Ezekiel 41

Aymara Bible 1986 (Aymar Bibliia 1986)

1Ucatsti janc'aquiw uca jakejj templo mankhar irparaquitu, ucansti pilaranacwa tupt'araqui, paypach pilaranacasti lanqhurojj quimsa metroniraquïnwa.

2Puncusti anchorojj pheska metroniraqui, uca puncu apjjäsirinacasti sapa mayajja anchorojj pä metro chicataniraquïnwa. Ucatsti taypincqui uca jach'a uta tupt'araqui, ucasti anchorojj pä tunca metronïnwa, largorusti tunca metroniraqui.

3Ucatsti mankha tokencqui uca uta tupt'iriw sararaqui, ucansti mantañawjancqui uca pilaranacwa tupt'araquïna, sapa mayasti lanqhurojj quimsa metroncamänwa. Mantañasti anchorojj quimsa metronïnwa, ucanquiri pilaranacasti paypachajj quimsa metro chicataniraquïnwa lanqhurojja.

4Ucat uca mankhanquiri uta tupt'araqui, ucasti take tokerusa tunca metroncamänwa. Ucat nayarojj saraquitu: “Aca chekajj sinti kollanawa” sasa.

5Ucatsti uca jakejj janc'aquiw tupt'araquïna cawquïri perkatejj templot ankäjjancqui uca, ucasti lanqhurojj quimsa metroniraquïnwa. Templo muytpachansti ucampi mayachataraquejja, mankhäjjarusti pä metroni utanacaw ucan utjaraquïna.

6Uca jisc'a utanacasti mayajj maya patjjancänwa, uqhamat quimsa pisoni tucusaraqui, sapa pisonsti quimsa tunca jisc'a utanacaw utjaraquïna. Templon perkapasti sapa pisonwa juc'ampi jisc'aru tucuwayjjaraquïna, uca mantañanacjjaruw utanacan viganacapajj apjjatataraquïna, uqhamasti ucanacajj janiw perkaru uscuntatäpcänti.

7Uca utanac ankäjjansti, cawquïrinacatejj templo muytatäsipcäna uca jac'ansti mä maqhatañaw utjaraquïna, ucasti amstacamaw puriraqui, uqhamaw ucarojj maqhatatäna, mankhanquiri pisota taypincqui uca pisocama, uqhamaraqui amstancqui uca pisorusa.

8Nayasti uñjaractwa, take toketsa templojj mä alto chekaru utachataraquïnwa, uca quipcaraqui ucanquir jisc'a utanacas uqhama utachataraquiquïnwa. Uca utt'äwisti altorojj quimsa metroniraquïnwa.

9Uca utanacan ankäjja perkapasti anchorojj pä metro chicaniraquïnwa, templo muytatasti, cawquïri utanacatejja, sacerdotenacan utanacapa templo muytatäpcän ucanaca taypinjja mä ch'usa orakew utjaraquïna, ucasti anchorojj tunca metroniraqui.

11Uca utanacasti uca chekampiw jicthaptapjjaraquïna, amsta tokeru, aynach tokerusa mä puncu tokew jiquisiraquïna. Uca ch'usa orake utjcän ucansti mä perkaw utjaraqui anchorusti pä metro chicatani.

12Inti jalanta toketsti, ankäjja toker uñtata mä utaw utjaraquïna, ucasti anchorojj quimsa tunca pheskani metroni, largorusti pusi tunca pheskani metroniraqui, uca utan perkapasti anchorojj pä metro chicataniraquïnwa.

13Uca jakesti templorojj k'alwa tupt'araquïna, largorusti takpachajj pheska tunca metronïnwa. Takpacha uta ankäjjanacasti anchorojja, uqhamaraqui uca utasa, perkanacapasa pheska tunca metroniraquïnwa.

14Uca templon perkapasa, cawquïri uta ankäjjanacapatejj utjqui, inti jalsu tokenccäna, ucasti pheska tunca metroniraquïnwa.

15Ucatsti cawquïri utatejj templo khepäjjanccän ucwa tupt'araqui, takpacha uta ankäjja uñcatasïquisa uca, uqhamaraqui purapa tokenquir perkanacsa, ucanacasti pheska tunca metroniraquiquïnwa.

16Templo mankhanquiri utanacasti, mantaña uta ankäjjanacapasa maderampi imsutaraquïnwa. Ventananacasa fierronacampi uchataraqui ucar muytata marconaca utjcän ucanacasa maderampi imsutaraquiquïnwa quimsa toketpacha. Pisota ventananaccamasti, puncuta amsta tokerusa, maderanacampi imsutaraquiquïnwa. Templon perkanacapasti ankäjjatsa, uqhamaraqui mankhäjjatsa,

18chhekhaninacampi, uqhamaraqui palmera dibujatanacampi imsutaraqui. Uca chhekhaninacatsti sapa maynejj pä ajanuncamänwa;

19maysa toketjja mä jake ajanuw uñch'uquiscäna mä palmera aliru, mayasti mä leonan ajanuparaquïnwa, ucasti yakha palmera aliruw uñch'uquiscaraquïna.

20Uqhamaw muytpachana utjaraquïna, chhekhaninaca, uqhamaraqui palmeranaca dibujata, pisot kalltasina, puncu amstacama.

21Taypinquiri jac'a utansti puncu marconacapasa pilaranacapasa pusi esquinanïnwa.

22Sinti Kollana sat Lugara uñcatasinsti, mayaw utjaraquïna maderat lurat altarar uñtata, thiyanacapasti mä metroncamaraquïnwa, amstarusti mä metro chicatancamaraqui. Esquinanacanïnwa, thiyanacapasa utt'äwipasa maderat lurataraquïnwa. Ucat uca jakejj saraquitu: “Aca mesajj Tatitun nayrakatapancquisa uca mesawa” sasa.

23Taypinquiri jach'a utasa, uqhamaraqui Sinti Kollana sat Lugarasa purapar puncunacanïnwa, sapa maya puncusti paya jist'catañancama perka tokeruw jist'artapjjaraquïna.

25Taypinquiri jach'a utan puncunacapasti, chhekhaninaca uqhamaraqui palmeranaca dibujatänwa, cunjämatejj perkanacan utjcänjja uqhamaraqui. Mantaña tokenquiri utan perkapansti, ankäjja tokenjja maderat lurata rejaraquiw utjäna.

26Uca mantaña tokenquiri utansti purapa tokenjja ventananacaw utjäna suma rejanacampi uscuntata, palmeranaca dibujataraqui. Cawquïri utanacatejj temploru utachcatatäcäna ucanacasti hierrot lurat rejanacaniraquïnwa.

← Chapter 40 Chapter 42 →