Isaiah 51

Aymara Bible 1986 (Aymar Bibliia 1986)

1“Ist'apjjeta take qhitinacatejj cheka chuymampi thakapquista, jacañsa munapjjaracta ucanaca —siw Tatitojja—. Uñtapjjam cawquïri karkat qhuchsutäpctatejj uca; cawqha kala ch'iyañat apsutäpctatejj uca;

2Abraham awquimaru, uqhamaraqui jumanacar jacañ churiri Sara taycamaru uñtapjjam. Cunapachatejj nayajj jupar jawscta ucqhajj sapaquïscänwa, ucampis nayajj bendistwa, walja wawanac churasa.

3Nayaw Sión marcarojj wal qhuyapayä, jupasti k'ala tucjatapunïnwa. Wasaranquir waña orakenacsti mä pankar yapuruw tucuyä, cunjämtejj Tatitojj Edén huerto usccänjja uqhama. Ucanwa cusisiñas, c'uchiquïñas utjani, uqhamaraqui Tatitur yupaychaña k'ochunacasa, suma k'ochunacasa.

4“Marcanaca, ist'apjjeta, jach'a marcanaca sum ist'apjjeta: Nayaw yatichäwinacajj khanañchä, camachi arunacajjasti marcanacataquejj mä khanäniwa.

5Atipjäwejjasti jac'anquiwa nayan khespiyasiñajjasti niyaw jutasqui, marcanacarusti ch'amajjampiraquiw apnakä. Kota tokenquir marcanacasti nayaruw suyt'apjjetani, ch'amajjaruraquiw alcatasipjjani.

6“Alajjpach toke uñtapjjam, uqhamaraqui aca orak tokerus uñtapjjaraquim. Alajjpachajj jek'er uñtataquiw chhaktjjani, orakesti mä isir uñtataquiraquiw merk'stjjani, ucan jaquir jakenacasti jisc'a chhichhillanqhanacar uñtataw jiwarapjjani; ucampisa, nayajj wiñayataquiw khespiyä, khespiyasiñajjasti janiw tucuscaniti.

7“Ist'apjjeta jumanaca, qhitinacatejj yatipcta cunatejj chekäqui uca, nayan yatichäwinacajj sum catoker marca. Jan ajjsarapjjamti jaken jan wali parlatanacapjja, janiraqui jaken jisc'achäwi arunacapampis sustjasipjjamti,

8thuthan tucjata isjamaw tucusipjjani, lak'on tucjat ch'anqhar uñtataraquiw tucusipjjani. Ucampisa nayan atipjañajjajj wiñayataquïniwa, khespiyasiñajjasti wiñayan” wiñayapataquïniwa.

9Sartasimay, sartasimay, Tatitun amparapa, ch'amañcht'asimay, sartasimay cunjämtejj nayrapachanacanjja sartasirïcta uqhama. Jumaw uca ajjsarcañ jach'a Rahab sat dragonarojj jisc'a jisc'a tucjtajja,

10jach'a lamar kotsa wañt'ayaractawa, jach'a p'iya mankhanquir umanacsa wañt'aytawa, jach'a kota mankhsti wañt'ayasinjja thaqui lurtajja, khespiyatanacajj uca cheka maqhatapjjañapataqui.

11Uqhamaraquiw Tatitun khespiyatanacapajj cuttanipjjani, Sión marcarusti cusisiñat arnakt'asisaw mantanipjjani, ajanunacapasti wiñayataquiw c'uchiquïni; cusisiñampi, sumancañampwa jicjjatapjjani, t'akhesiñasa, jachañasa tucusjjaraquiniwa.

12“Naya, naya quipcaw jumarojj ch'amachsma. ¿Qhitirus ajjsarta? ¿Jakenacaruti? ¿Jiwir jakenacaruti ajjsarta, qhitinacatejj korar uñtata tucusipjjani ucanacaru?

13¿Qhititejj alajjpachsa, acapachsa lurqui uca Tatitu Diosamatjja armasïtati, qhititejj alajjpacha janatati, oraksa utt'ayaraqui ucatjja? ¿Qhitinacatejj jumar tucjañataquejj jac'ancqui, wali colerata uñch'uquisctam ucanacataquejj qhathatiscaquïtati? Ucampis ¿cawquinquis colerasiñapajja?

14Qhititejj t'akhesiyatäcän ucajj janc'aquiw khespiyatäjjani; janiw calabozon jiwcjjaniti, janiraquiw jupataquejj t'ant'as pist'caraquiniti.

15“Nayätwa Tatitu Diosamajja, sutejjasti Take Ch'amani Tatitu satawa; nayaw jach'a kotjja onjjtayta, ucat mathapinacas wararipjjaraquiwa,

16nayaw alajjpach uscta, aca oraksa sum sayt'ayaractjja. Nayaraquiw lacamarus arunacajj uchtjja, amparajjampiraquiw arjjatsma. Nayaw Sión marcarojj ‘Jumajj marcajjätawa’ ” saractjja.

17Sartasim, sartasim, Jerusalén, sayt'asim. Jumaw Tatitun colerasiñapatjja t'akhestajja, cunjämtejj maynejj mä copa umt'asajj tak umsusajja machjasejja, uqhama.

18Take wawanacam taypinsti, janiw maynis jumar irpirejj utjquiti; take wawanac uywasta ucanacatsti, janiw maynis jumar amparat wayurejj utjquiti.

19Aca pä jan walt'añaw jumjjarojj juti, marcamajj tucjata, lunthatjataraquiwa uñjasi, jakenacamasti guerran mank'atjama jiwarapjjaraqui. ¿Qhitirac jichhasti jumat qhuyapt'ayasïtamsti? ¿Qhitirac chuymachätamsti?

20Wawanacamasti antílope sat animalar uñtata känampi catuntataw uñjasipjje, jan ch'amani, calle esquinanacan liwisipjje, Tatitun colerasiñapampi chhojjriñchjata, Diosaman chekachäwipampi t'akhesiyata.

21Ucatpï, jan cunan marca, acanac ist'amaya, jumajj machatätawa, ucampis janiw vinompiti;

22Tatitu Diosamajja, qhititejj marcaparu arjjatqui ucajj siwa: “Uca copa amparamat asakäma, cunampitejj jumajj machjascta uca; janiw jichhajj juc'ampi nayan colerasiñ copatjja umcjjätati.

23Nayaw uca copjja qhitinacatejj jumar t'akhesiyapcätam ucanacar churä, qhitinacatejj jumarojj sapcäyätam: ‘Oraker liwnoktam, juma patjjwa pasañ munapjjta’ sasa, jumasti liwnokttawa, lak'ar uñtata taquisitäñamataqui.”

← Chapter 50 Chapter 52 →