Mark 15

Arabic Bible Morocco Version - 2012 (الترجمة المغربية القياسية)

1الْفَصْلْ خْمْسْطَاشْ وْفْالصّْبَاحْ بْكْرِي، تَّافْقُو الرُّؤَسَا دْ رْجَالْ الدِّينْ وْالشّْيُوخْ وْالْعُلَمَا دْ الشّْرَعْ وْݣَاعْ الْكْبَارْ دْ الْمَحْكَمَة، وْكَتّْفُو يَسُوعْ وْدَّاوْهْ وْسَلّْمُوهْ لْبِيلَاطُسْ.

2وْسْوّْلْ بِيلَاطُسْ يَسُوعْ وْݣَالْ لِيهْ: «وَاشْ نْتَ هُوَ مَلِكْ لِيهُودْ؟» وْهُوَ يْجَاوْبُه: «رَاكْ ݣْلْتِيهَا بْنَفْسَكْ».

3وْكَانُو الرُّؤَسَا دْ رْجَالْ الدِّينْ كَيْتَّهْمُوهْ بْبْزَّافْ دْيَالْ التُّهَمْ.

4وْسْوّْلْ بِيلَاطُسْ يَسُوعْ مَرَّة خْرَى: «وَاشْ مَا عَنْدْكْ جْوَابْ؟ شُوفْ شْحَالْ مْنْ تُهْمَة كَيْتَّهْمُوكْ بِيهَا!».

5وَلَكِنْ يَسُوعْ مَا جَاوْبْ بْحْتَّى شِي حَاجَة خْرَى، وْعْلَى هَادْشِّي تّْعَجّْبْ بِيلَاطُسْ.

6وْكَانْ مْنْ الْعِيدْ لْلْعِيدْ كَيْطْلَقْ وَاحْدْ مْنْ الْمْسْجُونِينْ، اللِّي بْغَاوْ النَّاسْ.

7وْكَانْ وَاحْدْ الرَّاجْلْ سْمِيتُه بَارَابَاسْ فْالْحَبْسْ مْعَ هَادُوكْ اللِّي دَارُو الْفُوضَى وْقْتْلُو النَّاسْ فْوَقْتْ الْفُوضَى.

8وْمْشَاتْ جْمَاعَة دْ النَّاسْ عَنْدْ بِيلَاطُسْ وْطْلْبُو مْنُّه بَاشْ يْدِيرْ دَاكْشِّي اللِّي كَيْدِيرْ دِيمَا مْعَاهُمْ.

9وْݣَالْ لِيهُمْ: «وَاشْ بْغِيتُو نْطْلَقْ لِيكُمْ الْمَلِكْ دْيَالْ لِيهُودْ؟».

10حِيتْ بِيلَاطُسْ عْرَفْ بْلِّي مْنْ الْحْسَدْ اللِّي فْالرُّؤَسَا دْ رْجَالْ الدِّينْ قَدّْمُو لِيهْ يَسُوعْ.

11وَلَكِنْ الرُّؤَسَا دْ رْجَالْ الدِّينْ حَرّْشُو الجّْمَاعَة دْ النَّاسْ بَاشْ يْطْلْبُو مْنْ بِيلَاطُسْ يْطْلَقْ لِيهُمْ بَارَابَاسْ.

12وْعَاوْدْ سْوّْلْهُمْ بِيلَاطُسْ: «آشْ بْغِيتُو نْدِيرْ بْهَادْ الرَّاجْلْ اللِّي كَتْݣُولُو عْلِيهْ مَلِكْ لِيهُودْ؟».

13وْجَاوْبُوهْ بْالْغْوَاتْ: «صْلْبُه!».

14وْݣَالْ لِيهُمْ: «آشْ مْنْ شَرّْ دَارْ؟»، وَلَكِنْ هُمَ زَادُو كَيْغَوّْتُو: «صْلْبُه!».

15وْحِيتْ بِيلَاطُسْ كَانْ كَيْبْغِي يْدِيرْ الْخَاطْرْ لْلنَّاسْ، طْلَقْ لِيهُمْ بَارَابَاسْ أَمَّا يَسُوعْ سَلّْمُه بَاشْ يْتّْصْلَبْ مْنْ بَعْدْمَا صَوْطُوهْ.

16وْدَّاوْ الْعَسْكَرْ يَسُوعْ لْدَاخْلْ دْيَالْ الدَّارْ اللِّي هِيَ قْصَرْ الْحَاكْمْ، وْتّْجَمْعَاتْ تْمَّ الْفَرْقَة دْ الْعَسْكَرْ كُلّْهَا.

