Acts 16

Arabic Bible (Tunisian) (Tunisian Arabic Version) 2018

1وْصُلْ بُولُسْ لِمْدِينِةْ دَرْبَة، وْمِنْ بَعْدْ لِمْدِينِةْ لِسْتْرَة، وْكَانْ فِيهَا تِلْمِيذْ إِسْمُو تِيمُوثَاوُسْ، أُمُّو يْهُودِيَّة امّْنِتْ بِالمَسِيحْ وْبُوهْ يُونَانِي.

2وِالإِخْوَة فِي مُدُنْ إِيقُونْيَة وْلِسْتْرَة كَانُوا يَحْكِيوْ عْلِيهْ فِي حَاجَاتْ بَاهْيَة.

3وْحَبْ بُولُسْ بَاشْ يْهِزُّو مْعَاهْ وْهَزُّو وْطَهّْرُو عْلَى خَاطِرْ اليْهُودْ الِّي سَاكْنِينْ فِي المَنْطْقَة هَاذِيكَا يَعْرْفُوا الِّي بُوهْ يُونَانِي.

4وِمْشَى بُولُسْ وِصْحَابُو مِنْ بْلاَدْ لِبْلاَدْ يْبَلّْغُوا لِلمُؤْمْنِينْ فِي القَرَارَاتْ الِّي خْذَاوْهَا الرُّسُلْ وِالشْيُوخْ فِي أُورْشَلِيمْ بَاشْ يْطَبّْقُوهَا.

5وِالكَنَايِسْ كَانِتْ تِتْقَوَّى فِي الإِيمَانْ وِعْدَدْهَا مَاشِي وْيِكْبِرْ نْهَارْ بَعْدْ نْهَارْ.

6وِمْنَعْهُمْ الرُّوحْ القُدُسْ بَاشْ يْبَشّْرُوا فِي جِيهِةْ أَسِيَّة، يَاخِي سَافْرُوا لْجِيهِةْ فَرِيجِيَّة وْغَلاَطْيَة.

7وَقْتِلِّي وُصْلُوا لِلحَدْ مْتَاعْ جِيهِةْ مِيسِيَّة، حَاوْلُوا بَاشْ يُدْخْلُوا لْجِيهِةْ بِثِينِيَّة، آمَا الرّوح القُدسْ مَا سْمَحِّلْهُمْشْ بَاشْ يُدْخْلُولْهَا.

8وَلّاوْ مْشَاوْ لِمْدِينِةْ تَرُوَاسْ وِتْعَدَّاوْ عْلَى مْدِينِةْ مِيسِيَّة.

9وْفِي اللِّيلَة هَاذِيكَا بِيدْهَا شَافْ بُولُسْ فِي رُؤْيَا، رَاجِلْ مِنْ مَقْدُونِيَّة يِتْشَحِّتْ فِيهْ وِيْقُولْ: «تْعَدَّى لْمَقْدُونِيَّة وْعَاوِنَّا.»

10وَقْتِلِّي بُولُسْ شَافْ الرُّؤْيَا بِالوَقْتْ حَاوِلْنَا بَاشْ نِمْشِيوْا لْمَقْدُونِيَّة عْلَى خَاطِرْنَا تْأَكِّدْنَا الِّي اللهْ يْحِبّْنَا نْبَشّْرُوا بِالإِنْجِيلْ الغَادِي.

11وْسَافِرْنَا مِنْ بُرْطْ تَرُوَاسْ لْجَزِيرِةْ سَامُوثْرَاكِي. وْفِي النْهَارْ الثَّانِي كَمِّلْنَا السْفَرْ لْبُرْطْ مْدِينِةْ نِيَابُولِيسْ.

12وْمِنْ وِلاَيِةْ مَقْدُونِيَّة تْعَدِّينَا لِمْدِينِةْ فِيلِبِّي الِّي هِيَ مِنْ أَكْبِرْ المُدُنْ الِّي مِسْتَعْمْرِينْهَا الرُّومَانْ وِبْقِينَا الغَادِي أَيَّامَاتْ.

13وْفِي نْهَارْ السِّبْتْ مْشِينَا بِحْذَا الوَادْ الِّي قْرِيبْ مِالمْدِينَة وِالبْلاَصَة هَاذِيكَا تْعَوّْدُوا اليْهُودْ بَاشْ يْصَلِّيوْ فِيهَا. وِقْعَدْنَا نْكَلّْمُوا فِي النْسَاء المُوجُودِينْ غَادِي.

