Luke 8

Arabic Bible Morocco Version - 2012 (الترجمة المغربية القياسية)

1الْفَصْلْ التَّامْنْ وْمْنْ بَعْدْ دَاكْشِّي سَافْرْ يَسُوعْ مْنْ مْدِينَة لْمْدِينَة وْمْنْ دُوَّارْ لْدُوَّارْ، كَيْخَبّْرْ وْكَيْبَشّْرْ بْمَمْلَكَةْ اللَّهْ، وْكَانُو مْعَاهْ التّْلَامْدْ دْيَاوْلُه بْطْنَاشْ،

2وْشِي عْيَالَاتْ كَانْ شْفَاهُمْ مْنْ الجّْنُونْ وْالْمَرْضْ، هُمَ مَرْيَمْ اللِّي كَيْسَمِّيوْهَا الْمَجْدَلِيَّة، اللِّي خَرْجُو مْنّْهَا سْبْعَة دْ الجّْنُونْ،

3وْيُوَنَّا مْرَاةْ خُوزِي لُوكِيلْ دْ هِيرُودُسْ، وْسُوسَنَّة، وْبْزَّافْ دْ الْعْيَالَاتْ خْرِينْ اللِّي كَانُو كَيْعَاوْنُو يَسُوعْ وْتْلَامْدُه مْنْ مَالْهُمْ.

4وْمْلِّي تّْجَمْعَاتْ عْلِيهْ جْمَاعَة كْبِيرَة دْ النَّاسْ اللِّي جَاوْ مْنْ كُلّْ مْدِينَة، تّْكَلّْمْ مْعَاهُمْ بْوَاحْدْ الْمْتَالْ، وْݣَالْ:

5«هَادَا وَاحْدْ الرَّاجْلْ خْرَجْ بَاشْ يْزْرَعْ الزّْرِّيعَة دْيَالُه، وْمْلِّي كَانْ كَيْزْرَعْ، طَاحُو شِي حَبَّاتْ فْجَنْبْ الطّْرِيقْ وْتّْعْفَسْ عْلِيهُمْ وْكْلَاوْهُمْ الطّْيُورْ،

6وْطَاحُو حَبَّاتْ خْرِينْ عْلَى الْحْجَرْ، وْمْلِّي نْبْتُو، دْغْيَا يَبْسُو حِيتْ مَا طَاحُوشْ فْأَرْضْ رَاوْيَة،

7وْطَاحُو حَبَّاتْ خْرِينْ فْوَسْطْ الشُّوكْ، وْمْلِّي كْبَرْ مْعَاهُمْ الشُّوكْ خْنَقْهُمْ،

8وْطَاحُو حَبَّاتْ خْرِينْ فْالْأَرْضْ الْمْزْيَانَة، وْنْبْتُو، وْعْطَاوْ مْيَةْ حَبَّة». وْݣَالْ يَسُوعْ بْصُوتْ عَالِي: «اللِّي عَنْدُه شِي وْدْنِينْ بَاشْ يْسْمَعْ، يْسْمَعْ!».

9وْسْوّْلُوهْ التّْلَامْدْ دْيَالُه: «أَشْنُو هُوَ الْمَعْنَى دْيَالْ هَادْ الْمْتَالْ؟»

10وْهُوَ يْجَاوْبْهُمْ: «نْتُمَ تّْعْطَاكُمْ تْعَرْفُو أَسْرَارْ مَمْلَكَةْ اللَّهْ، أَمَّا غِيرْكُمْ، كَنْتّْكَلّْمْ مْعَاهُمْ بْالْمْتُولْ، بَاشْ يْكُونُو شَايْفِينْ بْعِينِيهُمْ وْمَا كَيْشُوفُوشْ، وْسَامْعِينْ بْوْدْنِيهُمْ وْمَا كَيْفَهْمُوشْ».

11«وْدَابَا هَا الْمَعْنَى دْيَالْ هَادْ الْمْتَالْ: الزّْرَعْ هُوَ كْلَامْ اللَّهْ.

