John 20

Arabic Bible Morocco Version - 2012 (الترجمة المغربية القياسية)

1الْفَصْلْ عْشْرِينْ وْنْهَارْ الْحَدّْ فْالصّْبَاحْ بْكْرِي، جَاتْ مَرْيَمْ الْمَجْدَلِيَّة لْلْقْبَرْ وْكَانْ بَاقِي الضّْلَامْ، وْهِيَ تْشُوفْ الْحَجْرَة مْحَيّْدَة مْنْ بَابْ الْقْبَرْ.

2وْمْشَاتْ كَتْجْرِي لْعَنْدْ سِمْعَانْ بُطْرُسْ وْالتّْلْمِيدْ لَاخُرْ اللِّي كَانْ كَيْبْغِيهْ يَسُوعْ، وْݣَالْتْ لِيهُمْ: «رَاهْ هْزُّو الدَّاتْ دْيَالْ الرَّبّْ يَسُوعْ مْنْ الْقْبَرْ وْمَا عْرَفْنَاشْ فِينْ دَارُوهَا!».

3وْهُوَ يْخْرَجْ بُطْرُسْ وْالتّْلْمِيدْ لَاخُرْ وْمْشَاوْ لْلْقْبَرْ،

4وْكَانُو بْجُوجْ كَيْجْرِيوْ، وَلَكِنْ التّْلْمِيدْ لَاخُرْ سْبَقْ بُطْرُسْ وْوْصَلْ هُوَ اللّْوّْلْ لْلْقْبَرْ.

5وْطْلّْ وْهُوَ يْبَانْ لِيهْ الْكْفَنْ مْحْطُوطْ فْالْأَرْضْ وَلَكِنْ مَا دْخَلْشْ.

6وْلْحَقْ عْلِيهْ سِمْعَانْ بُطْرُسْ وْدْخَلْ لْلْقْبَرْ وْشَافْ الْكْفَنْ مْحْطُوطْ فْالْأَرْضْ،

7وْالزِّيفْ اللِّي كَانْ عْلَى رَاسْ يَسُوعْ مَا كَانْشْ مْحْطُوطْ مْعَ الْكْفَنْ، وَلَكِنْ كَانْ مْجْمُوعْ فْبْلَاصَة خْرَى بُوحْدُه.

8وْدِيكْ السَّاعَة دْخَلْ حْتَّى التّْلْمِيدْ لَاخُرْ اللِّي وْصَلْ هُوَ اللّْوّْلْ لْلْقْبَرْ، وْشَافْ وْهُوَ يْآمْنْ.

9حِيتْ مَازَالْ مَا كَانُوشْ فَاهْمِينْ الْكْلَامْ اللِّي فْكْتَابْ اللَّهْ، اللِّي كَيْݣُولْ بْلِّي الْمَسِيحْ خَاصُّه يْتّْبْعَتْ مْنْ الْمُوتْ.

10وْرْجْعُو التّْلَامْدْ بْجُوجْ بْحَالْهُمْ.

11وَلَكِنْ مَرْيَمْ الْمَجْدَلِيَّة، بْقَاتْ وَاقْفَة حْدَا الْقْبَرْ عْلَى بْرَّا كَتْبْكِي. وْمْلِّي كَانْتْ كَتْبْكِي، طْلَّاتْ عْلَى الْقْبَرْ،

12وْهِيَ تْشُوفْ جُوجْ دْ الْمَلَايْكَة لَابْسِينْ حْوَايْجْ بِيضِينْ ݣَالْسِينْ فِينْ كَانْتْ الدَّاتْ دْيَالْ يَسُوعْ مْحْطُوطَة، وَاحْدْ حْدَا الرَّاسْ وْلَاخُرْ حْدَا الرّْجْلِينْ.

13وْهُمَ يْݣُولُو لِيهَا: «آ الْمْرَاة، عْلَاشْ كَتْبْكِي؟»، وْݣَالْتْ لِيهُمْ: «رَاهْ دَّاوْ سِيدِي وْمَا عْرَفْتْشْ فِينْ دَارُوهْ!».

14وْمْلِّي ݣَالْتْ هَادْشِّي، تْلَفّْتَاتْ مُورَاهَا وْهِيَ تْشُوفْ يَسُوعْ وَاقْفْ، وْمَا عْرْفَاتْشْ بْلِّي هُوَ يَسُوعْ.

15وْسْوّْلْهَا: «آ الْمْرَاة، عْلَاشْ كَتْبْكِي؟ وْعْلَى مْنْ كَتْقَلّْبِي؟». وْحْسَابْ لِيهَا وَاشْ هُوَ الجّْنَايْنِي، وْهِيَ تْجَاوْبُه: «آ سِيدِي، إِلَا كْنْتِ نْتَ اللِّي هْزِّيتِيهْ، غِيرْ ݣُولْ لِيَّ فِينْ دْرْتِيهْ وْأَنَا غَنْدِّيهْ».

16وْݣَالْ لِيهَا يَسُوعْ: «آ مَرْيَمْ!». وْهِيَ تْلَفّْتْ وْݣَالْتْ لِيهْ بْالْعِبْرِيَّة: «رَبُّونِي!» -اللِّي كَتْعْنِي آ الْمُعَلِّمْ-.