14وْمِنْ بِينْهُمْ مْرَا تِعْبِدْ فِي رَبِّي اسْمْهَا لِيدِيَّة مِنْ مْدِينِةْ ثِيَاتِيرَا كَانِتْ تْبِيعْ فِي القْمَاشْ الغَالِي وْرَبِّي نَوّْرِلْهَا قَلْبْهَا بَاشْ تِسْمَعْ كْلاَمْ بُولُسْ بِالقْدَا.

15وَقْتِلِّي تْعَمّْدِتْ هِيَ وعَايْلِتْهَا سْتَدْعَاتْنَا وْقَالْتِلْنَا: «إِذَا كَانْكُمْ حَاسْبِينِّي مُؤْمْنَة بِالرَّبْ لاَزِمْكُمْ تْجِيوْ لْدَارِي.» وْقَنْعِتْنَا بَاشْ نِمْشِيوْا ضْيَافْ عِنْدْهَا.

16وْفِي نْهَارْ مِنْ النْهَارَاتْ وَقْتِلِّي كُنَّا مَاشِينْ لِلصْلاَة، عَرْضِتْنَا خْدِيمَة سَاكِنْهَا رُوحْ عَرَّافْ. وْكَانِتْ تْرَبِّحْ فِي سْيَادْهَا الِّي مَالْكِينْهَا فِي بَرْشَة فْلُوسْ مَالتْقَازَة مْتَاعْهَا.

17يَاخِي بْدَاتْ اتَّبَّعْ فِي بُولُسْ وِاتَّبَّعْ فِينَا الكُلْنَا وِتْصِيحْ: «النَّاسْ هَاذُمْ هُومَا عَبِيدْ اللهْ العَالِي وِيْخَبّْرُوا فِيكُمْ عْلَى طْرِيقْ الخَلاَصْ.»

18وْقَعْدِتْ عْلَى الحَالَة هَاذِي أَيَّامَاتْ حَتَّى لِينْ قْلَقْ مِنْهَا بُولُسْ وِتْلَفِّتْ وْقَالْ لِلرُّوحْ الِّي فِيهَا: «بْإِسْمْ يَسُوعْ المَسِيحْ نُأْمْرِكْ بَاشْ تُخْرُجْ مِنْهَا.» وْبِالوَقْتْ خْرَجْ مِنْهَا.

19وَقْتِلِّي أَسْيَادْ الخْدِيمَة مَا عَادِشْ عِنْدْهُمْ أَمَلْ الِّي هِيَ بَاشْ تْجِيبِلْهُمْ فْلُوسْ، شَدُّوا بُولُسْ وْسِيلاَ وْهَزُّوهُمْ لِلحُكَّامْ فِي السَّاحَة مْتَاعْ المْدِينَة بَاشْ يُحْكْمُوا عْلِيهُمْ.

20وَقّْفُوهُمْ قُدَّامْ الحُكَّامْ وْقَالُوا: «الزُّوزْ رْجَالْ هَاذُومَا يْهُودْ وْيَعْمْلُوا فِي المَشَاكِلْ فِي المْدِينَة.

21وِيْعَلّْمُوا فِي النَّاسْ فِي عْوَايِدْ الِّي أَحْنَا الرُّومَانْ مَا انَّجّْمُوشْ نِقْبْلُوهَا وْمَا انَّجّْمُوشْ نَعْمْلُوا بِيهَا.»

22يَاخِي ثَارُوا عْلِيهُمْ النَّاسْ، وْقَطّْعُولْهُمْ الحُكَّامْ حْوَايِجْهُمْ وْأَمْرُوا بَاشْ يَضْرْبُوهُمْ بِالسُّوطْ.

23وْضَرْبُوهُمْ بِالسُّوطْ بَرْشَة وْحَطُّوهُمْ فِي الحَبْسْ وْأَمْرُوا الحَارِسْ بَاشْ يْعِسْ عْلِيهُمْ بِالقْدَا.

24عْمَلْ كِيفْ مَا أَمْرُوهْ وْحَطّْهُمْ فِي الحَبْسْ الدَّخْلاَنِي وْحَطِّلْهُمْ سَاقِيهُمْ فِي لُوحَة.

25وِمْعَ نُصْفْ اللِّيلْ كَانُوا بُولُسْ وْسِيلاَ يْصَلِّيوْ وِيْسَبّْحُوا فِي اللهْ وِالمَرْبُوطِينْ مْعَاهُمْ فِي الحَبْسْ يِسْمْعُوا فِيهُمْ.

