1 Corinthians 12

Arabic Bible Morocco Version - 2012 (الترجمة المغربية القياسية)

1الْفَصْلْ طْنَاشْ أَمَّا مْنْ جِهْةْ الْمَوَاهِبْ الرُّوحِيَّة، رَانِي مَا بْغِيتْشْ آ الْخُوتْ تْكُونُو مَا عَارْفِينْهُمْشْ.

2وْرَاكُمْ كَتْعَرْفُو بْلِّي فْالْوَقْتْ فَاشْ كْنْتُو مْنْ الشّْعُوبْ اللِّي مَا كَيْعَبْدُوشْ اللَّهْ، كْنْتُو كَتْعَبْدُو الْأَصْنَامْ اللِّي مَا كَيْهَدْرُوشْ وْمْجْرُورِينْ وْرَاهُمْ.

3هَادْشِّي عْلَاشْ بْغِيتْكُمْ تْعَرْفُو بْلِّي مَا كَايْنْشْ شِي حَدّْ وْهُوَ كَيْتّْكَلّْمْ بْرُوحْ اللَّهْ كَيْݣُولْ: يَسُوعْ مْلْعُونْ، وْمَا كَايْنْشْ شِي حَدّْ يْقْدَرْ يْݣُولْ: يَسُوعْ هُوَ رَبّْ، مْنْ غِيرْ بْالرُّوحْ الْقُدُسْ.

4رَاهْ كَايْنِينْ نْوَاعْ كْتَارْ دْ الْمَوَاهِبْ الرُّوحِيَّة، وَلَكِنْ كَيْجِيوْ مْنْ رُوحْ وَاحْدْ.

5وْكَايْنِينْ نْوَاعْ كْتَارْ دْ الْمْسْؤُولِيَّاتْ، وَلَكِنْ الرَّبّْ وَاحْدْ.

6وْكَايْنِينْ نْوَاعْ كْتَارْ دْ الْخْدْمَاتْ، وَلَكِنْ اللَّهْ وَاحْدْ، هُوَ اللِّي كَيْعَاوْنْ النَّاسْ بَاشْ كُلّْ وَاحْدْ يْدِيرْ خْدَمْتُه.

7وَلَكِنْ كُلّْ وَاحْدْ كَيْتّْعْطَاهْ الرُّوحْ الْقُدُسْ بَاشْ يْبَيّْنْ الْمَوْهِبَة اللِّي كَتْنْفَعْ.

8وْهَكَّا، رَاهْ وَاحْدْ تّْعْطَاهْ بْالرُّوحْ كْلَامْ الْحْكْمَة، وْوَاحْدْ آخُرْ كْلَامْ الْمَعْرِفَة، وْكُلّْهُمْ مْنْ رُوحْ وَاحْدْ.

9وْبْنَفْسْ الرُّوحْ تّْعْطَى لْوَاحْدْ الْإِيمَانْ، وْلْوَاحْدْ آخُرْ مَوْهِبَةْ الشِّفَا بْنَفْسْ الرُّوحْ،

10وْلْوَاحْدْ آخُرْ تّْعْطَاتْ الْقُوَّة بَاشْ يْدِيرْ الْمُعْجِزَاتْ، وْلَاخُرْ النُّبُوَّة، وْلَاخُرْ تَمْيِيزْ الْأَرْوَاحْ، وْلَاخُرْ يْتّْكَلّْمْ بْلُغَاتْ مْخْتَلْفَة، وْلَاخُرْ التَّرْجَمَة دْ هَادْ اللُّغَاتْ.

11هَادْ الْأُمُورْ كُلّْهَا كَيْدِيرْهَا نَفْسْ الرُّوحْ، وْكَيْفَرّْقْهَا عْلَى كُلّْ وَاحْدْ كِمَا بْغَا هُوَ.

12وْكِمَا الدَّاتْ وَحْدَة وْفِيهَا بْزَّافْ دْيَالْ الطّْرَافْ، وْهَادْ الطّْرَافْ وَاخَّا كْتَارْ هُمَ دَاتْ وَحْدَة، رَاهْ هَكَّا حْتَّى الْمَسِيحْ.

13حِيتْ كُلّْنَا تْعَمّْدْنَا بْرُوحْ وَاحْدْ بَاشْ نْوَلِّيوْ دَاتْ وَحْدَة، سْوَا يْهُودْ وْلَا يُونَانِيِّينْ، عْبِيدْ وْلَا حْرَارْ، كُلّْنَا تّْسْقِينَا بْرُوحْ وَاحْدْ.

14وْحْتَّى الدَّاتْ رَاهَا مَاشِي غِيرْ طَرْفْ وَاحْدْ، وَلَكِنْ بْزَّافْ دْيَالْ الطّْرَافْ.