12اللِّي طَاحْ مْنُّه فْجَنْبْ الطّْرِيقْ، هُمَ اللِّي كَيْسَمْعُو كْلَامْ اللَّهْ، وْمْنْ بَعْدْ كَيْجِي إِبْلِيسْ وْكَيْحَيّْدْ الْكْلَامْ مْنْ قَلْبْهُمْ بَاشْ مَا يْآمْنُوشْ بِيهْ وْيْنْجَاوْ.

13وْاللِّي طَاحْ مْنُّه عْلَى الْحْجَرْ، هُمَ اللِّي كَيْسَمْعُو كْلَامْ اللَّهْ وْكَيْقْبْلُوهْ بْالْفَرْحَة، وَلَكِنْ حِيتْ مَا عَنْدْهُمْشْ الجّْدَرْ، كَيْآمْنُو غِيرْ وَقْتْ قْلِيلْ، وْمْلِّي كَيْتّْجَرّْبُو كَيْبَعّْدُو عْلَى الْإِيمَانْ.

14وْاللِّي طَاحْ مْنُّه بِينْ الشُّوكْ، هُمَ اللِّي كَيْسَمْعُو كْلَامْ اللَّهْ، وْحِيتْ كَيْدِّيوْهَا غِيرْ فْهْمُومْ الدّْنْيَا وْخِيرَاتْهَا وْالشَّهَوَاتْ دْيَالْهَا كَيْتّْخَنْقُو، وْغَلّْتْهُمْ مَا كَتْطِيبْشْ.

15وْاللِّي طَاحْ فْالْأَرْضْ الْمْزْيَانَة، هُمَ اللِّي كَيْسَمْعُو كْلَامْ اللَّهْ وْكَيْقْبْلُوهْ دْغْيَا بْقَلْبْ صَادْقْ وْنِيَّة مْزْيَانَة، وْبْصْبَرْهُمْ كَيْعْطِيوْ الْغْلَّة».

16«مَا كَايْنْ حْتَّى حَدّْ كَيْشْعَلْ الْقْنْدِيلْ وْكَيْكْفِي عْلِيهْ الْخَابْيَة وْلَا كَيْحَطُّه تَحْتْ الْفْرَاشْ، بْالْعَكْسْ كَيْحَطُّه فْبْلَاصْتُه بَاشْ يْضَوِّي لْهَادُوكْ اللِّي دَاخْلِينْ.

17حِيتْ ݣَاعْ اللِّي مْخَبِّي غَادِي يْبَانْ، وْݣَاعْ اللِّي مْسْتُورْ غَادِي يْتّْفْضَحْ وْيْتّْعْرَفْ.

18رْدُّو بَالْكُمْ كِيفَاشْ كَتْسَمْعُو، حِيتْ اللِّي عَنْدُه، غَيْتّْعْطَاهْ كْتَرْ. وْاللِّي مَا عَنْدُوشْ، حْتَّى دَاكْشِّي اللِّي كَيْسْحَابْ لِيهْ عَنْدُه، غَادِي يْتّْحَيّْدْ لِيهْ».

19وْجَاتْ لْعَنْدْ يَسُوعْ مُّه وْخُوتُه، وْمَا قَدْرُوشْ يْوَصْلُو لْعَنْدُه مْنْ كْتْرَةْ الزّْحَامْ،

20وْݣَالُو لِيهْ شِي نَاسْ: «مُّكْ وْخُوتْكْ وَاقْفِينْ كَيْتّْسْنَّاوْ عْلَى بْرَّا، بْغَاوْ يْشُوفُوكْ».

21وْهُوَ يْجَاوْبْهُمْ: «مِّي وْخُوتِي هُمَ اللِّي كَيْسَمْعُو كْلَامْ اللَّهْ وْكَيْدِيرُو بِيهْ».

