Matthew 27 — Arabic Bible Morocco Version - 2012 (الترجمة المغربية القياسية)

1الْفَصْلْ سْبْعَة وْعْشْرِينْ وْفْالصّْبَاحْ بْكْرِي، تَّافْقُو الرُّؤَسَا دْ رْجَالْ الدِّينْ وْشْيُوخْ الشَّعْبْ كُلّْهُمْ عْلَى يَسُوعْ بَاشْ يْقْتْلُوهْ.

2وْهُمَ يْكَتّْفُوهْ وْدَّاوْهْ سَلّْمُوهْ لْلْحَاكْمْ بِيلَاطُسْ.

3وْدِيكْ السَّاعَة مْلِّي شَافْ يَهُودَا اللِّي خَانُه بْلِّي حْكْمُو عْلَى يَسُوعْ، نْدَمْ وْرَدّْ تْلَاتِينْ قْطْعَة دْ الْفْضَّة لْلرُّؤَسَا دْ رْجَالْ الدِّينْ وْالشّْيُوخْ،

4وْݣَالْ لِيهُمْ: «رَانِي دْنَبْتْ حِيتْ سَلّْمْتْ وَاحْدْ مَا عْلِيهْ دَنْبْ». وْݣَالُو لِيهْ: «مَاشِي شْغُلْنَا، دَبّْرْ رَاسْكْ».

5وْرْمَى يَهُودَا دِيكْ الْفْضَّة فْبِيتْ اللَّهْ، وْمْنْ بَعْدْ مْشَى وْشْنَقْ رَاسُه.

6وْخْدَاوْ الرُّؤَسَا دْ رْجَالْ الدِّينْ الْفْضَّة وْݣَالُو: «مَاشِي حْلَالْ نْدِيرُوهَا فْصْنْدُوقْ بِيتْ اللَّهْ، حِيتْ رَاهْ هِيَ تَمَنْ دْمّْ بْنَادْمْ».

7وْتَّافْقُو بَاشْ يْشْرِيوْ بِيهَا فْدَّانْ الْفْخَّارِي وْيْدِيرُوهْ رُوضَة دْيَالْ الْبْرَّانِيِّينْ،

8وْعْلَى دَاكْشِّي كَيْسَمِّيوْ النَّاسْ هَادْ الْفْدَّانْ فْدَّانْ الدّْمْ حْتَّى لْلْيُومْ.

9وْدِيكْ السَّاعَة تْحَقّْقْ دَاكْشِّي اللِّي وْحَى بِيهْ الرَّبّْ لْلنّْبِي إِرْمِيَا مْلِّي ݣَالْ: «وْخْدَاوْ تْلَاتِينْ قْطْعَة دْ الْفْضَّة، التَّمَنْ اللِّي تَّافْقُو عْلِيهْ شِي وْحْدِينْ مْنْ شَعْبْ إِسْرَائِيلْ بَاشْ تْكُونْ التَّمَنْ دْيَالُه،

10وْبْهَادْ التَّمَنْ شْرَاوْ فْدَّانْ الْفْخَّارِي كِيفْ وْصَّانِي الرَّبّْ».

11وْوْقَفْ يَسُوعْ قُدَّامْ الْحَاكْمْ اللِّي سْوّْلُه وْݣَالْ: «وَاشْ نْتَ هُوَ مَلِكْ لِيهُودْ؟». وْهُوَ يْجَاوْبُه يَسُوعْ: «رَاكْ ݣْلْتِيهَا».

12وْمْلِّي كَانُو الرُّؤَسَا دْ رْجَالْ الدِّينْ وْالشّْيُوخْ كَيْتَّهْمُوهْ، مَا كَانْ كَيْجَاوْبْهُمْ حْتَّى بْحَاجَة.

13وْݣَالْ لِيهْ بِيلَاطُسْ: «وَاشْ مَا سْمَعْتِيشْ هَادْشِّي كُلُّه اللِّي كَيْشَهْدُو بِيهْ عْلِيكْ؟».

