2 Timothy 4

Arabic Bible Morocco Version - 2012 (الترجمة المغربية القياسية)

1الْفَصْلْ الرَّابْعْ كَنْطْلَبْ مْنّْكْ بْكُلّْ قُوَّة قُدَّامْ اللَّهْ وْالْمَسِيحْ يَسُوعْ، اللِّي غَيْحْكَمْ عْلَى الْحَيِّينْ وْالْمْيّْتِينْ مْلِّي غَيْرْجَعْ فْالْمَمْلَكَة دْيَالُه،

2بَاشْ تْخَبّْرْ بْكْلَامْ اللَّهْ، وْتْكُونْ مُوجُودْ فْالْوَقْتْ اللِّي مْنَاسْبْ وْاللِّي مَا مْنَاسْبْشْ، وْبَاشْ تْخَاصْمْ، وْتْنَبّْهْ وْتْشَجّْعْ بْالصّْبَرْ الْكْتِيرْ وْنْتَ كَتْعَلّْمْ.

3حِيتْ غَيْجِي وَاحْدْ الْوَقْتْ مَا غَيْسْتَحْمْلُوشْ فِيهْ النَّاسْ التَّعْلِيمْ الصّْحِيحْ، وَلَكِنْ غَيْتْبْعُو الشَّهَوَاتْ دْيَالْهُمْ، وْغَيْضُورُو بِيهُمْ مُعَلِّمِينْ غَيْݣُولُو لِيهُمْ دَاكْشِّي اللِّي بْغَاوْ يْسَمْعُوهْ.

4وْغَيْسَدُّو وْدْنِيهُمْ عْلَى الْحَقّْ، وْغَيْتْبْعُو الْخْرَايْفْ.

5وَلَكِنْ نْتَ، كُونْ مْوَݣّْضْ فْكُلّْ حَاجَة، وْصْبَرْ لْلْعْدَابْ، وْدِيرْ الْخْدْمَة دْيَالْ الْمُبَشِّرْ، وْكَمّْلْ الْخْدْمَة دْيَالْكْ.

6حِيتْ بْالنّْسْبَة لِيَّ أَنَا، رَانِي عْطِيتْ حْيَاتِي مْنْ قْبَلْ، وْجَا الْوَقْتْ اللِّي خَاصّْنِي نْمْشِي فِيهْ.

7رَانِي دْرْتْ جْهْدِي وْكَافْحْتْ مْزْيَانْ، وْكَمّْلْتْ اللِّي عْلِيَّ، وْحَافْضْتْ عْلَى الْإِيمَانْ،

8وْدَابَا رَاهْ كَيْتّْسْنَّانِي تَاجْ التَّقْوَى اللِّي غَيْعْطِيهْ لِيَّ فْدَاكْ النّْهَارْ، الرَّبّْ اللِّي كَيْحْكَمْ بْالْعَدْلْ، وْمَا غَيْعْطِيهْشْ لِيَّ غِيرْ أَنَا، وَلَكِنْ لْݣَاعْ هَادُوكْ اللِّي مْشْتَاقِينْ لْلرّْجُوعْ دْيَالُه.

9دِيرْ جَهْدْكْ بَاشْ تْجِي لْعَنْدِي دْغْيَا،

10حِيتْ دِيمَاسْ سْمَحْ فِيَّ بْسْبَابْ الْمْحَبَّة دْيَالُه لْهَادْ الدّْنْيَا وْسَافْرْ لْتْسَالُونِيكِي، أَمَّا كِرِيسْكِيسْ رَاهْ مْشَى لْغَلَاطِيَّة، وْتِيطُسْ مْشَى لْدَلْمَاطِيَّة.

11لُوقَا بُوحْدُه هُوَ اللِّي بْقَى مْعَايَ. سِيرْ عَنْدْ مَرْقُسْ وْجِيبُه مْعَاكْ، حِيتْ كَيْنْفَعْنِي فْالْخْدْمَة.

12أَمَّا تِيخِيكُسْ رَانِي صِيفْطْتُه لْأَفَسُسْ.

13مْلِّي تْكُونْ جَايْ، جِيبْ لِيَّ مْعَاكْ السّْلْهَامْ اللِّي خَلِّيتُه عَنْدْ كَارْبُسْ فْمْدِينْةْ تَرْوَاسْ، وْالْكْتُبْ حْتَّى هُمَ وْبْالْخُصُوصْ الْكْتُبْ دْيَالْ الجّْلْدْ.

14رَاهْ إِسْكَنْدَرْ الصّْنَايْعِي دْ النّْحَاسْ غْلَطْ بْزَّافْ فْحَقِّي، وْالرَّبّْ غَيْجَازِيهْ عْلَى فْعَايْلُه.

15رَدّْ بَالْكْ مْنُّه حْتَّى نْتَ، حِيتْ رَاهْ وْقَفْ ضْدّْ التَّعْلِيمْ دْيَالْنَا.

16مْلِّي دَافْعْتْ عْلَى رَاسِي أَوَّلْ مَرَّة حْتَّى وَاحْدْ مَا وْقَفْ مْعَايَ، وَلَكِنْ كُلّْشِي تّْخَلَّى عْلِيَّ. وْكَنْطْلَبْ مْنْ اللَّهْ بَاشْ مَا يْحَاسْبْهُمْشْ!

17وَلَكِنْ الرَّبّْ وْقَفْ مْعَايَ وْعْطَانِي الْقُوَّة، وْقْدَرْتْ نْخَبّْرْ بْالْبْشَارَة بَاشْ يْسَمْعُوهَا ݣَاعْ النَّاسْ اللِّي مَا كَيْآمْنُوشْ بْاللَّهْ، وْنْجِيتْ مْنْ فُمّْ السّْبَعْ.

18وْغَيْنَجِّينِي الرَّبّْ مْنْ ݣَاعْ أَعْمَالْ الشَّرّْ، وْغَيْحْفَضْنِي حْتَّى يْدِّينِي لْمَمْلَكْتُه فْالسّْمَا، لِيهْ الْعَزّْ دِيمَا وْعْلَى الدّْوَامْ. آمِينْ.

19سَلّْمْ عْلَى بِرِيسْكِلَّا وْأَكِيلَا وْعْلَى عَائِلْةْ أُونِيسِيفُورُسْ.

20أَرَاسْتُسْ رَاهْ بْقَى فْكُورِنْتُوسْ، وَلَكِنْ تْرُوفِيمُسْ خَلِّيتُه مْرِيضْ فْمِيلِيتُسْ.

21دِيرْ جَهْدْكْ بَاشْ تْجِي قْبَلْ مْنْ وَقْتْ الشّْتَا. كَيْسَلّْمْ عْلِيكْ أُوبُولُوسْ وْبُودِيسْ وْلِينُسْ وْكْلُودْيَة وْݣَاعْ الْخُوتْ.

22الرَّبّْ يْكُونْ مْعَاكْ. وْالنِّعْمَة دْيَالْ اللَّهْ تْكُونْ مْعَاكُمْ كُلّْكُمْ!