22وْفْوَاحْدْ النّْهَارْ رْكَبْ فْالْفْلُوكَة هُوَ وْتْلَامْدُه، وْݣَالْ لِيهُمْ: «أَجِيوْ نْقْطْعُو لْلجِّهَة لْخْرَى دْيَالْ الْبُحَيْرَة». وْهُمَ يْمْشِيوْ،

23وْمْلِّي كَانُو غَادْيِينْ نْعَسْ يَسُوعْ، وْتّْحَرّْكَاتْ رِيحْ قْوِيَّة فْالْبُحَيْرَة وْقَرّْبَاتْ الْفْلُوكَة تْعْمَرْ بْالْمَا، وْوْلَّاوْ فْخَطَرْ.

24وْقَرّْبُو لْعَنْدُه تْلَامْدُه وْفَيّْقُوهْ وْݣَالُو لِيهْ: «آ سِيدِي، آ سِيدِي! رَاهْ حْنَا كَنْمُوتُو!» وْنَاضْ يَسُوعْ وْنْهَضْ فْالرِّيحْ وْالْمَّاجْ وْهِيَ تّْهَدّْنْ، وْزْيَانْ الْجَوّْ.

25وْݣَالْ لِيهُمْ: «فِينْ هُوَ إِيمَانْكُمْ؟». وْخَافُو وْتّْعَجّْبُو، وْݣَالُو لْبَعْضِيَّاتْهُمْ: «شْكُونْ هُوَ هَادَا اللِّي حْتَّى الرِّيحْ وْالْمَّاجْ كَيْآمْرْهُمْ وْكَيْطِيعُوهْ؟».

26وْوَصْلُو لْبْلَادْ الْجَرَاسِيِّينْ، اللِّي فْالجِّهَة لْخْرَى دْ الْجَلِيلْ،

27وْمْلِّي نْزَلْ يَسُوعْ لْلْبْرّْ تّْلَاقَى بِيهْ وَاحْدْ الرَّاجْلْ مْنْ الْمْدِينَة فِيهْ الجّْنُونْ، مُدَّة طْوِيلَة وْهُوَ مَا لَابْسْ وَالُو، وْمَا كَانْشْ سَاكْنْ فْشِي دَارْ، وَلَكِنْ فْالرُّوضَة،

28وْغِيرْ شَافْ يَسُوعْ، وْهُوَ يْغَوّْتْ بْصُوتْ عَالِي وْتّْلَاحْ عَنْدْ رْجْلِيهْ وْݣَالْ: «آشْ بِينِي وْبِينْكْ آ يَسُوعْ وَلْدْ اللَّهْ الْعَالِي! أَنَا مْزَاوْݣْ فِيكْ مَا تْعَدّْبْنِيشْ».

29ݣَالْ هَادْشِّي حِيتْ يَسُوعْ آمْرْ الجّْنْ بَاشْ يْخْرَجْ مْنْ الرَّاجْلْ. حِيتْ بْزَّافْ دْ الْمَرَّاتْ كَانْ هَادْ الجّْنْ كَيْسَيْطَرْ عْلِيهْ، وْكَانُو النَّاسْ كَيْحَبْسُو الرَّاجْلْ وْكَيْكَتّْفُوهْ وْكَيْرَبْطُوهْ بْالسّْنَاسْلْ وْالْحْبَالْ، وَلَكِنْ كَانْ كَيْقَطّْعْهُمْ كُلّْهُمْ وْكَيْدِّيهْ الجّْنْ لْلْخْلَا.

30وْسْوّْلُه يَسُوعْ: «أَشْنُو سْمِيتْكْ؟» وْرَدّْ عْلِيهْ: «سْمِيتِي لَجِيُونْ». حِيتْ كَانُو فِيهْ بْزَّافْ دْ الجّْنُونْ.

31وْبْدَاوْ الجّْنُونْ كَيْرَغْبُو يَسُوعْ بَاشْ مَا يْجَرِّيشْ عْلِيهُمْ لْلْهَاوِيَة.

32وْكَانْتْ تْمَّ وَاحْدْ الْقْطْعَة كْبِيرَة دْيَالْ الْحْلَالْفْ سَارْحَة فْالجّْبَلْ، وْرَغْبُو الجّْنُونْ يَسُوعْ بَاشْ يْخَلِّيهُمْ يْدَخْلُو فْالْحْلَالْفْ، وْهُوَ يْخَلِّيهُمْ.