26وْإِذَا بِيهْ زِلْزَالْ قْوِي حَرِّكْ سِيسَانْ الحَبْسْ، وْفِي نَفْسْ الوَقْتْ تْحَلِّتْ البِيبَانْ الكُلْهَا وِالمْرَابِيطْ الكُلْهُمْ سْلاَسِلْهُمْ تْحَلِّتْ.

27وِالزِّلْزَالْ فَيِّقْ الحَارِسْ وْكِشَافْ البِيبَانْ مَحْلُولَة، مْشَى فِي بَالُو الِّي المْرَابِيطْ هَرْبُوا يَاخِي جْبِدْ سِيفُو بَاشْ يُقْتُلْ رُوحُو.

28آمَا بُولُسْ عَيِّطْلُو عْلَى طُولْ صُوتُو: «مَا تْضُرُّشْ رُوحِكْ! أَحْنَا الكُلْنَا هْنَا.»

29أْمَرْ بَاشْ يْجِيبُولُو ضَوْ، وِدْخَلْ يِجْرِي لْدَاخِلْ وْتِرْمَي قُدَّامْ بُولُسْ وْسِيلاَ وْهُوَ يِتْرْعِدْ.

30مِنْ بَعْدْ خَرِّجْهُمْ لْبَرَّة وِسْإِلْهُمْ: «يَا سْيَادِي آشْ يِلْزِمْنِي نَعْمِلْ بَاشْ نُخْلُصْ؟»

31جَاوْبُوهْ: «إِمِّنْ بِالرَّبْ يَسُوعْ، تَوْ تُخْلُصْ إِنْتِ وْعَايِلْتِكْ.»

32مِنْ بَعْدْ بَشّْرُوهْ هُوَ وْعَايِلْتُو الكُلْهُمْ بْكِلْمِةْ اللهْ.

33وْفِي اللِّيلَة هَاذِيكَا بِيدْهَا هَزّْهُمْ فِي الوَقْتْ هَاذَاكَا وْنَظّْفِلْهُمْ جْرُوحْهُمْ وِتْعَمِّدْ هُوَ وْعَايِلْتُو الكُلْهَا.

34وْهَزّْهُمْ لْدَارُو وْحَطِّلْهُمْ المَاكْلَة وِفْرَحْ مْعَ عَايِلْتُو الكُلْهَا عْلَى خَاطْرُو إِمِّنْ بِالله.

35وَقْتِلِّي طْلَعْ النْهَارْ بَعْثُوا الحُكَّامْ مَسْؤُولِينْ فِي الشُّرْطَة بَاشْ يْقُولُوا لِلحَارِسْ: «سَيِّبْ الزُّوزْ رْجَالْ.»

36وْقَالْ الحَارِسْ لْبُولُسْ: «الحُكَّامْ بَعْثُوا وآمْرُونِي بَاشْ نْسَيِّبْكُمْ، إِمْشِيوْ تَوَّا بِالسْلاَمَة.»

37آمَا بُولُسْ رْفَضْ وْقَالْ: «ضَرْبُونَا بِالسُّوطْ قُدَّامْ النَّاسْ مِنْ غِيرْ مَا يُحْكْمُوا عْلِينَا رَغْمِلِّي أَحْنَا عِنْدْنَا الجِنْسِيَّة الرُّومَانِيَّة، وْزَادُوا حَطُّونَا فِي الحَبْسْ، كِيفَاشْ تَوَّا يْحِبُّوا يْسَيّْبُونَا مِنْ غِيرْ مَا حَدْ يِعْلِمْ. لاَ، لاَزِمْ يْجُوا هُومَا وِيْسَيّْبُونَا!»

38وْخَبّْرُوا المَسْؤُولِينْ مْتَاعْ الشُّرْطَة الحُكَّامْ بِالشَّيْء هَاذَا، يَاخِي خَافُوا وَقْتِلِّي سَمْعُوا بِيهُمْ الِّي هُومَا رُومَانْ.

39وْجَاوْ وْطَلْبُوا مِنْهُمْ السْمَاحْ وْسَيّْبُوهُمْ وْطَلْبُوا مِنْهُمْ بَاشْ يُخْرْجُوا مِالمْدِينَة.

40خْرَجْ بُولُسْ وْسِيلاَ مِالحَبْسْ وِمْشَاوْ لْدَارْ لِيدِيَّة وِالغَادِي قَابْلُوا الإِخْوَة وْشَجّْعُوهُمْ وْمِنْ بَعْدْ خَرْجُوا مِالمْدِينَة.

← Chapter 15 Chapter 17 →