Psalms 140

Aymara Bible 1986 (Aymar Bibliia 1986)

1Tatay, ñankha lurir jaket jarc'akasita, khoru arun jaket imjjatita,

2jan wali lurañanac chuymapan amtapjje, sapüruw nuwasiñanac utjayapjje.

3Lajjrapajj asïrunacan lajjrapjam waquichatawa, arunacapasti catarinacan mich'ipjamawa.

4Tatay, ñankha lurir jaket arjjatita, khoru jakenacat imjjatita, tincuñajjatac sipitanac waquichirinacat jarc'aketa.

5Qhä jach'a jach'a tucur jakenacajj sipitanac waquicharapipjjetu; ñankha luririnacajj känanac jant'actatarapipjjetu, sarañajjarusti sipitanac uchantarapipjjetu.

6Nayasti Tatiturojj sistwa: “Jumaw Diosajjätajja, Tatay, jach'at mayisitajjarojj ist'aquimaya;

7Tatay, take ch'aman khespiyirejjay, jumaw nuwasïwin p'ekejjar imasctajja.”

8Tatay, janiquiy ñankha luririn munataparojj jaysamti, janiquiy amtäwinacapan sum sarantañap munamti. Janiquiy nayar uñisirinacajj p'ekenacap waytapjjpati; ñankhachatanacapajj jupanacar wact'pan.

10Nina sanc'a q'illiminac jupanacjjarojj jallpan, p'iyanacar wiñayatac jalantapjjpan.

11Lacarar jakejj oraken jan acht'pati, khoru jakerusti chijejj arctpan.

12Llaquit jaker Tatitun chekapar uñjatap yatta, t'akhesiyat jaker arjjatatap yatiracta.

13Asqui jakenacajj sutim jach'ar aptapjjani, chekap jaquir jakenacasti nayrakataman jacapjjani.

← Chapter 139 Chapter 141 →