17وْلَبّْسُوهْ لْبَاسْ مْدَادِي، وْضْفْرُو تَاجْ دْيَالْ الشُّوكْ وْحَطُّوهْ لِيهْ عْلَى رَاسُه،

18وْبْدَاوْ كَيْقَدّْمُو لِيهْ السّْلَامْ وْكَيْݣُولُو: «السّْلَامْ عْلِيكْ آ مَلِكْ لِيهُودْ!».

19وْضْرْبُوهْ عْلَى رَاسُه بْالْقْصْبَة وْدْفْلُو عْلِيهْ، وْبْدَاوْ كَيْرَكْعُو عْلَى رْكَابِيهُمْ وْكَيْسَجْدُو لِيهْ.

20وْمْنْ بَعْدْمَا ضَحْكُو عْلِيهْ، حَيّْدُو لِيهْ اللّْبَاسْ الْمْدَادِي وْلَبّْسُوهْ حْوَايْجُه وْخَرّْجُوهْ بَاشْ يْصَلْبُوهْ.

21وْلَزّْمُو الْعَسْكَرْ عْلَى وَاحْدْ الرَّاجْلْ كَانْ رَاجْعْ مْنْ الْفْدَّانْ دْيَالُه بَاشْ يْهَزّْ الصّْلِيبْ دْيَالْ يَسُوعْ، وْهَادْ الرَّاجْلْ سْمِيتُه سِمْعَانْ مْنْ الْقَيْرَوَانْ، وْهُوَ الْبُو دْيَالْ إِسْكَنْدَرْ وْرُوفُسْ.

22وْدَّاوْ يَسُوعْ لْوَاحْدْ الْمُوضْعْ سْمِيتُه الْجُلْجُتَة، وْاللِّي كَيْعْنِي مُوضْعْ الْجُمْجُمَة.

23وْعْطَاوْهْ يْشْرَبْ الْخْمَرْ مْخَلّْطْ بْوَاحْدْ الْعْشْبَة سْمِيتْهَا الْمُرّْ، وَلَكِنْ هُوَ مَا بْغَاشْ.

24وْصَلْبُوهْ، وْقْسْمُو بِينَاتْهُمْ حْوَايْجُه بَعْدْمَا ضْرْبُو عْلِيهُمْ الْعُودْ، بَاشْ يْشُوفُو كُلّْ وَاحْدْ أَشْنُو غَادِي يَاخُدْ.

25وْمْلِّي صَلْبُوهْ كَانْتْ التّْسْعُودْ دْيَالْ الصّْبَاحْ.

26وْكْتْبُو فْوَاحْدْ اللُّوحَة التُّهْمَة دْيَالُه: «مَلِكْ لِيهُودْ».

27وْصَلْبُو مْعَاهْ جُوجْ دْيَالْ الشّْفَارَا، وَاحْدْ عْلَى لِيمْنْ دْيَالُه وْلَاخُرْ عْلَى لِيسْرْ. [

28وْهَكَّا تْحَقّْقْ دَاكْشِّي اللِّي مْكْتُوبْ عْلِيهْ فْكْتَابْ اللَّهْ: «وْحْسْبُوهْ مْعَ الْمُجْرِمِينْ».]

29وْكَانُو النَّاسْ اللِّي دَايْزِينْ كَيْعَايْرُوهْ وْكَيْضَوّْرُو رَاسْهُمْ وْكَيْݣُولُو لِيهْ: «آ اللِّي غَتْرَيّْبْ بِيتْ اللَّهْ وْغَتْعَاوْدْ تْبْنِيهْ فْتْلْتْ يَّامْ!

30نْجِّي رَاسْكْ وْنْزَلْ مْنْ فُوقْ الصّْلِيبْ!».

31وْكَانُو الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ حْتَّى هُمَ كَيْضَحْكُو عْلِيهْ وْكَيْݣُولُو بِينَاتْهُمْ: «نْجَّا نَاسْ خْرِينْ وَلَكِنْ مَا قْدَرْشْ يْنَجِّي رَاسُه.

32إِيوَا يْنْزَلْ دَابَا الْمَسِيحْ مَلِكْ إِسْرَائِيلْ مْنْ فُوقْ الصّْلِيبْ، بَاشْ إِلَا شْفْنَا هَادْشِّي نْآمْنُو بِيهْ!». وْحْتَّى الشّْفَارَا اللِّي تّْصْلْبُو مْعَاهْ عَايْرُوهْ بْحَالْ لْخْرِينْ.

33وْطَاحْ الضّْلَامْ عْلَى الْبْلَادْ كُلّْهَا مْنْ الطّْنَاشْ دْ النّْهَارْ حْتَّى لْلتّْلَاتَة دْ الْعْشِيَّة.