14وْمَا جَاوْبُه يَسُوعْ حْتَّى بْشِي كْلْمَة، وْعْلَى هَادْشِّي تّْعَجّْبْ الْحَاكْمْ بْزَّافْ.

15وْكَانْتْ الْعَادَة عَنْدْ الْحَاكْمْ فْكُلّْ عِيدْ الْفِصْحْ كَيْطْلَقْ وَاحْدْ مْنْ الْمْسْجُونِينْ اللِّي بْغَاوْ النَّاسْ.

16وْكَانْ عَنْدْهُمْ دِيكْ السَّاعَة وَاحْدْ الْمْسْجُونْ مْشْهُورْ سْمِيتُه يَشُوعْ بَارَابَاسْ.

17وْمْلِّي تّْجَمْعُو النَّاسْ، سْوّْلْهُمْ بِيلَاطُسْ: «شْكُونْ اللِّي بْغِيتُو نْطْلَقْ لِيكُمْ، يَشُوعْ بَارَابَاسْ وْلَا يَسُوعْ اللِّي كَيْسَمِّيوْهْ الْمَسِيحْ؟».

18حِيتْ كَانْ بِيلَاطُسْ كَيْعْرَفْ بْلِّي مْنْ الْحْسَدْ اللِّي فِيهُمْ قَدّْمُو لِيهْ يَسُوعْ.

19وْمْلِّي كَانْ بِيلَاطُسْ ݣَالْسْ عْلَى الْكُرْسِي دْ الْحُكْمْ، صِيفْطَاتْ لِيهْ مْرَاتُه بَاشْ تْݣُولْ لِيهْ: «عَنْدَاكْ تْآدِي هَادْ الرَّاجْلْ اللِّي مَا دَارْ حْتَّى دَنْبْ، حِيتْ رَانِي تْعَدّْبْتْ بْزَّافْ الْيُومْ فْالْحُلْمْ مْنْ جِهْتُه».

20وَلَكِنْ الرُّؤَسَا دْ رْجَالْ الدِّينْ وْالشّْيُوخْ حَرّْشُو الجّْمَاعَاتْ دْ النَّاسْ بَاشْ يْطْلْبُو مْنْ بِيلَاطُسْ يْطْلَقْ لِيهُمْ بَارَابَاسْ وْيْقْتَلْ يَسُوعْ.

21وْسْوّْلْهُمْ بِيلَاطُسْ: «شْكُونْ فْهَادْ الجُّوجْ اللِّي بْغِيتُو نْطْلَقْ لِيكُمْ؟» وْجَاوْبُوهْ: «بَارَابَاسْ».

22وْهُوَ يْݣُولْ لِيهُمْ بِيلَاطُسْ: «إِيوَا آشْ غَنْدِيرْ بْيَسُوعْ اللِّي كَيْسَمِّيوْهْ الْمَسِيحْ؟» وْجَاوْبُوهْ كُلّْهُمْ: «صْلْبُه!».

23وْݣَالْ لِيهُمْ: «آشْ مْنْ شَرّْ دَارْ؟»، وَلَكِنْ هُمَ زَادُو فْغْوَاتْهُمْ وْݣَالُو لِيهْ: «صْلْبُه!».

24وْمْلِّي شَافْ بِيلَاطُسْ بْلِّي مَا نْفْعَاتْ مْعَاهُمْ حْتَّى حَاجَة وْالشَّعْبْ غِيرْ مَا زَادْ هَاجْ، خْدَا الْمَا وْغْسَلْ يْدِّيهْ قُدَّامْ الجّْمَاعَة دْ النَّاسْ وْݣَالْ: «أَنَا رَانِي بَارِي مْنْ دْمّْ هَادْ الرَّاجْلْ، دَبّْرُو نْتُمَ مْعَاهْ!».

25وْهُوَ يْجَاوْبُه الشَّعْبْ كُلُّه وْݣَالْ: «غِيرْ خَلِّي دْمُّه عْلِينَا وْعْلَى وْلَادْنَا!».

