2 Chronicles 23

Aymara Bible 1986 (Aymar Bibliia 1986)

1Ucat pakallk mararusti Joiada sacerdotejja acnïri capitananacaruw jawsayanïna: Jeroham chachan Azarías yokaparu, Johanán chachan Ismael yokaparu, Obed chachan Azarías yokaparu, Adaía chachan Maasías yokaparu, uqhamarac Zicri chachan Elisafat yokaparu, ucatjja jupanacarojj amtayänwa jupanacaru jakcattañapa.

2Jupanacasti Judá orakpachwa muytapjjäna, ucatsti mayachapjjänwa Judá orakpachanquiri take levitanacaru, uqhamarac Israelan familianacapan jilïrinacaparu. Ucatjja takpachanejja Jerusalenaruwa sarapjjäna.

3Ucan takeni tantachasipcäna ucanacawa reyimpi mä suma arust'äwiru mantapjjäna, Diosan templopana. Ucatsti Joiada sacerdotejj sänwa: “¡Acajjay reyin yokapajja jumanacan nayrakatamanquiwa! Juparuwa reyïñapajja wact'i, cunjämatï Tatitojj arsuwayqui Davidan saraker wawanacapatjja uqhamaru.

4Acwa jumanacajj lurapjjäta: jumanacata quimsïri partëqui qhitinacatejj sacerdotenaca levitanaca samarañ uruna servipcta ucanacajja, templon puncunacapwa uñjapjjäta;

5maynïri quimsïri partëqui ucasti, reyin palaciopancapjjaraquïtawa; uqhamarac maynïri quimsïri partëqui ucajja cimientonacan puncupancapjjaraquïtawa. Uccacamasti take marcpachawa templon uta ankäjjancapjjäta.

6Ucampis janiw qhitis templor mantaniñapäquiti, sacerdotenaca levitanaca ucan servisipqui ucanaca. Jupanacaquiwa templor mantañapajj waquisi Diosar loktatäpjjatap laycu, ucat ucjjar jakenacasti Tatitur jach'achañataquejja guardiatwa sayt'apjjani.

7Levitanacasti reyiruwa muyuntapjjani, sapa maynisa amparanacapana armanacas apt'atcama, ucatsti qhititï templor mantañpuni munani ucajja jiwaniwa. Jupanacasti uqhamaraquiw chekpacha sarapjjani, cawcqharutejj reyejj sarcani ucqhacama” sasa.

8Levitanacasa, uqhamarac Judá orakenquir take jakenacasa lurapjjänwa cuntï Joiada sacerdotejj siscäna take ucanaca. Sapa mayniwa tama jakenacapa p'ekechäna, qhitinacatejj samaraña uruna guardiata mantapcäna, uqhamarac mistupcäna ucanacatsa, Joiada sacerdotejj lurañanacapa tucuyapqui ucanacan sarjjañapjja janiw antutcänti.

9Ucatsti Joiada sacerdotejj capitananacarojj churänwa lanzanaca, uqhamarac take casta escudonacajj rey Davidanccäna ucanacsa, ucanacasti Diosan templopancascänwa.

10Ucjjarusti take jakenacwa puncuru ucharaquïna, templona cupëjja thiyata, maysa ch'ekäjjcama, ucatsti altara muytpachanjja sapa mayniwa lanzancamäna reyiru imapjjañapataqui.

11Ucatsti Joiada sacerdotempi, yokanacapampejja reyin yokaparuwa irpsunipjjäna, corona p'ekepjjaru uchasa, uqhamarac catuyapjjäna Diosan leyi kellkatanacapa. Juparu aceitempi warjjatasinjja, reyitwa utt'ayapjjäna. Ucatsti takeniwa cusisiñat art'apjjäna: “¡Jacpan reyejja!” sasa.

12Cunapachatï Atalía warmejj jakenacan arnakasitanacapa ist'äna uqhamarac reyirusa jach'añchiri ist'äna ucqhajja, temploruw saräna cawqhantï takenis ucancapcäna ucaru.

13Ucansti jupajj reyiruwa ujäna mantañawjana jakenacapajj cayutcama sayt'atäsipcäna uca taypina. Reyin thiyapansti jilïrinacaw ucancapjjäna, uqhamarac música bandasa, jakenacasa cusisitäpjjänwa trompetanaca tocasina; k'ochurinacasti tocañ instrumentonacampiwa, yupaychaña k'ochunaca sarayapjjäna. Atalía warmisti uqham uñjasinjja isipwa ch'iyanokasïna, aqham sasa: “¡Nayarojj ch'ojjña lurapjjestajja!” sasa.

14Ucatsti Joiada sacerdotejja ejercitona capitananacaparojja ankaruw irpsuyanïna aqham säna: “¡Jakenaca taypitjja uca warmirojja apsum, ucatsti qhititï jupar arccani ucarusti cuchillompi jiwayapjjam!” sasa. Cunjämatï sacerdotejj siscäna Tatitun templopana jan jiwayañapjja,

15uca warmiru preso catuntasinjja reyin palacioparu sarqui uca caballería puncunjamwa apsupjjäna, ucanaracwa juparojj jiwayapjjäna.

16Ucatsti Joiada sacerdotejja take jakenacampi, reyimpi cunawa mä suma parlt'äwiru mantäna, jupanacajj Tatitun marcapäpjjañapataqui.

17Ucatjja Baal diosan temploparu sarasinjja tucjapjjänwa, altaranacapa allthapisa, uqhamarac diosanacapsa. Baal diosan Matán sacerdoteparusti altaranac patjjaruwa qharinucupjjäna.

18Ucjjarusti Joiada sacerdotejja Tatitun temploparojja guardianacwa uchäna, sacerdotenacana, levitanacana, qhitinacarutejj Davidajj lurapjjañapataqui wact'aycäna templona serviñataqui, Tatitur take nact'ayata loktäwinaca loktasina. Ucasti lurasïnwa cunjämatï Moisesan leyipana kellkatäcäna uqhamaru, cusisiñampi k'ochusina cunjämatï Davidajj wact'ayawaycäna uqhamaru.

19Uqhamaraquiw puncu uñjirinaca ucharaquïna Tatitun temploparu mantañawjanacaru, uqhamata jan qhitisa cunjämatsa mantañapataqui jan luräwinacaru phokhasa k'añu mantañapataqui.

20Ucatjja irptawayasina capitananacaru, wali aytata jakenacaru, marcanaca apnakeri jakenacaru, uqhamarac take jakenacaru, reyimpi chicpachawa sarapjjäna Tatitun templopata, reyin palaciopcama, patäjja puncuta mantanisina. Ucatsti reyirojj kont'ayapjjänwa reyin tronoparu,

21ucatjja take marcpachawa cusisipjjäna. Cunjämatï Atalía warmejj espadampi jiwayatänjja ucatjja marcajj samarañanwa jicjjatasjjäna.

← Chapter 22 Chapter 24 →