Isaiah 52

awadhi

1जाग उठा! जाग उठा हे सिय्योन! आपन वस्त्र क धारण करा, तू आपन सक्ति स भरा। हे पवित्तर यरूसलेम, तू खड़ा होइ जा। अइसे उ सबइ लोग जेनका परमेस्सर क अनुसरण करब कबूल नाहीं अहइ अउर जउन स्वच्छ नाहीं अहइँ, तोहमाँ फुन प्रवेस नाहीं कइ पइहीं।

2तू धूरि झाड़ द्या, तू आपन सुन्नर ओढ़ना धारण करा। हे यरूसलेम, हे सिय्योन क बिटिया, तू एक बन्दिनी रहिउ किन्तु अब तू खुद क आपन गटई मँ बँधी जंजीरन स मुक्त करा।

3यहोवा क कहत ह, “तोहका धन क बदले मँ नाहीं बेचा गवा रहा, एह बरे जब मइँ तोहका आजाद करब तउ कउनो धन नाहीं देइ पड़ी।”

4मोर सुआमी यहोवा कहत ह, “मोर लोग बस जाइ बरे पहिले मिस्र मँ गवा रहेन, अउर फुन उ पचे दास बन गएन। पाछे अस्सूर ओनका बेकार मँ ही दास बनाइ लिहे रहा।

5अब लखा, इ का होइ गवा अहइ। अब कउनो दूसर रास्ट्र मोरे लोगन क लइ लिहे अहइ। मोरे लोगन क लइ जाइ बरे इ देस कउनो भुगतान नाहीं किहे रहा। इ देस मोरे लोगन पइ हुकुमत करत ह अउर ओनकर हँसी उड़ावत ह। हुवाँ क लोग सदा ही मोरे बरे बुरी बातन कहा करत हीं।”

6यहोवा कहत ह, “अइसा एह बरे भवा कि मोरे लोग मोरे बारे मँ जानइँ। मोरे लोगन क पता चलि जाइ कि मइँ कउन हउँ? मोरे लोग मोर नाउँ जान जइहीं अउर ओनका इ भी पता चल जाइ कि उ मइँ ही हउँ जउन ओनसे बोलन हउँ।”

7सुसमाचार क संग पहाड़न क उपर स आवत भए संदेसवाहक क लखब निहचय ही एक अद्भुत बात अहइ। कउनो संदेसवाहक क इ घोसणा करत भए सुनब केतना अद्भुत अहइ: “हुवाँ सान्ति क निवास अहइ, हम बचाइ लीन्ह गए अही। तोहार परमेस्सर राजा अहइ।”

8नगर क रखवारे जयजयकार करइ लागेन ह। उ पचे आपुस मँ मिलिके आनन्द मनावत अहइँ। काहेकि ओनमाँ स हर एक यहोवा क सिय्योन क लउटिके आवत भए लखत अहइ।

9यरूसलेम तोहार उ सबइ भवन जउन बर्बाद होइ चुके अहइँ फुन स खुस होइ जइहीं। तू पचे सबहिं आपुस मँ मिलिके आनन्द मनउब्या। काहेकि यहोवा यरूसलेम पइ दयालु होइ जाइ, यहोवा आपन लोगन क उद्धार करी।

10यहोवा सबहिं रास्ट्रन क ऊपर आपन पवित्तर सक्ति दर्साइ अउर सबहिं उ सबइ देस जउन दूर-दूर बसा अहइँ, लखिहीं कि परमेस्सर आपन लोगन क रच्छा कइसे करत ह।

11तू लोगन क चाही कि बाबुल छोड़ जा। उ जगह छोड़ द्या। हे लोगो, ओन वस्तुअन क लइ चलइवाले जउन उपासना क काम आवति हीं, अपने आप क पवित्तर करा। अइसी कउनो भी वस्तु जउन पवित्तर नाहीं ओका जिन छुआ।

12तू पचे बाबुल तजब्या किन्तु हाली मँ तजइ क तू पचन्पइ कउनो दबाव नाहीं होइ। तू पचे चलिके बाहेर जाब्या अउर यहोवा तू पचन्क संग संग चली। तू पचन्क क अगुवाई यहोवा ही करी अउर तोहार पचन्क रच्छा बरे इस्राएल क परमेस्सर पाछे-पाछे भी होइ।

13“मोरे सेवक कइँती लखा। इ बहोत सफल होइ। इ बहोत महत्वपूर्ण होइ। अगवा चलिके लोग ओका आदर देइहीं अउर ओकर सम्मान करिहीं।

14किन्तु बहोत स लोग जब मोरे सेवक क लखेन तउ उ पचे भौचक्के रहि गएन। मोर सेवक एतना बुरी तरह स सतावा ग रहा कि उ पचे ओका एक मनई क रूप मँ बड़ी दिक्कत स पहचान पाएन।

15किन्तु बहोत सारे रास्ट्रन भी चकित होइहीं। राजा ओका लखिके अचरजे मँ पड़ि जइहीं अउर एक सब्द भी नाहीं बोल पइहीं। उ मोर सेवक क बारे मँ नाहीं सुनी ही किन्तु जउन कछू भवा रहा उ पचे ओका लखे रहेन। उ लोग ओकर बारे मँ सुने भर नाहीं रहेन किन्तु ओका समझे रहेन।”

← Chapter 51 Chapter 53 →