26وْفْدِيكْ السَّاعَة طْلَقْ لِيهُمْ بَارَابَاسْ أَمَّا يَسُوعْ سَلّْمُه بَاشْ يْتّْصْلَبْ مْنْ بَعْدْمَا صَوْطُوهْ.

27وْدَّاوْ الْعَسْكَرْ دْيَالْ الْحَاكْمْ يَسُوعْ لْقْصَرْ الْحَاكْمْ، وْجْمْعُو عْلِيهْ الْفَرْقَة دْ الْعَسْكَرْ كُلّْهَا.

28وْعْرَّاوْهْ وْلَبّْسُوهْ سْلْهَامْ حْمَرْ،

29وْضْفْرُو تَاجْ دْيَالْ الشُّوكْ وْحَطُّوهْ لِيهْ عْلَى رَاسُه، وْدَارُو لِيهْ فْيْدُّه لِيمْنَى قْصْبَة، وْبْدَاوْ كَيْرَكْعُو قُدَّامُه وْكَيْضَحْكُو عْلِيهْ وْكَيْݣُولُو: «السّْلَامْ عْلِيكْ آ مَلِكْ لِيهُودْ!».

30وْدْفْلُو عْلِيهْ وْخْدَاوْ الْقْصْبَة وْضْرْبُوهْ بِيهَا عْلَى رَاسُه.

31وْمْنْ بَعْدْمَا ضَحْكُو عْلِيهْ، حَيّْدُو لِيهْ السّْلْهَامْ وْلَبّْسُو لِيهْ حْوَايْجُه وْدَّاوْهْ بَاشْ يْتّْصْلَبْ.

32وْمْلِّي كَانُو خَارْجِينْ بِيهْ مْنْ الْمْدِينَة، تّْلَاقَاوْ مْعَ وَاحْدْ الرَّاجْلْ مْنْ الْقَيْرَوَانْ سْمِيتُه سِمْعَانْ، وْهُمَ يْلَزّْمُو عْلِيهْ بَاشْ يْهَزّْ الصّْلِيبْ دْيَالْ يَسُوعْ.

33وْوَصْلُو لْلْمُوضْعْ اللِّي سْمِيتُه الْجُلْجُتَة وْاللِّي كَيْعْنِي مُوضْعْ الْجُمْجُمَة.

34وْعْطَاوْهْ يْشْرَبْ الْخْمَرْ مْخَلّْطْ بْوَاحْدْ الْعْشْبَة سْمِيتْهَا الْمُرّْ، وْمْلِّي دَاقُه مَا بْغَاشْ يْشَرْبُه.

35وْصَلْبُوهْ وْقْسْمُو بِينَاتْهُمْ حْوَايْجُه بَعْدْمَا ضْرْبُو عْلِيهُمْ الْعُودْ.

36وْبْقَاوْ ݣَالْسِينْ تْمَّ عْسَّاسِينْ عْلِيهْ،

37وْدَارُو فُوقْ مْنْ رَاسُه وَاحْدْ اللُّوحَة مْكْتُوبَة فِيهَا التُّهْمَة دْيَالُه: «هَادَا هُوَ يَسُوعْ مَلِكْ لِيهُودْ».

38وْدِيكْ السَّاعَة صْلْبُو مْعَاهْ جُوجْ دْ الشّْفَارَا، وَاحْدْ عْلَى لِيمْنْ دْيَالُه وْلَاخُرْ عْلَى لِيسْرْ.

39وْكَانُو النَّاسْ اللِّي دَايْزِينْ كَيْعَايْرُوهْ وْهُمَ كَيْضَوّْرُو فْرَاسْهُمْ

40وْكَيْݣُولُو: «آ اللِّي غَتْرَيّْبْ بِيتْ اللَّهْ وْغَتْعَاوْدْ تْبْنِيهْ فْتْلْتْ يَّامْ، نْجِّي رَاسْكْ إِلَا كْنْتِ وَلْدْ اللَّهْ، وْنْزَلْ مْنْ فُوقْ الصّْلِيبْ!».

