1 Chronicles 11

awadhi

1इस्राएल क सबहिं लोग हेब्रोन नगर मँ दाऊद क लगे गएन। उ पचे दाऊद स कहेन, “हम तोहार ही रक्त-माँस अही।

2बीते दिन मँ, जब साऊल राजा रहा तब भी हमार तू जुद्ध मँ सन्चालन किहा। हे दाऊद, यहोवा तोहसे केहस, ‘तू मोरे लोगन क गड़रिया रहब्या। तू मोरे लोगन क ऊपर सासक होब्या।’”

3इस्राएल क सबहिं प्रमुखन दाऊद क लगे हेब्रोन नगर मँ आएन। दाऊद हेब्रोन मँ ओन प्रमुखन क संग यहोवा क सामने एक समझौता किहस। प्रमुखन दाऊद क अभिसेक किहन। इ तरह उ इस्राएल क राजा बन गवा। यहोवा समूएल दुआरा इ बचन दिहे रहा कि इ होइ।

4दाऊद अउ इस्राएल क सबहिं लोग यरूसलेम नगर क गएन। यरूसलेम ओन दिनन यबूस कहा जात रहा। उ नगर मँ रहइवाले यबूसी कहे जात रहेन।

5उ नगर क निवासी लोग दाऊद स कहेन, “तू हमारे नगर क प्रवेस नाहीं कइ सकत्या।” किन्तु दाऊद ओन लोगन क पराजित किहस। दाऊद सिय्योन क किले पइ कब्जा कइ लिहस। इ जगह “दाऊद नगर” बना।

6दाऊद कहेस, “उ मनई जउन यबूसी लोगन पइ आक्रमण क संचालन करी, मोर पूरी फउज क सेनापति होइ।” एह बरे योआब आक्रमण क संचालन किहस। योआब सरूयाह क पूत रहा। योआब सेना क सेनापित होइ गवा।

7तब दाऊद किला मँ आपन महल बनाएस। इहइ कारण अहइ ओकर नाउँ दाऊद नगर पड़ा।

8दाऊद किले क चारिहुँ कइँती नगर बसाएस। उ एकॉ मिल्लो स नगर क चारिहुँ कइँती की दीवार तलक बसाएस। योआब नगर क दूसर भागन क मरम्मत किहेस।

9दाऊद लगातार महान बनता गवा। सर्वसक्तीमान यहोवा ओकरे संग रहा।

10दाऊद क बिसिस्ठ बीरन क ऊपर क प्रमुखन क इ सूची अहइ: इ सबइ बीर दाऊद क संग ओकरे राज्ज मँ बहोत सक्तीसाली बन गएन। उ पचे अउ इस्राएल क सबहिं लोग दाऊद क सहायता किहन अउर ओका राजा बनाएन। इ ठीक वइसा भवा जइसा परमेस्सर बचन दिहे रहा।

11इ दाऊद क बीर मनइयन क सूची अहइ: यासोबाम हक्मोनी लोगन मँ स रहा। यसोबाम राजा क बिसिस्ठ फउज क प्रमुख रहा। यसोबाम अपने भाले क उपयोग तीन सौ मनइयन स जुद्ध करइ बरे किहस। उ एक ही दाईं ओन तीन सौ मनइयन क मार डाएस।

12एलीआज़ार दोदो क पूत, अदोही स रहा। एलीआज़ार तीन बीरन मँ स एक रहा।

13एलीआज़ार पसदम्मीम मँ दाऊद क संग रहा। पलिस्ती लोग उ जगह पइ जुद्ध करइ आएन। उ जगह पइ एक जौ स भरा खेत रहा। उहइ जगह, जहाँ इस्राएली लोग पलिस्ती लोगन स भागे रहेन।

14किन्तु उ सबइ तीन बीर उ खेत क बीच रुक गएन अउर पलिस्तियन स लड़ेन अउ ओनका हराइ डाएन अउर इ तरह यहोवा इस्राएलियन क बड़ी जीत दइ दिहस।

15एक दाई, दाऊद, अदुल्लाम गुफा क लगे रहा अउर पलिस्ती फउज खाले रपाईम क घाटी मँ रही। तीस बीरन मँ स तीन बीरन उ गुफा तलक, लगातार रेंगत भए दाऊद क लगे पहोंचेन।

16दूसर अवसर पइ, दाऊद किले मँ रहा, अउर पलिस्ती सेना क एक समूह बेतलेहेम मँ रही।

17एक बार दाऊद कहेस, “कास कउनो मोका बेतलेहेम नगर क दुआर क लगे क कुआँ स थोड़ा पानी लाइके पिलातेन!”

