Revelation 6

Arabic Bible Morocco Version - 2012 (الترجمة المغربية القياسية)

1الْفَصْلْ السَّادْسْ وْمْنْ بَعْدْ، شْفْتْ الْخْرُوفْ مْلِّي فَكّْ الْعْقْدَة اللّْوّْلَى مْنْ الْعْقْدَاتْ السّْبْعَة، وْسْمَعْتْ وَاحْدْ الْمْخْلُوقْ مْنْ الْمْخْلُوقَاتْ الرّْبْعَة كَيْݣُولْ بْوَاحْدْ الصُّوتْ بْحَالْ صُوتْ الرَّعْدْ: «أَجِي!».

2وْشْفْتْ، وْهُوَ يْبَانْ لِيَّ وَاحْدْ الْعَوْدْ بْيَضْ وْاللِّي رَاكْبْ عْلِيهْ هَازّْ قُوسْ، وْتّْعْطَى لِيهْ وَاحْدْ التَّاجْ وْخْرَجْ غَالْبْ وْبَاشْ يْعَاوْدْ يْغْلَبْ.

3وْمْلِّي فَكّْ الْخْرُوفْ الْعْقْدَة التَّانْيَة سْمَعْتْ الْمْخْلُوقْ التَّانِي كَيْݣُولْ: «أَجِي!».

4وْخْرَجْ وَاحْدْ الْعَوْدْ آخُرْ لُونُه حْمَرْ بْحَالْ اللُّونْ دْ الْعَافْيَة، وْهَادَاكْ اللِّي رَاكْبْ عْلِيهْ تّْعْطَاتُه الْقُدْرَة بَاشْ يْحَيّْدْ الْهْنَا مْنْ الْأَرْضْ، وْبَاشْ يْخَلِّي النَّاسْ يْتّْقَاتْلُو مْعَ بْعْضِيَّاتْهُمْ، وْتّْعْطَى لِيهْ وَاحْدْ السِّيفْ كْبِيرْ.

5وْمْلِّي فَكّْ الْخْرُوفْ الْعْقْدَة التَّالْتَة، سْمَعْتْ الْمْخْلُوقْ التَّالْتْ كَيْݣُولْ: «أَجِي!». وْشْفْتْ وْهُوَ يْبَانْ لِيَّ وَاحْدْ الْعَوْدْ كْحَلْ وْهَادَاكْ اللِّي رَاكْبْ عْلِيهْ هَازّْ مِيزَانْ فْيْدُّه.

6وْسْمَعْتْ بْحَالْ شِي صُوتْ فْوَسْطْ الرّْبْعَة دْ الْمْخْلُوقَاتْ كَيْݣُولْ: «كِيلُو دْ الْݣْمْحْ بْدِينَارْ، وْتْلَاتَة كِيلُو دْ الشّْعِيرْ بْدِينَارْ. وَلَكِنْ الزِّيتْ وْالْخْمَرْ مَا تْضَيّْعْهُومْشْ».

7وْمْلِّي فَكّْ الْخْرُوفْ الْعْقْدَة الرَّابْعَة، سْمَعْتْ الصُّوتْ دْيَالْ الْمْخْلُوقْ الرَّابْعْ كَيْݣُولْ: «أَجِي!».

8وْشْفْتْ، وْهُوَ يْبَانْ لِيَّ وَاحْدْ الْعَوْدْ لُونُه خْضَرْ مْفْتُوحْ، وْهَادَاكْ اللِّي رَاكْبْ عْلِيهْ سْمِيتُه الْمُوتْ، وْتَابْعَاهْ الْهَاوِيَة، وْتّْعْطَاتْهُمْ السُّلْطَة عْلَى الرّْبَعْ دْيَالْ سُكَّانْ الْأَرْضْ بَاشْ يْقْتْلُوهُمْ بْالسِّيفْ، وْبْالجُّوعْ، وْبْالطَّاعُونْ، وْبْوْحُوشْ الْغَابَة.

9وْمْلِّي فَكّْ الْخْرُوفْ الْعْقْدَة الْخَامْسَة، شْفْتْ تَحْتْ الْمَدْبَحْ أَرْوَاحْ هَادُوكْ اللِّي تّْدَبْحُو عْلَى قْبَلْ كْلْمَةْ اللَّهْ وْالشّْهَادَة اللِّي عْطَاوْهَا،

10وْغَوّْتُو عْلَى حَرّْ جَهْدْهُمْ وْݣَالُو: «آ سِيدِي الْمْقَدّْسْ وْالْحَقّْ، حْتَّى لْإِيمْتَى مَا غَادِيشْ تْحْكَمْ وْتْنْتَقْمْ لْلدّْمْ دْيَالْنَا مْنْ السُّكَّانْ دْ الْأَرْضْ؟».

11وْتّْعْطَى لْكُلّْ وَاحْدْ فِيهُمْ لْبَاسْ بْيَضْ، وْتّْݣَالْ لِيهُمْ يْصَبْرُو شْوِيَّة حْتَّى يْتّْقْتْلُو بْحَالْهُمْ ݣَاعْ الْعْبِيدْ دْيَالْ الْمَسِيحْ وْخُوتْهُمْ الْمُومْنِينْ.

12وْمْنْ بَعْدْ، شْفْتْ الْخْرُوفْ فَكّْ الْعْقْدَة السَّادْسَة، وْهُوَ يْضْرَبْ وَاحْدْ الزّْلْزَالْ قْوِي، وْكْحَالْتْ الشّْمْسْ بْحَالْ الْفَاخْرْ، وْوْلَّى الْقَمَرْ كُلُّه حْمَرْ بْحَالْ الدّْمْ،

13وْطَاحُو نْجُومْ السّْمَا عْلَى الْأَرْضْ كِيفْ كَيْطِيحْ الْكَرْمُوسْ الْخْضَرْ مْنْ الْكَرْمَة، مْلِّي كَتْضْرَبْهَا شِي رِيحْ قْوِيَّة.

14وْتّْجَمْعَاتْ السّْمَا بْحَالْ شِي وَرْقَة مْطْوِيَّة، وْݣَاعْ الجّْبَالْ وْالْجَزِيرَاتْ تّْزَعْزْعُو مْنْ بْلَايْصْهُمْ.

15وْالْمُلُوكْ دْيَالْ الْأَرْضْ، وْالْمْسْؤُولِينْ الْكْبَارْ، وْالرُّؤَسَا دْ الْعَسْكَرْ، وْالْأَغْنِيَا، وْالنَّاسْ الْقْوِيِّينْ، وْكُلّْ عَبْدْ وْحُرّْ، تْخَبَّاوْ فْالْغِيرَانْ وْبِينْ الصّْخُورْ دْ الجّْبَالْ،

16وْهُمَ كَيْݣُولُو لْلجّْبَالْ وْلْلْصّْخُورْ: «طِيحُو عْلِينَا وْخَبِّيوْنَا مْنْ وْجَهْ هَادَاكْ اللِّي ݣَالْسْ عْلَى الْعَرْشْ وْمْنْ الْغَضَبْ دْيَالْ الْخْرُوفْ،

17عْلَاحْقَّاشْ جَا النّْهَارْ الْعْظِيمْ دْيَالْ الْغَضَبْ دْيَالُه، وْشْكُونْ اللِّي يْقْدَرْ يْتّْحَمّْلْ؟».

← Chapter 5 Chapter 7 →