33وْخَرْجُو الجّْنُونْ مْنْ الرَّاجْلْ وْدَخْلُو فْالْحْلَالْفْ، وْجْرَاتْ الْقْطْعَة لْلْحَافَة دْيَالْ الجّْبَلْ وْطَاحْتْ فْالْبُحَيْرَة وْغَرْقَاتْ.

34وْمْلِّي شَافُو السّْرَّاحَا هَادْشِّي اللِّي جْرَا، هَرْبُو وْدَيّْعُو الْخْبَارْ فْالْمْدِينَة وْفْالْفِيرْمَاتْ،

35وْخَرْجُو النَّاسْ بَاشْ يْشُوفُو آشْ وْقَعْ، وْجَاوْ لْعَنْدْ يَسُوعْ، وْلْقَاوْ الرَّاجْلْ اللِّي خَرْجُو مْنُّه الجّْنُونْ ݣَالْسْ حْدَا رْجْلِيهْ، لَابْسْ حْوَايْجُه، وْبْعَقْلُه، وْهُمَ يْتّْخَلْعُو.

36وْخَبّْرُوهُمْ هَادُوكْ اللِّي شَافُو دَاكْشِّي اللِّي جْرَا، كِيفَاشْ تّْشْفَى الرَّاجْلْ الْمْسْكُونْ.

37وْطْلْبُو ݣَاعْ مَّالِينْ الجِّهَة دْيَالْ الْجَرَاسِيِّينْ مْنْ يَسُوعْ بَاشْ يْبَعّْدْ عْلِيهُمْ، حِيتْ كَانُو خَايْفِينْ بْزَّافْ. وْرْكَبْ يَسُوعْ فْالْفْلُوكَة وْرْجَعْ مْنْ تْمَّ.

38وْالرَّاجْلْ اللِّي خَرْجُو مْنُّه الجّْنُونْ، رْغَبْ يَسُوعْ بَاشْ يْمْشِي مْعَاهْ، وَلَكِنْ هُوَ صِيفْطُه وْݣَالْ لِيهْ:

39«رْجَعْ لْدَارْكْ وْخَبّْرْهُمْ بْݣَاعْ دَاكْشِّي اللِّي دَارْ اللَّهْ مْعَاكْ». وْمْشَى الرَّاجْلْ كَيْخَبّْرْ فْالْمْدِينَة كَامْلَة بْݣَاعْ دَاكْشِّي اللِّي دَارْ مْعَاهْ يَسُوعْ.

40وْمْلِّي رْجَعْ يَسُوعْ رَحّْبَاتْ بِيهْ وَاحْدْ الجّْمَاعَة دْ النَّاسْ اللِّي كَانْتْ كَتّْسْنَّاهْ،

41وْجَا عَنْدُه وَاحْدْ الرَّاجْلْ مْنْ الرُّؤَسَا دْيَالْ دَارْ الصّْلَاة سْمِيتُه يَايْرُسْ، وْطَاحْ عَنْدْ رْجْلِيهْ وْرَغْبُه بَاشْ يْدْخَلْ عَنْدُه لْدَارُه،

42عْلَاحْقَّاشْ عَنْدُه بَنْتْ وَحْدَة فْعْمَرْهَا طْنَاشْرْ عَامْ تْقْرِيبًا كَانْتْ كَتْمُوتْ. وْمْلِّي كَانْ غَادِي، كَانُو الجّْمَاعَاتْ دْ النَّاسْ كَيْتّْزَاحْمُو عْلِيهْ.

43وْكَانْتْ تْمَّ وَاحْدْ الْمْرَاة، طْنَاشْرْ عَامْ وْهِيَ كَتْدُوزْ بْالدّْمْ، خْسْرَاتْ كُلّْ مَا كَانْتْ كَتْمْلَكْ عَنْدْ الْأَطِبَّا وْمَا قْدَرْ حْتَّى وَاحْدْ يْدَاوِيهَا.