41وْكَانُو الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ وْالشّْيُوخْ حْتَّى هُمَ كَيْضَحْكُو عْلِيهْ وْكَيْݣُولُو:

42«نْجَّا نَاسْ خْرِينْ وَلَكِنْ مَا قْدَرْشْ يْنَجِّي رَاسُه! إِلَا كَانْ هُوَ مَلِكْ إِسْرَائِيلْ، يْنْزَلْ دَابَا مْنْ فُوقْ الصّْلِيبْ وْغَنْآمْنُو بِيهْ!

43يَاكْ هُوَ تّْكَلْ عْلَى اللَّهْ! إِيوَا يْعَتْقُه دَابَا إِلَا بْغَاهْ، حِيتْ هُوَ ݣَالْ: أَنَا وَلْدْ اللَّهْ!».

44وْحْتَّى الشّْفَارَا اللِّي تّْصْلْبُو مْعَاهْ عَايْرُوهْ بْحَالْ لْخْرِينْ.

45وْطَاحْ الضّْلَامْ عْلَى الْبْلَادْ كُلّْهَا مْنْ الطّْنَاشْ دْ النّْهَارْ حْتَّى لْلتّْلَاتَة دْ الْعْشِيَّة.

46وْمْعَ جْوَايْهْ التّْلَاتَة دْ الْعْشِيَّة، غَوّْتْ يَسُوعْ بْصُوتْ عَالِي: «إِيلِي، إِيلِي، لِمَا شَبَقْتَنِي؟» اللِّي كَتْعْنِي: «إِلَاهِي، إِلَاهِي، عْلَاشْ سْمَحْتِي فِيَّ؟».

47وْسْمْعُوهْ شِي وْحْدِينْ مْنْ هَادُوكْ اللِّي كَانُو وَاقْفِينْ تْمَّ وْݣَالُو: «رَاهْ كَيْعَيّْطْ عْلَى إِيلِيَّا»،

48وْجْرَّى وَاحْدْ مْنّْهُمْ وْخْدَا طَرْفْ دْيَالْ التُّوبْ وْفَزّْݣُه بْالْخْلّْ وْدَارُه فْالرَّاسْ دْيَالْ وَاحْدْ الْقْصْبَة وْمْدُّه لِيهْ بَاشْ يْشْرَبْ.

49وْهُمَ يْݣُولُو لِيهْ لْخْرِينْ: «خَلِّيهْ حْتَّى نْشُوفُو وَاشْ غَادِي يْجِي إِيلِيَّا يْنَجِّيهْ!».

50وْعَاوْدْ غَوّْتْ يَسُوعْ مَرَّة خْرَى بْصُوتْ عَالِي وْمَاتْ.

51وْتْشَرّْݣَاتْ الْخَامِيَّة دْيَالْ بِيتْ اللَّهْ عْلَى جُوجْ، مْنْ الْفُوقْ لْلْتَحْتْ. وْتّْزَلْزْلَاتْ الْأَرْضْ وْتّْشَقّْ الصّْخَرْ.

52وْتّْحَلُّو الْقْبُورَ وْتّْبَعْتُو بْزَّافْ دْ النَّاسْ الْمْقَدّْسِينْ مْنْ الْمُوتْ،

53وْخَرْجُو مْنْ الْقْبُورْ مْنْ بَعْدْمَا تّْبْعَتْ يَسُوعْ مْنْ الْمُوتْ، وْدَخْلُو لْأُورْشَلِيمْ الْمْدِينَة الْمْقَدّْسَة، وْبَانُو لْبْزَّافْ دْ النَّاسْ.

54وْمْلِّي الْقَايْدْ دْ الْعَسْكَرْ وْالْعْسَّاسَا اللِّي كَيْعَسُّو مْعَاهْ عْلَى يَسُوعْ، شَافُو الزّْلْزَالْ وْݣَاعْ دَاكْشِّي اللِّي جْرَا، تّْخَلْعُو بْزَّافْ وْݣَالُو: «فْالْحَقِيقَة هَادْ الرَّاجْلْ كَانْ وَلْدْ اللَّهْ».

