Psalms 130

Aymara Bible 1986 (Aymar Bibliia 1986)

1Tatay, jach'a t'akhesiñ taypitpach art'asinsma:

2Tatay, arojjarojj ist'aquimaya; achict'asiñamp mayisitajjarojj jaysaquimaya.

3Dios Tatay, jumatejj takpach juchanac amjjäsiscaquismajja, ¿qhitirac nayrakataman sayt'aspasti?

4Ucampis jumaw juchanacat pampachapjjesta, uqhämat jumar wakaychañ yatichapjjesta.

5Takpach almajjampiw Tatitur suyt'ascta, takpach chuymajjampiw arunacapar iyawsaracta.

6Nayajj Tatituruw suyt'ascta, khanjtaniñap uñch'uquir jaket juc'ampi.

7Israel marca, Tatituruy suyt'am, qhuyapayasiñajj Tatitut juti, khespiyäwipajj jilarquiriw jutaraqui.

8Jupaw Israel marcarojj take juchanacapat pampachani.

← Chapter 129 Chapter 131 →