44جَاتْ مْنْ مُورَا يَسُوعْ، وْغِيرْ مْسَّاتْ جْلَايْلُه وْهُوَ يْتّْحْبَسْ مْنّْهَا الدّْمْ.

45وْݣَالْ يَسُوعْ لْلنَّاسْ: «شْكُونْ اللِّي مْسّْنِي؟»، وْنْكْرُو كُلّْهُمْ، وْنْطَقْ بُطْرُسْ وْݣَالْ: «آ سِيدِي، الجّْمَاعَاتْ دْ النَّاسْ اللِّي ضَايْرِينْ بِيكْ هُمَ اللِّي كَيْزَاحْمُوكْ».

46وَلَكِنْ يَسُوعْ ݣَالْ: «رَاهْ شِي حَدّْ مْسّْنِي! حِيتْ حْسِّيتْ بْشِي قُوَّة خْرْجَاتْ مْنِّي».

47وْمْلِّي شَافْتْ الْمْرَاة بْلِّي دَاكْشِّي اللِّي دَارْتْ مَا بْقَاشْ مْخَبِّي، جَاتْ لْعَنْدُه كَتّْرَعّْدْ وْطَاحْتْ عَنْدْ رْجْلِيهْ، وْخَبّْرَاتُه قُدَّامْ النَّاسْ كُلّْهُمْ عْلَى السَّبَبْ اللِّي خْلَّاهَا مْسَّاتُه وْكِيفَاشْ بْرَاتْ دْغْيَا.

48وْهُوَ يْݣُولْ لِيهَا: «آ بَنْتِي، إِيمَانْكْ رَاهْ نْجَّاكْ، سِيرِي وْنْتِي هَانْيَة!».

49وْفْالْوَقْتْ اللِّي كَانْ كَيْتّْكَلّْمْ، جَا وَاحْدْ الْمْرْسُولْ مْنْ دَارْ الرَّئِيسْ دْيَالْ دَارْ الصّْلَاة وْݣَالْ لِيهْ: «رَاهْ بَنْتْكْ مَاتْتْ، بْلَا مَا تْعَدّْبْ الْمُعَلِّمْ»،

50وْسْمْعُه يَسُوعْ، وْݣَالْ لْيَايْرُسْ: «مَا تْخَافْشْ! غِيرْ آمْنْ وْبَنْتْكْ غَادِي تّْشَافَى».

51وْمْلِّي وْصَلْ لْلدَّارْ، مَا خْلَّا حْتَّى حَدّْ يْدْخَلْ، مْنْ غِيرْ بُطْرُسْ وْيُوحَنَّا وْيَعْقُوبْ وْبَّاتْ الْبَنْتْ وْمّْهَا،

52وْكَانُو ݣَاعْ النَّاسْ كَيْبْكِيوْ وْكَيْنْوّْحُو عْلَى الْبَنْتْ، وَلَكِنْ يَسُوعْ ݣَالْ لِيهُمْ: «مَا تْبْكِيوْشْ عْلِيهَا، حِيتْ رَاهَا مَا مَاتْتْشْ، وَلَكِنْ غِيرْ نَاعْسَة».

53وْبْدَاوْ كَيْضَحْكُو عْلِيهْ، حِيتْ كَانُو عَارْفِينْ بْلِّي مَاتْتْ.

54وَلَكِنْ هُوَ شْدّْ الْبَنْتْ مْنْ يْدّْهَا وْعَيّْطْ عْلِيهَا، وْݣَالْ: «نُوضِي آ بَنْتِي!».

55وْدِيكْ السَّاعَة رْجْعَاتْ لِيهَا الرُّوحْ وْنَاضْتْ، وْآمْرْهُمْ بَاشْ يْعْطِيوْهَا تَاكُلْ،

56وْتّْعَجّْبُو وَالِدِيهَا، وْوْصَّاهُمْ بَاشْ مَا يْخَبّْرُو حَدّْ بْدَاكْشِّي اللِّي وْقَعْ.

← Chapter 7 Chapter 9 →