18तब तीन बीरन पलिस्ती सेना क बीच जुद्ध करत भए अपना रास्ता बनाएन अउर नगर-दुआर क निचके बेतलेहेम क कुएँ स पानी लिहन। तीनहुँ बीरन दाऊद क लगे पानी लइ गएन। दाऊद पानी पिअइ स इन्कार कइ दिहस। उ उ पानी क यहोवा बरे भेंट क रूप मँ बाहेर उड़ेर दिहस।

19दाऊद कहेस, “परमेस्सर, मइँ इ पानी क नाहीं पी सकत। एन मनइयन मोरे बरे इ पानी क लिआवइ मँ अपनी जिन्नगी क खतरे मँ डाएन। एह बरे जदि मइँ इ पानी क पिअत हउँ तउ इ ओनकर खून पिअइ क समान होइ।” एह बरे दाऊद उ जल क पिअइ स इन्कार किहस। तीनहुँ बीर उ तरह क बहोत स बहादुरी क काम किहन।

20योआब क भाई, अबीसै, तीन बीरन क प्रमुख रहा। उ अपने भाले स तीन सौ मनईयन स लड़ा अउर ओनका मार डाएस। अबीसै तीन बीरन क तरह मसहूर होइ गवा।

21अबीसै उ तीनहुँ बीरन स दुइगुना जियादा प्रसिद्ध रहा। उ ओनकर प्रमुख होइ गवा, जदपि उ तीनहुँ बीरन मँ स नाहीं रहा।

22यहोयादा क पूत बनायाह, कबजेल क एक बीर जोधा रहा। उ एक सक्तीसाली मनइ क पूत रहा। बनायाह अनेक बीरता क काम किहेस। उ मोआब देस क दुइ सर्वोत्तम सिपाहियन क मार डाएस। एक दिन जब बर्फ गिरत रही, उ जमीन क अन्दर एक ठु माँदे मँ घुसा अउर हुवाँ एक सेर क मार डाएस।

23बनायाह मिस्र क एक मनई क मार डाएस। उ मनई लगभग साढ़े सात फिट ऊँचा रहा। उ मिस्र क मनई क लगे एक बहोत बड़का अउ भारी भाला रहा। इ बुनकर क करघे क बिसाल खम्भे क नाईं रहा अउर बनायाह क लगे सिरिफ एक ठु लाठी रही। किन्तु बनायाह मिस्री स भाला छोर लिहस। मुला बनायाह मिस्री स भाले क छीन लिहेस। बनायाह मिस्री मनई क भाले क उपयोग किहेस अउर ओका मार डाएस।

24इ सबइ कार्य रहेन जेनका योहयादा क पूत बनायाह किहस। बनायाह तीन बीरन क तरह प्रसिद्ध भवा।

25बनायाह तीस बीरन मँ सब स जियादा मसहूर रहा, मुला उ तीनहुँ बीरन मँ स नाहीं रहा। दाऊद बनायाह क अपने अंगरच्छकन क प्रमुख चुनेस।

26इ सबइ राजा क बिसिस्ठ फउज मँ स रहेन: असाहेल, योआब क भाई, एल्हानान, दोदो क पूत बेतलेहेम नगर क रहा,

27हरोरी लोगन मँ स सम्मोत, पलोनी लोगन मँ स हेलेस;

28इक्केस क पूत, ईरा, ईरा तकोई नगर क रहा, अनातोत नगर क अबीएजेर;

29होसती लोगन मँ स सिब्बके, अहोही स ईलै;

30नतोपाई लोगन मँ स महरै; बाना क पूत हेलेद, हेलेद नतोपाई लोगन मँ स रहा;

31सीबै क पूत इतै, इतै बिन्यामीन क गिबा नगर स रहा, पिरातोनी लोगन मँ स बनायाह;

32गास घाटियन स हूरै; अराबा लोगन मँ स अबीएल;

33बहूरीमा लोगन मँ स अजमावेत; सल्बोनी लोगन मँ स एल्यहबा;

34गीजोई लोगन मँ स हासेम क पूतन; सागे क पूत योनातन, योनातन हरारी लोगन मँ स रहा।

35सकार क पूत अहीआम, अहीआम हरारी लोगन मँ स रहा; ऊर क पूत एलीपाल;

36मेकराई लोगन मँ स हेपेर; पलोनी लोगन मँ स अहिय्याह;

37कर्मेली लोगन मँ स हेस्रो, एज्बै क पूत नारै;

38नातान क भाई योएल; हाग्री क पूत मिभार,

39अम्मोनी लोगन मँ स सेलेक; बरोती नहरै, (नहरै योआब क कवचवाहक रहा। योआब सरूयाह क पूत रहा।)

40येतेरी लोगन मँ स ईरा; इथ्री लोगन मँ स गारेब,

41हित्ती लोगन मँ स ऊरिय्याह; अहलै क पूत जाबाद;

42सीजा क पूत अदीना, सीजा रूबेन क परिवार समूह स रहा। (अदीना रूबेन क परिवार समूह क प्रमुख रहा। परन्तु उ भी अपने संग क तीस बीरन मँ स एक रहा।);

43माका क पूत हानान; मेतेनी लोगन मँ स योसापात;

44असतारोती लोगन मँ स उज्जिय्याह; होताम क पूत सामा अउर यीएल, होताम अरोएरी लोगन मँ स रहा।

45सिम्री क पूत यदीएल; तीसी लोगन स योहा, योहा यदीएल क भाई रहा;

46महवीमी लोगन मँ स एलीएल, एलनाम क पूत यरीबै अउर योसब्याह; मोआबी लोगन मँ स यित्मा;

47मसोबाई लोगन मँ स एलीएल, ओबेद अउर यासीएल।

← Chapter 10 Chapter 12 →