Zechariah 9

awadhi

1एक ठु भविस्सबाणी: यहोवा क सँदेसा हद्राक क देस अउ ओकर राजधानी दमिस्क क खिलाफ अहइ। इ सँदेसा इ बिदेसी देस क बारे मँ दीन्ह ग रहा। काहेकि न सिरफ इस्राएल क परिवार समूह बल्कि सबइ मानव जाति यहोवा क मदद बरे ओकरी कइँती लखत अहइँ।

2इ भविस्सबाणी भी हामात क खिलाफ अहइ जउन हद्राक क चउहद्दी मँ अहइ। इ भविस्सबाणी सोर तथा सीदोन क भी खिलाफ अहइँ भले ही उ बहोत बुद्धिमान अहइँ।

3सोर एक ठु किला क नाई बना अहइ। हुआँ क लोग चाँदी ऍतना बटोर लिहे अहइँ, कि उ धूलि क नाईं सुलभ बाटइ अउर सोना ऍतना साधारण अहइ जइसे माटी।

4मुला अब यहोवा ओकरे सबइ अधिकार क लेइ बरे जात ह। उ पचे ओकर सक्तीसाली नौसेना क नस्ट करी अउर उ सहर आगी स नस्ट होइ जाइ।

5अस्कलोन मँ रहइवाले लोग इ सबइ घटना क लखिहीं अउ उ पचे डेरइहीं। अज्जा क लोग काँप उठिहीं अउ एक्रोन क लोग समूची आसा क तजि देइहीं, जब उ पचे ओन घटनन क होब होत लखिहीं। अज्जा मँ कउनो राजा बचा नाहीं रही। कउनो भी मनई अब अस्कलोन मँ नाहीं रही।

6अस्दाद मँ बहोत सारा लोग इ भी नाहीं जानिहीं कि ओनकर पिता कउन अहइँ, “अउ मइँ पलिस्ती लोगन घमण्ड क हटाइ देब।

7मइँ उ पचन्क मुँह स उ पचन्क गोस क लइ लेब जेहमाँ खून अहइ; मइँ उ पचन्क क उ घृणित भोजन क लइ लेब जउन ओकर दाँतन क बीच होइ। सबइ जिअत बचा भवा प्राणियन मोर परमेस्सर स सम्बन्धित होइ। तउ उ यहूदा क बंसज क नाईं होइ जाब्या, अउर एक्रोन क लोग यबूसी लोग क जइसा होइ जाइ।

8मइँ आपन मन्दिर पइ सिबिर लगाउब। मइँ ओकर रच्छा सिपाही ह रूप मँ ओन लोगन स करब जउन आइ अउर हमला करइ बरे जाइ। कउनो अत्याचारी मोर लोगन क खिलाफ अउर नाहीं बढ़ सकब, काहेकि मइँ ओका निहारत हउँ।”

9हे बिटिया सिय्योन, खुश ह्वा! हे बिटिया यरूसलेम, आनन्द स चिल्लावा! लखा, तोहार राजा तोहरे लगे आवत बाटइ। उ विजय पावइवाला नीक अहइ। उ विनम्र स गदहा पइ, एक ठु गदहा क बच्चा पइ सवार अहइ।

10राजा कहत ह, “मइँ एप्रैम मँ रथन क अउ यरूसलेम मँ घुड़सवारन क बर्बाद किहेउँ। मइँ जुद्ध मँ प्रयोग कीन्ह गए धनुसन क नस्ट किहेउँ।” दूसर रास्ट्र सान्ति-सन्धि क बातन सुनेन। उ राजा सागर स सागर तलक राज्ज करी। उ नदी स लइके धरती क दूरतम जगहियन पइ राज्ज करी।

11यरूसलेम हम आपन वाचा क खून स मूहरबन्द किहेउँ। एह बरे मइँ तोहरे पचन्क बन्दियन क अजाद कइ दिहेउँ, तोहार लोग अब सूनी जेल मँ अब नाहीं रहि गएन।

12बन्दियो, अपने घरे जा। अब तोहरे लगे आसा करइ बरे कछू अहइ। अजु मइँ तू पचन्क दुई गुणा आसीर्बाद देब।

13यहूदा, मइँ तोहार पचन्क उपयोग एक धनुस-जइसा करब। एप्रैम मइँ पचन्क उपयोग बाणन जइसा करब। इस्राएल, मइँ तोहार पचन्क उपयोग यूनान स लड़इ बरे मजबूत तरवार जइसा करब।

14यहोवा ओह पइ परगट होइ, अउर ओकर बाण बिजुली की तरह चलाई। यहोवा, मोर सुआमी तुरही बजाई। फउज मरुभूमि क तूफान क नाईं आगे बढ़ी।

15सर्वसक्तीमान यहोवा ओनकर रच्छा करी। फउजी पाथर अउ गुलेल क उपयोग दुस्मन क हरावइ मँ करिहीं। उ पचे आपन दुस्मनन क खून बहइहीं, उ दाखरस जइसा बही। इ वेदी क कोनन पइ पेके गए खून जइसा होइ।

16उ समइ, ओनकर परमेस्सर यहोवा आपन लोगन क वइसेन ही बचाइ, जइसे गड़रिया भेड़िन क बचावत ह। उ पचे ओकरे बरे बहोत मूल्यवान होइहीं। उ पचे ओनके हाथन मँ जगमगात रतन स होइहीं।

17हर एक चीज नीक अउ सुन्नर होइ। हुआँ अद्भुत फसल होइ, मुला हुआँ केवल अन्न अउ दाखरस नाहीं होइ। हुआँ युवक अउ युवतियन होइहीं।

← Chapter 8 Chapter 10 →