Revelation 21

Arabic Bible (Tunisian) (Tunisian Arabic Version) 2018

1وِمْبَاعِدْ شُفْتْ سْمَاء جْدِيدَة وْأَرْضْ جْدِيدَة، عْلَى خَاطِرْ السْمَاءْ الأُولَى وِالأَرْضْ لُولَى تْنَحَّاوْ وِالبْحَرْ مَا عَادِشْ مُوجُودْ،

2وْشُفْتْ المْدِينَة المُقَدّْسَة، أُورْشَلِيمْ الجْدِيدَة، هَابْطَة مِالسْمَاءْ مِنْ عِنْدْ اللهْ، حَاضْرَة كِيفْ عْرُوسَة مْزَيّْنَة رُوحْهَا لْرَاجِلْهَا.

3وِسْمَعْتْ صُوتْ عَالِي جَايْ مِالعَرْشْ وِيْقُولْ: «هَاهِيَ دَارْ اللهْ وِالنَّاسْ وْبِشْ يُسْكُنْ مْعَاهُمْ: بَاشْ يْكُونُوا شَعْبُو وِالله بِيدُو مْعَاهُمْ وْبِشْ يْكُونْ إِلاَهْهُمْ،

4وْبِشْ يِمْسَحْ كُلْ دَمْعَة مِنْ عِينِيهُمْ وْمَا عَادِشْ بَاشْ يْكُونْ ثَمَّة مُوتْ وِلاَّ حُزْنْ وِلاَّ بْكَاءْ وِلاَّ وْجِيعَة عْلَى خَاطِرْ الحَاجَاتْ القْدِيمَة تْنَحَّاتْ.»

5وْقَالْ الِّي قَاعِدْ عْلَى العَرْشْ: «هَانِي نْرُدْ كُلْ شَيْء جْدِيدْ!» وْقَالِّي زَادَا: «إِكْتِبْ الكْلاَمْ هَاذَا عْلَى خَاطْرُو صَادِقْ وْحَقْ.»

6وْقَالِّي: «كُلْ شَيْء تَمْ! آنَا الأَلِفْ وِاليَاءْ، البِدَايَة وِالنِّهَايَة. بَاشْ نَعْطِي لِلعَطْشَانْ مِالعِينْ مْتَاعْ مَاء الحَيَاةْ بْلاَشْ فْلُوسْ.

7الِّي يِغْلِبْ بَاشْ يَاخُذْ الوَرْثَة هَاذِي، وْآنَا بَاشْ نْكُونْ إِلاَهُو وْهُوَ بَاشْ يْكُونْ إِبْنِي.

8آمَا الخَوَّافَا وِلِّي مَا عِنْدْهُمْشْ إِيمَانْ وِالفِسَّادْ وْقَتَّالِينْ الأَرْوَاحْ وِالفَاجْرِينْ وِالسَّحَّارِينْ وِلِّي يِعْبْدُوا فِي الصْنَبْ وِالكَذَّابِينْ الكُلْهُمْ، رَاهُو نْصِيبْهُمْ بَاشْ يْكُونْ فِي البُحَيْرَة الِّي شَاعْلَة بِالنَّارْ وِالكِبْرِيتْ. وْهَاذَا هُوَ المُوتْ الثَّانِي.»

9وِمْبَاعِدْ جَانِي وَاحِدْ مِالسَّبْعَة مْلاَيْكَة الِّي عِنْدْهُمْ السَّبْعَة كِيسَانْ المَلْيَانِينْ بِالسَّبْعَة مْصَايِبْ الإِخْرَانِينْ وْكَلِّمْنِي وْقَالِّي: «إِيجَا تَوْ نْوَرِّيكْ العْرُوسَة مْتَاعْ الخَرُوفْ.»

10وْهَزّْنِي لِبْعِيدْ فِي الرُّوحْ لِجْبَلْ كْبِيرْ وْعَالِي وْوَرَّانِي أُورْشَلِيمْ المْدِينَة المُقَدّْسَة هَابْطَة مِالسْمَاءْ مِنْ عِنْدْ اللهْ،

11وْفِيهَا مَجْدْ اللهْ. وْكَانِتْ تِلْمَعْ كِيفْ صْيَاغَة غَالْيَة بَرْشَة تِشْبِهْ لِلعْقِيقْ الصَّافِي كِيفْ البُلاَّرْ،

12وْفِيهَا سُورْ كْبِيرْ وْعَالِي فِيهْ ثْنَاشِنْ بَابْ وِالبِيبَانْ فِيهُمْ ثْنَاشِنْ مَلاَكْ وْمَكْتُوبْ عْلِيهُمْ أَسَامِي الأَثْنَاشِنْ عَرْشْ مْتَاعْ بَنِي إِسْرَائِيلْ:

13ثْلاَثَة بِيبَانْ فِي الشَّرْقْ، وِثْلاَثَة بِيبَانْ فِي الشَّمَالْ، وِثْلاَثَة بِيبَانْ فِي الجَنُوبْ، وِثْلاَثَة بِيبَانْ فِي الغَرْبْ.