17وْݣَالْ لِيهَا يَسُوعْ: «مَا تْمْسِّينِيشْ، حِيتْ بَاقِي مَا طْلَعْتْ لْعَنْدْ الْآبْ، وَلَكِنْ سِيرِي لْعَنْدْ خُوتِي وْݣُولِي لِيهُمْ: رَانِي غَادِي نْطْلَعْ لْعَنْدْ بَّا وْبَّاكُمْ، وْإِلَاهِي وْإِلَاهْكُمْ».

18وْرْجْعَاتْ مَرْيَمْ الْمَجْدَلِيَّة وْخَبّْرَاتْ التّْلَامْدْ وْݣَالْتْ لِيهُمْ: «رَانِي شْفْتْ الرَّبّْ»، وْعَاوْدَاتْ لِيهُمْ دَاكْشِّي اللِّي ݣَالْ لِيهَا يَسُوعْ.

19وْفْالْعْشِيَّة دْيَالْ نْهَارْ الْحَدّْ، اللِّي هُوَ النّْهَارْ اللّْوّْلْ فْالسِّيمَانَة، كَانُو التّْلَامْدْ مْجْمُوعِينْ فْوَاحْدْ الْبْلَاصَة وْسَادِّينْ الْبِيبَانْ، عْلَاحْقَّاشْ كَانُو خَايْفِينْ مْنْ لِيهُودْ. وْهُوَ يْجِي يَسُوعْ وْوْقَفْ وَسْطْهُمْ وْݣَالْ: «السّْلَامْ عْلِيكُمْ!».

20وْمْلِّي ݣَالْ لِيهُمْ هَادْشِّي وْرَّاهُمْ يْدِّيهْ وْجَنْبُه، وْفْرْحُو التّْلَامْدْ مْلِّي شَافُو الرَّبّْ.

21وْهُوَ يْݣُولْ لِيهُمْ يَسُوعْ عَاوْتَانِي: «السّْلَامْ عْلِيكُمْ! كِمَا صِيفْطْنِي الْآبْ غَادِي نْصِيفْطْكُمْ حْتَّى أَنَا».

22وْمْلِّي ݣَالْ هَادْشِّي، نْفَخْ فِيهُمْ وْݣَالْ لِيهُمْ: «قْبْلُو الرُّوحْ الْقُدُسْ،

23اللِّي غْفَرْتُو لِيهْ دْنُوبُه غَتّْغْفَرْ لِيهْ، وْاللِّي مَا غْفَرْتُوشْ لِيهْ دْنُوبُه مَا غَتّْغْفَرْشْ لِيهْ».

24وَلَكِنْ تُومَا، وَاحْدْ مْنْ التّْلَامْدْ الطّْنَاشْ، اللِّي كَيْسَمِّيوْهْ التّْوِيمِي، مَا كَانْشْ مْعَاهُمْ مْلِّي جَا يَسُوعْ.

25وْهُمَ يْݣُولُو لِيهْ التّْلَامْدْ لْخْرِينْ: «رَاهْ شْفْنَا الرَّبّْ!». وْجَاوْبْهُمْ: «إِلَا مَا شْفْتْشْ فْيْدِّيهْ الْأَتَرْ دْيَالْ الْمْسَامْرْ، وْحَطِّيتْ صْبْعِي فْالْأَتَرْ، وْحَطِّيتْ يْدِّي فْجَنْبُه، رَاهْ مَا غَنْآمْنْشْ».

26وْمْنْ بَعْدْ تْمَنْ يَّامْ، كَانُو تْلَامْدْ يَسُوعْ مْجْمُوعِينْ مَرَّة خْرَى وْمْعَاهُمْ تُومَا، وْكَانُو الْبِيبَانْ مْسْدُودِينْ. وْهُوَ يْجِي يَسُوعْ وْوْقَفْ فْالْوَسْطْ، وْݣَالْ لِيهُمْ: «السّْلَامْ عْلِيكُمْ!».

27وْمْنْ بَعْدْ ݣَالْ لْتُومَا: «أَرَا صْبْعْكْ لّْهْنَا وْشُوفْ يْدِّيَّ، وْأَرَا يْدّْكْ حَطّْهَا عْلَى جَنْبِي، وْمَا تْشَكّْشْ وَلَكِنْ كُونْ مُومْنْ».

28وْجَاوْبُه تُومَا وْݣَالْ لِيهْ: «رْبِّي وْإِلَاهِي!».

29وْهُوَ يْݣُولْ لِيهْ يَسُوعْ: «عْلَاحْقَّاشْ شْفْتِينِي آمْنْتِي، وَلَكِنْ سْعْدَاتْ هَادُوكْ اللِّي آمْنُو بْلَا مَا يْشُوفُو».

30وْدَارْ يَسُوعْ بْزَّافْ دْيَالْ الْعَلَامَاتْ خْرِينْ قُدَّامْ تْلَامْدُه مَا تّْكَتْبُوشْ فْهَادْ الْكْتَابْ.

31أَمَّا هَادْ الْكْلَامْ رَاهْ تّْكْتَبْ بَاشْ تْآمْنُو بْلِّي يَسُوعْ هُوَ الْمَسِيحْ وَلْدْ اللَّهْ، وْبَاشْ إِلَا آمْنْتُو تْكُونْ عَنْدْكُمْ حَيَاةْ فْالْإِسْمْ دْيَالُه.

← Chapter 19 Chapter 21 →