34وْمْعَ جْوَايْهْ التّْلَاتَة دْيَالْ الْعْشِيَّة، غَوّْتْ يَسُوعْ بْصُوتْ عَالِي: «إِيلِي، إِيلِي، لِمَا شَبَقْتَنِي؟» اللِّي كَتْعْنِي: «إِلَاهِي، إِلَاهِي، عْلَاشْ سْمَحْتِي فِيَّ؟».

35وْسْمْعُوهْ شِي وْحْدِينْ مْنْ هَادُوكْ اللِّي كَانُو وَاقْفِينْ تْمَّ وْݣَالُو: «رَاهْ كَيْعَيّْطْ عْلَى إِيلِيَّا!».

36وْجْرَّى وَاحْدْ مْنّْهُمْ وْخْدَا طَرْفْ دْيَالْ التُّوبْ وْفَزّْݣُه بْالْخْلّْ وْدَارُه فْالرَّاسْ دْيَالْ وَاحْدْ الْقْصْبَة وْمْدُّه لِيهْ بَاشْ يْشْرَبْ وْݣَالْ: «خَلِّيهْ حْتَّى نْشُوفُو وَاشْ غَادِي يْجِي إِيلِيَّا يْنَزّْلُه مْنْ فُوقْ الصّْلِيبْ».

37وْغَوّْتْ يَسُوعْ مَرَّة خْرَى بْصُوتْ عَالِي وْمَاتْ.

38وْتْشَرّْݣَاتْ الْخَامِيَّة دْيَالْ بِيتْ اللَّهْ مْنْ الْفُوقْ لْلْتَحْتْ.

39وْمْلِّي الْقَايْدْ دْ الْعَسْكَرْ اللِّي كَانْ وَاقْفْ قُدَّامْ يَسُوعْ، شَافْ الْمُوتْ دْيَالُه كِيفَاشْ وْقْعَاتْ، ݣَالْ: «فْالْحَقِيقَة هَادْ الرَّاجْلْ كَانْ وَلْدْ اللَّهْ».

40وْكَانُو تْمَّ شِي عْيَالَاتْ كَيْشُوفُو مْنْ بْعِيدْ، اللِّي مْنْ بِينَاتْهُمْ مَرْيَمْ الْمَجْدَلِيَّة، وْمَرْيَمْ أُمّْ يَعْقُوبْ الصّْغِيرْ وْيُوسِي، وْسَالُومَة.

41هَادُو كَانُو كَيْتْبْعُو يَسُوعْ وْكَيْتّْسَخّْرُو عْلِيهْ مْلِّي كَانْ فْالْجَلِيلْ، وْكَانُو حَاضْرِينْ بْزَّافْ دْ الْعْيَالَاتْ خْرِينْ اللِّي جَاوْ لْأُورْشَلِيمْ مْعَ يَسُوعْ.

42وْفْالْعْشِيَّة دْ النّْهَارْ اللِّي كَيْوَجّْدُو فِيهْ لِيهُودْ لْلسّْبْتْ.

43جَا يُوسْفْ اللِّي هُوَ مْنْ الرَّامَة، وْهُوَ مْنْ كْبَارْ الْمَحْكَمَة، وْكَانْ مْنْ النَّاسْ اللِّي كَيْتّْسْنَّاوْ مَمْلَكَةْ اللَّهْ، زْعَمْ وْمْشَى عَنْدْ بِيلَاطُسْ وْطْلْبُه بَاشْ يْعْطِيهْ الدَّاتْ دْيَالْ يَسُوعْ.

44وْهُوَ يْتّْعَجّْبْ بِيلَاطُسْ مْلِّي سْمَعْ بْلِّي يَسُوعْ مَاتْ دْغْيَا. وْعَيّْطْ عْلَى الْقَايْدْ دْ الْعَسْكَرْ وْسْوّْلُه: «وَاشْ دْغْيَا مَاتْ يَسُوعْ؟».

45وْمْلِّي تْحَقّْقْ مْنْ الْخْبَارْ مْنْ عَنْدْ الْقَايْدْ دْ الْعَسْكَرْ، عْطَى الدَّاتْ دْيَالْ يَسُوعْ لْيُوسْفْ.

46وْشْرَا يُوسْفْ الْكْتَّانْ، وْنَزّْلْ يَسُوعْ وْكَفّْنُه بْالْكْتَّانْ وْدَارُه فْوَاحْدْ الْقْبَرْ اللِّي كَانْ حَفْرُه فْالصّْخَرْ، وْرَدّْ حَجْرَة كْبِيرَة عْلَى بَابْ الْقْبَرْ.

47وْشَافْتْ مَرْيَمْ الْمَجْدَلِيَّة وْمَرْيَمْ أُمّْ يُوسِي فِينْ تّْدْفَنْ يَسُوعْ.

← Chapter 14 Chapter 16 →