55وْكَانُو تْمَّ بْزَّافْ دْ الْعْيَالَاتْ اللِّي تْبْعُو يَسُوعْ مْنْ الْجَلِيلْ وْاللِّي كَانُو كَيْتّْسَخّْرُو عْلِيهْ، كَيْشُوفُو مْنْ بْعِيدْ.

56اللِّي مْنْ بِينَاتْهُمْ مَرْيَمْ الْمَجْدَلِيَّة، وْمَرْيَمْ أُمّْ يَعْقُوبْ وْيُوسْفْ، وْأُمّْ وْلَادْ زَبَدِي.

57وْفْالْعْشِيَّة، جَا وَاحْدْ الرَّاجْلْ لَبَاسْ عْلِيهْ مْنْ الرَّامَة سْمِيتُه يُوسْفْ، كَانْ حْتَّى هُوَ تْلْمِيدْ لْيَسُوعْ.

58وْدْخَلْ هَادْ الرَّاجْلْ وْتْقَدّْمْ لْعَنْدْ الْحَاكْمْ بِيلَاطُسْ، وْطْلْبُه بَاشْ يْعْطِيهْ الدَّاتْ دْيَالْ يَسُوعْ. وْدِيكْ السَّاعَة آمْرْ بِيلَاطُسْ بَاشْ يْعْطِيوْهَا لِيهْ.

59وْخْدَا يُوسْفْ الدَّاتْ وْكَفّْنْهَا فْكْتَّانْ نْقِي،

60وْحَطّْهَا فْالْقْبَرْ الجّْدِيدْ اللِّي كَانْ حَفْرُه فْالصّْخَرْ، وْرَدّْ حَجْرَة كْبِيرَة عْلَى بَابْ الْقْبَرْ وْمْشَى.

61وْكَانْتْ تْمَّ مَرْيَمْ الْمَجْدَلِيَّة وْمَرْيَمْ لْخْرَى ݣَالْسِينْ قْبَالْةْ الْقْبَرْ.

62وْفْالْغَدّْ لِيهْ، اللِّي مْنْ بَعْدْ النّْهَارْ اللِّي كَيْوَجّْدُو فِيهْ لْلسّْبْتْ، تّْجَمْعُو الرُّؤَسَا دْ رْجَالْ الدِّينْ وْالْفْرِّيسِيِّينْ عَنْدْ بِيلَاطُسْ،

63وْݣَالُو لِيهْ: «تّْفَكّْرْنَا آ سِيدِي بْلِّي هَادَاكْ الْكْدَّابْ مْلِّي كَانْ حَيّْ، كَانْ كَيْݣُولْ بْلِّي مْنْ بَعْدْ تْلْتْ يَّامْ غَيْتّْبْعَتْ.

64إِيوَا عْطِي الْأَمْرْ دْيَالْكْ بَاشْ تْكُونْ الْعْسَّة عْلَى الْقْبَرْ حْتَّى لْلنّْهَارْ التَّالْتْ، بَاشْ مَا يْجِيوْشْ التّْلَامْدْ دْيَالُه فْاللِّيلْ يْسَرْقُوهْ وْيْݣُولُو لْلشَّعْبْ: رَاهْ تّْبْعَتْ مْنْ الْمُوتْ! وْغَتْكُونْ هَادْ الْكْدْبَة اللّْخْرَة كْفَسْ مْنْ اللّْوّْلَى».

65وْهُوَ يْݣُولْ لِيهُمْ بِيلَاطُسْ: «عَنْدْكُمْ عْسَّاسَا، إِيوَا سِيرُو وْدِيرُو الْعْسَّة عْلَى الْقْبَرْ كِيفْ بْغِيتُو».

66وْمْشَاوْ شَمّْعُو الْحَجْرَة دْ الْقْبَرْ وْدَارُو عْلِيهْ الْعْسَّة.