Numbers 36

awadhi

1मनस्से यूसुफ क पूत रहा। माकीर मनस्से क पूत रहा। गिलाद माकीर क पूत रहा। गिलाद परिवार क नेता मूसा अउ इस्राएल क परिवार समूहन क नेता लोगन स बात करइ गएन।

2उ पचे कहेन, “महोदय, यहोवा हमलोगन क लौटरी क आधार पइ भूइँया बाटइँ क हुकम दिहस ह। अउर महोदय, यहोवा हुकुम दिहस कि सलोफाद क भुइयाँ ओकरी बिटियन क मिलइ। सलोफाद हम लोगन क भाई रहा।

3इ होइ सकत ह कि कउनो दूसर परिवार समूह क मनई सलोफाद क कउनो बिटिया स बियाह करइ। का उ भुइँया हमरे परिवारे स निकरि जाइ? का उ दूसरे परिवार समूह क मनई उ भुइँया क पाइ लेइहीं? का हम लोग उ भुइँया क खोइ देब जेका हम लोग लौटरी क आधार प पावा ह।

4लोग आपन भुइँया बेचं-बिकिन सकत हीं। मुला जुबली क बरिस मँ सारी धरती उ परिवार समूह क लउटी जात ह जउन एकर असली मालिक होत ह। उ टेमॅ सलोफाद क बिटियन क भुइयाँ कउन पाई? अगर वइसा होत ह तउ हमार परिवार उ भुइयाँ क सदा न पाइ सकी।”

5मूसा इस्राएल क लोगन क इ हुकुम दिहस। इ हुकुम यहोवा क रहन “युसूफ क परिवार समूह क इ सबइ मनई ठीक कहत हीं।

6सलोफाद क बिटियन बरे इ हुकुम अहइ: जदि तू कउनो स बियाह करइ चाहति हउ तउ तोहका आपन परिवार समूह क कउनो मनई क संग बियाह करइ चाही।

7इ तरह इस्राएल क लोगन मँ भुइयाँ एक परिवार समूह स दूसर परिवार समूह मँ नाहीं जाइ। हर एक इस्राएली आपन पुरखन क भुइँया क ही आपन लगे रखी।

8अउर जदि कउनो बिटिया बाप क भुइँया पाइ जात ह तउ ओका आपन परिवार समूह मँ स ही कउनो क संग बियाह करइ चाही। इ तरह हर एक मनई उहइ भुइयाँ अपने लगे रखी जउन ओकरे पुरखन क रही।

9इ तरह इस्राएल क लोगन मँ एक परिवार समूह स दूसर परिवार समूह मँ न जाइ। हर एक इस्राएली उ भुइँया रखी जउन ओकरे आपन पुरखन क रही।”

10सलोफाद क बिटियन, मूसा दुआरा प्राप्त भवा यहोवा क हुकुम क पालन किहेस।

11एह बरे सलोफाद क बिटियन महला, तिर्सा, होग्ला, मिल्का अउ नोआ आपन चचेरा भाइयन क संग बियाह किहन।

12ओनकइ भतार मनस्से क परिवार समूह क रहेन। एह बरे ओनकइ भुइँया ओनके बाप क परिवार अउ परिवार समूह क बनी रही।

13इ तरह उ सब कनून अउ हुकुम यरीहो क पार स यरदन नदी क किनारे मोआब इलाका मँ यहोवा मूसा क दिहे रहा। मूसा यहोवा क ओन कनूनन क अउ हुकुमन क इस्राएल क लोगन क दिहस।