15إِلَا ݣَالْتْ الرّْجَلْ: «عْلَاحْقَّاشْ أَنَا مَاشِي يْدّْ، أَنَا مَاشِي مْنْ الدَّاتْ»، وَاشْ هَادَا كَيْعْنِي بْلِّي هِيَ مَاشِي مْنْ الدَّاتْ؟

16وْإِلَا ݣَالْتْ الْوْدَنْ: «عْلَاحْقَّاشْ أَنَا مَاشِي عِينْ، أَنَا مَاشِي مْنْ الدَّاتْ»، وَاشْ هَادَا كَيْعْنِي بْلِّي هِيَ مَاشِي مْنْ الدَّاتْ؟

17إِلَا كَانْتْ الدَّاتْ كُلّْهَا عِينْ، فِينْ هُوَ السّْمَعْ؟ وْإِلَا كَانْتْ كُلّْهَا سْمَعْ، فِينْ هُوَ الشّْمّْ؟

18وَلَكِنْ اللَّهْ رْتّْبْ كُلّْ طَرْفْ فْالدَّاتْ كِمَا بْغَا.

19إِيوَا كُونْ كَانُو كُلّْهُمْ طَرْفْ وَاحْدْ، فِينْ هِيَ الدَّاتْ؟

20فْالْحَقِيقَة الطّْرَافْ رَاهْ كْتَارْ، وَلَكِنْ الدَّاتْ وَحْدَة.

21وْعْلَى هَادْشِّي مَا تْقْدَرْشْ الْعِينْ تْݣُولْ لْلْيْدّْ: «أَنَا مَا مْحْتَاجَاشْ لِيكْ!». وْلَا الرَّاسْ يْݣُولْ لْلرّْجْلِينْ: «أَنَا مَا مْحْتَاجْشْ لِيكُمْ!».

22وْزْيَادَة عْلَى هَادْشِّي، حْتَّى الطّْرَافْ دْيَالْ الدَّاتْ اللِّي كَيْبَانُو ضْعَافْ، رَاهُمْ مُهِمِّينْ،

23وْالطّْرَافْ دْيَالْ الدَّاتْ اللِّي كَنْحَسْبُوهُمْ مَا عَنْدْهُمْ قِيمَة كَنْعْطِيوْهُمْ قِيمَة كْتَرْ، وْالطّْرَافْ اللِّي مَا بَايْنِينْشْ كَنْتّْهَلَّاوْ فِيهُمْ بْزَّافْ.

24أَمَّا الطّْرَافْ اللِّي بَايْنِينْ رَاهُمْ مَا مْحْتَاجِينْشْ لْهَادْ التَّهَلُّو. وَلَكِنْ اللَّهْ صَايْبْ الدَّاتْ وْتّْهَلَّى فْالطّْرَافْ اللِّي مَا عَنْدْهُمْ قِيمَة،

25بَاشْ مَا يْكُونْشْ التَّفْرِيقْ فْالدَّاتْ، وَلَكِنْ يْكُونْ نَفْسْ الْإِهْتِمَامْ عَنْدْ الطّْرَافْ لْبَعْضِيَّاتْهُمْ.

26وْإِلَا كَانْ طَرْفْ وَاحْدْ كَيْتّْعَدّْبْ، رَاهْ ݣَاعْ الطّْرَافْ لْخْرِينْ كَيْتّْعَدّْبُو مْعَاهْ. وْإِلَا طَرْفْ وَاحْدْ تّْعْطَاتُه الْقِيمَة، رَاهْ ݣَاعْ الطّْرَافْ لْخْرِينْ كَيْفَرْحُو مْعَاهْ.

27وْنْتُمَ رَاكُمْ دَاتْ الْمَسِيحْ، وْكُلّْ وَاحْدْ مْنّْكُمْ طَرْفْ فِيهَا.

28وْاللَّهْ حَطّْ كُلّْ وَاحْدْ فْبْلَاصْتُه فْالْكْنِيسَة، الرُّسُلْ هُمَ اللّْوّْلِينْ، وْالْأَنْبِيَا هُمَ التَّانْيِينْ، وْالْمُعَلِّمِينْ هُمَ التَّالْتِينْ، وْمْنْ بَعْدْ اللِّي كَيْدِيرُو الْمُعْجِزَاتْ، وْمْنْ بَعْدْ اللِّي عَنْدْهُمْ مَوَاهِبْ الشِّفَا، وْاللِّي كَيْعَاوْنُو، وْالْمْسْؤُولِينْ عْلَى الْخْدْمَاتْ، وْاللِّي كَيْتّْكَلّْمُو بْلُغَاتْ مْخْتَلْفَة.

29وَاشْ كُلّْهُمْ رُسُلْ؟ وَاشْ كُلّْهُمْ أَنْبِيَا؟ وَاشْ كُلّْهُمْ مُعَلِّمِينْ؟ وَاشْ كُلّْهُمْ كَيْدِيرُو الْمُعْجِزَاتْ؟

30وَاشْ كُلّْهُمْ عَنْدْهُمْ الْمَوَاهِبْ دْ الشِّفَا؟ وَاشْ كُلّْهُمْ كَيْتّْكَلّْمُو بْلُغَاتْ؟ وَاشْ كُلّْهُمْ كَيْتَرْجْمُو؟

31وَلَكِنْ بْغِيوْ بْزَّافْ الْمَوَاهِبْ الْمُهِمَّة، وْأَنَا نْبَيّْنْ لِيكُمْ الطّْرِيقْ الْمْخَيّْرَة.

← Chapter 11 Chapter 13 →