Hosea 7

awadhi

1“जब मइँ आपन लोगन क सज़ा देइ बन्द करब अउर जब मइँ ओनका बन्दी स वापिस लिआउब अउर इस्राएल क चंगा करब। तब लोग एप्रैम क पाप जान लेइहीं। अउर हरकोइ सोमरोन मँ लोगन क कीन्ह भवा बुरा कामन क बारे मँ जानइ लेइहीं: उ पचे लबार देवतन बनाएन, चोरन घरे मँ घुसेन, लुटेरन क दल गलियन मँ लोगन क लुटेन।

2उ पचे इ नाहीं जान पावत ह कि मइँ ओनकर बुरा कामन क याद रखत हउँ। ओका बिस्सास नाहीं करत ह कि हर एक चीज जउन उ किहेस मइँ ओका साफ-साफ लखेत हउँ।

3उ पचे आपन कुकरमन स आपन राजा क खुस करत हीं। ओकर लबार ओकरे मुखियन क खुस करत हीं।

4रोटी पकावइवाला रोटी बरे आटा मढ़त ह। मुला उ आगी क तब तलक नाहीं दहकावत जब तक कि गोंधा भवा आटा फूल न जाइ। मुला इस्राएल क लोग उ रोटी पकावइवाला क नाईं नाहीं अहइ, उ पचे आपन उमंग हर समइ दहकावत ह।

5ओकरे राजा क उत्सव क दिन मँ, राजकुमार दाखरस पिअइ सुरु कइ दिहेस। राजा ओन लोगन क संग समझौता करत ह जउन ओकरे संग हँसी-मजाक करत हीं।

6उ पचे ओकरे लगे आवत ह। उ पचे ओनकर खिलाफ खुफिया साज़ि रचत ह। अउर उ तंदूर क नाईं दहकत रहत हीं। सारी रात ओकर गुस्सा धीरे-धीरे पाकत ह, अउर भिंसार होत होत उ भभकत भवा आगी क नाईं तेज होइ जात ह।

7उ पचे मूँड़ भभकत भए तन्दूर क जइसा अहइँ; उ पचे आपन ही मुखियन क नस्ट कइ दिहेन ह। ओनकर सबइ राजा लोगन्क पतन एक ही तरह स भवा रहा, मुला ओनमाँ स कउनो भी परमेस्सर क मदद बरे कोहाइ क जतन नाहीं किहे रहेन।”

8“एप्रैम दूसर जातियन क संग घुल-मिल गएन, मुला इ अइसा होइ जइसा कि रोटी सिरिफ एक ही तरफ स सेंका गवा ह।

9बिदेसयन एप्रैम क ताकत निगल गएस ह, किन्तु उ ओका नाहीं जान पाए। ओकरे बार भी सफेद होइ लाग, किन्तु ओका एकर पता नाहीं चला।

10इस्राएल क आपन क घमंड ही ओह पइ इलज़ाम लगावत ह, लेकिन फिर भी उ यहोवा आपन परमेस्सर क लगे नाहीं लउट ह। जदपि इ सबइ बात घटिहीं, तउ प भी उ यहोवा क नाहीं खोजिहीं।

11एप्रैम उ भोला कबूतरे क नाई बन गवा अहइ जेकरे लगे कछू भी समुझ नाहीं होत ह। लोग मिस्र स मदद माँगेन अउर लोग अस्सूर क सरण मँ गएन।

12जहाँ कहूँ भी उ जाई, मइँ ओका आपन जाले मँ फँसाउब अउर मइँ ओनका अइसे खाले हींच लेबउँ जइसे अकासे क पंछी हींच लीन्ह जात हीं।

13ओह प हाय, काहेकि कि उ पचे मोका तजि दिहेस ह। उ पचे नस्ट होइ काहेकि उ मोर खिलाफ बिद्रोह किहेन ह। मोका ओनका बचाइ बरे कछू धन दीन्ह जाइ चाही रही अउर ओकर धियान दीन्ह जाइ चाहत रही, मुला उ पचे मोर बरे झूठ बोलत हीं।

14उ पचे पराथना मँ कबहुँ मोका पूरा हिरदइ स नाहीं गोहॅरान। उ पचे आपन बिछउना मँ अनाज अउर दाखरस बरे गोहॅरावत हीं, अउर उ पचे दूसर देवतन बरे रीतियन क पूरा करत ह तउ आपन सरीर क घायल करत ह। उ पचे अपने पीठियन क मोर कइँती मोड़ दिहेस हीं।

15मइँ ओनका अनुसासन दिहे रहेउँ ह अउर ओनकर भुजा बलवान बनाए रहेउँ ह, मुला उ पचे मोरे विरोध मँ बुरा सड्यंत्र रचेन।

16उ पचे पूजा बरे झूठे देवन कइँती मुड़ा भवा धनुस क नाई जउन फेंकइ क पस्चात वापस आवत हीं, क तरह मुड़ गएन ह। ओनकर मुखिया लोग आपन ही सक्ति क सेखी बघारत रहेन, मुला ओनका एक तरवार मउत क घाट उतारा जाइ। मिस्र मँ हर कोइ ओन पइ हँसिहीं।

← Chapter 6 Chapter 8 →