwa: Samúa, Sobab, Natán, Salomón,

5Ibhar, Elisúa, Elpélet,

6Nógah, Néfeg, Jafía,

7Elisamá, Beeliadá, Elifélet ukanaka.

8Kunapachatix filisteonakax Davidar Israel markxar reyit utt'ayatätap yatipxän ukkhaxa, Davidarux taqiniw thaqtapxäna; ukampis Davidax ukham yatisax jupanakar jikxatiriw mistüna.

9Ukhamasti filisteonakax Refaim qhirwa chiqnäm jutantapxäna.

10Ukat Davidax Tatitur jiskt'äna: —¿Filisteonakarux katuntiristti? ¿Jupanakarux atipt'ayitasmati? —sasa. Tatitusti juparux sänwa: —Katuntaskakim, nayaw jupanakarux atipt'ayäma —sasa.

11Ukatsti Davidax Baal-perasim chiqaruw makhatäna, ukawjan jupanakarux atipjäna. Ukat jupax säna: “Diosax mä jalir umjam uñisirinakax taypir mantañatakix thakhi jist'ararapitu” sasa. Ukatsti Baal-perasim sasaw uka chiqarux sutichapxäna.

12Ukhamarus filisteonakax diosanakap apanukuwayapxäna, Davidasti ukanak ninampiw phichhantayäna.

13Ukampis filisteonakax wasitat Refaim qhirwa chiqa jutantasipkakïnwa.

14Ukhamasti Davidax mä kutimpiw Diosar jiskt'äna, Diosasti jupar sänwa: —Katuntañatakix jan nayräxat makhatamti, jan ukasti muyuntam, bálsamo sat quqanakar puripkät ukkhax qhipäxat katuntam.

15Kunapachatix quqanak patan jaqi sarnaqirjam ist'käta ukkhaxa, katuntam, ukasti juman nayraqatam nayan saraskatax yatiyani, filisteo ejercitor jiwarayañataki —sasa.

16Ukatsti Davidax kunjämtix Diosax jupar siskatayna ukham luräna, ukatsti filisteo ejercitorux Gabaón chiqat Guézer chiqakamaw atipjapxäna,

17ukham luratapasti taqi uraqpachan yatisïna, Tatiturakiw ukham luraskäna taqi markanakan jupar axsarañapataki.

← Chapter 13 Chapter 15 →