14وِالسُّورْ مْتَاعْ المْدِينَة فِيهْ ثْنَاشِنْ سَاسْ مَكْتُوبْ عْلِيهُمْ الأَثْنَاشِنْ إِسْمْ مْتَاعْ الأَثْنَاشِنْ رَسُولْ مْتَاعْ الخَرُوفْ.

15وِالمَلاَكْ الِّي يْكَلِّمْ فِيَّ عَنْدُو قَصْبَة ذْهَبْ يْقِيسْ بِيهَا فِي المْدِينَة وِالبِيبَانْ وِالسُّورْ مْتَاعْهَا.

16وِالمْدِينَة مْرَبّْعَة، طُولْهَا قَدْ عُرْضْهَا. وْقَاسْ المْدِينَة بِالقَصْبَة مْتَاعُو وِلْقَاهَا أَلْفِينْ وْأَرْبْعَة مْيَاةْ كِيلُومِتْرْ وْطُولْهَا وْعُرْضْهَا وْعِلْوْهَا قَدْ قَدْ.

17وِمْبَاعِدْ قَاسْ السُّورْ مْتَاعْهَا لْقَاهْ مْيَة وْأَرْبْعَة وْأَرْبْعِينْ ذْرَاعْ بْطُولْ ذْرَاعْ الإِنْسَانْ كِيفْ مَا قَاسُو المَلاَكْ.

18وِالسُّورْ كَانْ مِبْنِي بِاليَشْبْ، وِالمْدِينَة بِالذْهَبْ الخَالِصْ الصَّافِي كِيفْ البُلاَّرْ.

19العْرُصْ مْتَاعْ سُورْ المْدِينَة كَانِتْ مْزَيّْنَة بْأَنْوَاعْ الصْيَاغَة الكُلْهَا. لُولَى عْقِيقْ، وِالثَّانْيَة يَاقُوتْ أَزْرِقْ، وِالثَّالْثَة عْقِيقْ أَبْيِضْ، وِالرَّابْعَة زْمُرُّدْ،

20وِالخَامْسَة عْقِيقْ غَامِقْ، وِالسَّادْسَة عْقِيقْ أَحْمَرْ، وِالسَّابْعَة زْبَرْجِدْ، وِالثَّامْنَة جَزْعْ، وِالتَّاسْعَة يَاقُوتْ أَصْفِرْ، وِالعَاشْرَة عْقِيقْ أَخْضَرْ، وِالحْدَاشْ فَيْرُوزْ، وِالثَّنَاشْ مَشْتْ.

21وِالأَثْنَاشِنْ بَابْ كَانُوا ثْنَاشِنْ جُوهْرَة، كُلْ بَابْ مَصْنُوعْ مِنْ جُوهْرَة. وِالطْرِيقْ مْتَاعْ المْدِينَة ذْهَبْ خَالِصْ صَافِي كِيفْ البُلاَّرْ الشَّفَّافْ.

22وْمَا شُفْتِشْ هَيْكِلْ فِي المْدِينَة، عْلَى خَاطِرْ الرَّبْ الإِلاَهْ القَادِرْ عْلَى كُلْ شَيْء وِالخَرُوفْ هُومَا الهَيْكِلْ مْتَاعْهَا.

23وِالمْدِينَة مَا هِيشْ مِحْتَاجَة لِلشَّمْسْ وِلاَّ لِلقَمْرَة بَاشْ يِضْوِيوْ عْلِيهَا، عْلَى خَاطِرْ المَجْدْ مْتَاعْ اللهْ هُوَ نُورْهَا وِالخَرُوفْ هُوَ الفْنَارْ مْتَاعْهَا.

24الأُمَمْ بَاشْ يِمْشِيوْ فِي نُورْهَا، وِالمُلُوكْ مْتَاعْ الأَرْضْ بَاشْ يْجِيبُولْهَا المَجْدْ مْتَاعْهُمْ.

25بِيبَانْهَا مَا تِتْسَكِّرْشْ النْهَارْ وْطُولُو وْمُوشْ بَاشْ يْكُونْ فِيهَا لِيلْ.

26بَاشْ يْجِيبُولْهَا المَجْدْ وِالكَرَامَة مْتَاعْ الأُمَمْ،

27وْحَتَّى شَيْء مُوشْ طَاهِرْ مَا هُو بَاشْ يُدْخْلِلْهَا، وْلاَ الِّي يْعِيشُوا فِي النْجَاسَة وِالكِذْبْ، وْمَا يُدْخْلُولْهَا كَانْ الِّي أَسَامِيهُمْ مَكْتُوبَة فِي كْتَابْ الحَيَاةْ مْتَاعْ الخَرُوفْ.

← Chapter 20 Chapter 22 →