Psalms 105

Amharic Tigrinya 2011

1ንእግዚኣብሄር ኣመስግንዎ፡ ስሙ ጸውዑ፡

2ዘምሩሉ፡ ኣመስግንዎ፡ ብዛዕባ ዂሉ ተኣምራቱ ተዛረቡ።

3ብቅዱስ ስሙ ኽበሩ፡ ልቢ እቶም ንእግዚኣብሄር ዚደልይዎ ይተሐጐስ።

4እግዚኣብሄርን ሓይሉን ድለዩ፡ ኣዘውቲርኩም ገጹ ድለዩ።

6ኣቱም ዘርኢ ኣብርሃም፡ እቲ ባርያኡ፡ ኣቱም ውሉድ ያእቆብ፡ ሕሩያቱ፡ ዝገበሮ መስትንክር ግብርታቱን ተኣምራቱን ፍርዲ ኣፉን ዘክሩ።

7ንሱ እግዚኣብሄር ኣምላኽና እዩ፡ ፍርዱ ኣብ ኲሉ ምድሪ እዩ።

9ነቲ ምስ ኣብርሃም ዝኣተዎ ኺዳኑ፡ ንይስሃቅውን ዝመሐለሉ ማሕላ፡ ነቲ ንሽሕ ወለዶ ዝኣዘዞ ቓል ንዘለኣለም ዘኪሩስ፡

10ምድሪ ከነኣን፡ ዕድሎት ርስትኹም ክትከውን፡ ክህበካ እየ፡ ኢሉ ንያእቆብ ከም ሕጊ፡ ንእስራኤል ከኣ ከም ናይ ዘለኣለም ኪዳን ገይሩ ኣቘሞ።

12ብቚጽሪ ሒደት፡ ኣዝዮም ሒደት፡ ኣብኣውን ስደተኛታት ከለዉ፡

13ካብ ህዝቢ ናብ ህዝቢ፡ ካብ መንግስቲውን ናብ ካልእ ህዝቢ ኺሐልፉ ኸለዉስ፡

14ንሱ ሰብ ኪጠቕዖም ኣይሐደገን፡ ንቕቡኣተይ ኣይተንክይዎም፡ ንነብያተይ ድማ ክሩእ ኣይትግበርዎም፡ ኢሉ ምእንትኦም ንነገስታት ገሰጾም።

16ጥሜት ናብ ሃገር ጸውዔ፡ ኲሉ ምርኩስ እንጌራ ሰበረ።

17ቀቅድሚኦም ሰብኣይ ለኣኸ፡ ዮሴፍ ከም ባርያ ተሸጠ።

18ነእጋሩ ብመቚሕ ሳቐዩ፡ ነፍሱ ኣብ ሓጺን ኣተወት።

19ቃሉ ኽሳዕ ዚፍጸም፡ ቃል እግዚኣብሄር ክሳዕ ዚፍትኖ፡

20ንጉስ ልኢኹ ኣፍትሖ፡ እቲ ገዛእ ኣህዛብ ሓራ ኣውጽኦ።

21ንመሳፍንቱ ኸም ፍቓዱ ኺኣስሮም፡ ንሽማግሌታቱ ኸኣ ጥበብ ኪምህሮም፡ ጐይታ ቤቱን ኣዛዝ ኲሉ ጥሪቱን ገበሮ።

23እስራኤል ናብ ግብጺ መጸ፡ ያእቆብውን ኣብ ሃገር ካም ሰፈረ።

24ንህዝቡ ኸኣ ኣዝዩ ኣብዝሖ፡ ካብ ተጻረርቱውን ኣበርትዖ።

25ንህዝቡ ኺጸልእዎ፡ ንባሮቱ ኺታናዀልዎምሲ፡ ልቦም ለወጦ።

26ንሙሴ ባርያኡን ንኣሮን ሕሩዩን ለኣኸ።

27ኣብ ማእከሎም ትእምርትታቱ፡ ኣብ ሃገር ካም ድማ ተኣምራት ገበሩ።

28ጸልማት ለኣኸ፡ ኣጸልመተ ኸኣ፡ ንቓላቱውን ኣይተጻረርዎን።

29ማያቶም ናብ ደም ለወጠ፡ ዓሳታቶም ከኣ ቐተለ።

30ናብ ኣባይቲ ነገስታቶም ክሳዕ ዚኣትዋ፡ ምድሮም ብቚርዖብ መልኤት።

31ተዛረበ እሞ ጽንጽያታት፡ ኣብ ኲሉ ወሰኖም ከኣ ቃርማ መጹ።

32ኣብ ክንዲ ዝናምሲ በረድ፡ ሃልሃልታ ሓዊ ኸኣ ኣብ ሃገሮም ኣውረደ።

33ወይኖምን በለሶምን ወቕዔ፡ ኣእዋሞ ዓዶም ድማ ሰባበረ።

34ተዛረበ እሞ ኣንበጣ፡ ቊጽሪ ዜብሉ ኹብኩብታ መጸ።

35ንዂሉ ብቋልያ ሃገሮም በልዖ፡ ንፍረ ምድሮም ከኣ በልዔ።

36ንዂሉ በዂሪ ሃገሮም፡ ንበዂሪ ሓይሎም፡ ቀተለ።

37ብወርቅን ብሩርን ኣውጽኦም፡ ኣብ ማእከል ዓሌቱ ኸኣ ድኹም ኣይነበረን።

38ፍርሃት ወዲቕዎም ነበረ እሞ፡ ግብጺ ብምውጻኦም ተሐጐሰት።

39ደበና ንመኸወልታ፡ ሓዊ ድማ ብለይቲ ኼብርህ፡ ዘርግሔ።

40ለመኑ እሞ ብርኒጎታት ኣምጽኤ። ብእንጌራ ሰማይውን ኣጽገቦም።

41ከውሒ ኸፈተ እሞ ማያት ፈልፈለ፡ ውሒዝ ብንቑጽ ቦታ ወሐዘ።

42ነቲ ቅዱስ ቃሉን ንኣብርሃም ባርያኡን ዘኪሩ እዩ እሞ፡

43ንህዝቡ ብሓጐስ፡ ነቶም ሕሩያቱ ድማ ብእልልታ ኣውጽኦም።

45ትእዛዛቱ ኺገብሩ፡ ሕጉውን ኪሕልዉስ፡ ሃገር ኣህዛብ ሀቦም፡ ጻማ ኣህዛብውን ወረሱ።

← Chapter 104 Chapter 106 →