Isaiah 13

Aymara Bible 1986 (Aymar Bibliia 1986)

1Babilonia toke profecía arunaca, Amoz chachan Isaías yokapaw unañchäwi toke catokäna:

2“¡Mä k'ara kollun nuwantasiñataqui! chimpu aptapjjam. ¡Soldadonacarusti nuwantañataqui arsupjjaraquim! ¡Ampar aytapjjam sarantapjjañapataqui jach'a jilïrinacan puncunacap cheka mantasa!

3Wali ch'amani jakenacajjarojj niyaw jawsjjta, guerran alek nuwasirinacajjarusti arojja churaractwa, qhitinacatejj atipjatajjat cusisipqui ucanacaru, mutuyäwejja uñacht'ayañapataqui.”

4Kollunacansti walja jakenacan arnakasitanacapaw ist'asi. Marcanacan khothutitanacapas ist'asiraquiwa, cawquïri marcanacatejj tantacht'asqui ucanacana. Take ch'amani Tatitusti jupanacarojj uñaquiparaquiwa, qhitinacatejj nuwantasiñataqui janc'aquïpqui ucanacaru.

5Wali jaya marcatwa juti, jaken jan uñjcat jaya marcata. Ucasti Tatituwa, colerasiñapan phokt'ataw juti, take aca orakpacharu t'unjañataqui.

6Wararipjjam, Tatitun urupajj jac'anquiwa, take ch'amani Tatitun lekt'asinitapawa purini.

7Ucapachasti take jakenacaw ch'am jiwt'ayasipjjani, janiw cunataquis ch'amanacapajj utjcjjaniti,

8wali sustjataw kheparapjjaraquini. Mä jach'a t'akhesiñampi, llaquisiñampiw jupanacarojj jutaraquini, wawachasiri warmjamaw aykoñampi k'ewisipjjaraquini. Jupanaccamaw sustjata uñcatasipjjaraquini, p'enkasiñatsa ajanunacapajj naqharaquiniwa.

9Tatitun urupajj purinjjewa, ajjsarcañ uruwa, colerasiñampi phokhantataraquiw naqhi, aca orakerusti ch'usa wasara tucuyaraquini, uqhamaraqui jucharar jakenacarus tucjaraquiniwa.

10Warawaranacasti janiw juc'ampi alajjpachanjja khancjjaniti, intis jalsuncasaraquiw ch'amact'jjani, phajjsis janiraquiw juc'ampi khancjjaniti.

11Tatitusti siwa: “Acapacharojj ñankha luratapatjja mutuyäwa, ñankha jakenacarusti, jake jiwayatanacapatwa mutuyaraquï. Jach'a jach'a tucur jakenacarusti uca jach'a jach'a tucuñapjja tucjäwa, ñankha khoru jakenacarusti jisc'achjaraquïwa.

12Jakenacasti k'alaw tucusini, Ofiranquir suma korit sipansa juc'aniquïpjjaniwa.

13Ucapachaw alajjpachajj qhathatini, orakes yakha chekaruw jittaraquini, uca urun nayan colerasitajj laycu, colerasiñajjajj sinti jach'ätap laycuraqui.

14“Uca urunjja jakejj alisnakat taruja animaljamäniwa, jan ucajj ananucut tamjama, janiraquiw qhitis jupanacarojj mayjaru anthapirejj utjquiti. Sapakat mayniw marcapar cuttjjaraquini, pachpa orakeparuw jaltjjapjjani.

15Qhititejj jicjjatayascani ucasti puñalampi chhokhontataw uñjasini, uqhamaraqui qhititejj catjayascani ucasa jiwayataw uñjasiraquini.

16Jupanacan uñjcataw jisc'a wawanacaparojj oraker jisctas jiwarayapjjani; utanacapas aparataraquïniwa, warminacapas warmisitaraqui.

17Jupanacataquisti Medo jakenacwa sartayaraquëjja, uca jakenacasti janiw kollketjja llaquisipquiti, janiraquiw jupanacataquejj koris jila alanïcaraquiti.

18Waynanacarojj flechanacapampiw tincurayaraquini. Ucqha nacir asu wawanacatsa janiraquiw qhuyapt'ayasipquiti, jisc'a wawanacatsa janiw qhuyapt'ayasipcaraquiti.

19Marcanacataqui mä perlasjamäqui uca Babiloniasti, caldeo jakenacataqui korir uñtatäcaraqui uca marcajja, Sodoma, uqhamaraqui Gomorra marcjamaw tucusini, cunapachatejj nayajj uca marcanacar t'unjcäyätjja uqhama.

20Janipuniw jakejj ucanjja juc'ampi utjcjjaniti, janipuniw qhitis ucan juc'ampi jacjjaniti. Arabe jakenacajj janiw mayampsa ucar purisajj carpanacap sayt'ayascjjapjjaniti, janiraquiw awatirinacas uywanacapjja ucan samart'aycjjapjjaniti.

21Ucansti monte phisinacaquiw utj-jjani, utanacansti jucunacaquiw phokhantatäjjani, cunayman avestruz sat jach'a jamach'inacaquiw ucan utj-jjani, cabritonacaquiraquiw aywtjjani.

22Reyinacan utjañ utanacapansti kollu anunacaquiw wararjjani, suma c'ajquiri palacionacansti kamakenacaquiw utj-jjani. Babilonian urupasti jac'ancjjaraquiwa, janiw walja urunaca kheparcjjeti.”

← Chapter 12 Chapter 14 →